«Դիզակ Ֆոլկ Բենդ»-ը մարտի 31-ին հանդես կգա համերգով
- 21:32 13.02.2026
«Դիզակ Ֆոլկ Բենդ»-ը մարտի 31-ին Երևանի Աբովյան փ. 2 հասցեյում հանդես կգա համերգով
«Դիզակ Ֆոլկ Բենդ»-ը «Դիզակ ԱՐՏ» մշակութային ՀԿ-ի կողմից ստեղծված երաժշտական համույթ է, որի առաքելությունն է արցախյան ֆոլկ երգերի ավանդույթների կենդանացումն ու վերարժևորումը՝ ժամանակակից, դինամիկ և նորաշունչ ներկայացմամբ։ Համույթը միավորում է երիտասարդ և շնորհաշատ երաժիշտների՝ ստեղծելով բազմաշերտ ու հոգեհարազատ երաժշտական միջավայր:
Համերգի հատուկ հյուրերն են Արսեն Գրիգորյանն ու «Տիեզերք» բենդը, որոնց մասնակցությամբ երեկոն կդառնա ջերմ, հիշվող և զգացմունքներով լի։
Տոմսերը կարող եք ձեռք բերել այս հղումով՝
https://eventhub.am/am/concert/event/dizak-folk-bend-0d3a79d9-8d0c-42cb-b684-1b7af4bdb069, նշված է «Դիզակ ԱՐՏ» մշակութային ՀԿ-ի հայտարարության մեջ:
Հիշեցնենք, որ «ԴիզակԱրտ» երիտասարդական մշակութային կենտրոնի նպատակն է պահպանել Հադրութի շրջանի փրկված նյութական և ոչ նյութական մշակութային արժեքները։
Հիմնադրումից ի վեր կենտրոնը ակտիվորեն ընդլայնել է իր գործունեությունը ինչպես Արցախում, այնպես էլ Հայաստանում։ Երիտասարդական մշակութային կենտրոններ են բացվել Երևանում և Աբովյանում, որտեղ արցախցի փախստական երեխաները ստանում են անվճար մշակութային կրթություն։ Գործում են տարբեր խմբակներ, այդ թվում՝ վոկալի, ազգային պարի, նկարչության, կիրառական և թատերական արվեստի։ Երեխաները նաև սովորում են նվագել հայկական ազգային երաժշտական գործիքներ և մասնակցում են տարբեր հայկական և միջազգային ստեղծագործական մրցույթների՝ արժանանալով պատվավոր մրցանակների։ Այսպիսով հունվարին ATV-ի կողմից անցկացված «Երազանքի բեմը», երաժշտական նախագծի հաղթող ճանաչվեց 13-ամյա Արման Հայրիյանը Հադրութից, ով Դիզակ-ԱՐՏ կենտրոնի սաներից է:
