Իրանում վերսկսվել են ուսանողական բողոքի ցույցեր․ արևմտյան լրատվամիջոցներ
- 10:08 22.02.2026
DW-ն հաղորդում է, որ Իրանում վերսկսվել են ուսանողական բողոքի ցույցերը նոր ուսումնական կիսամյակի առաջին օրը:
Հեղինակավոր Ամիրքաբիր տեխնոլոգիական համալսարանի և Շարիֆի տեխնոլոգիական համալսարանի ուսանողները հավաքվել են իրենց համալսարանական տարածքներում և կարգախոսներ են վանկարկել Իրանի գերագույն առաջնորդ այաթոլլահ Ալի Խամենեիի դեմ, հաղորդել է Financial Times (FT)-ը շաբաթ օրը՝ փետրվարի 21-ի երեկոյան:
Շարիֆի համալսարանում բախվել են հակադիր ուսանողական խմբերը: Հակակառավարական ցուցարարները պատասխանել են Իրանի կառավարության կողմնակիցներին՝ վանկարկելով «Կեցցե՛ շահը»՝ նկատի ունենալով Ռեզա Փահլավիին՝ վերջին շահի որդուն, որը տապալվեց 1979 թվականի Իսլամական հեղափոխության ժամանակ:
Բողոքի ցույցեր են տեղի ունեցել նաև Թեհրանի համալսարանում և Շահիդ Բեհեշթիի համալսարանում: Որոշ ուսանողներ, պաստառներ պահելով, պահանջել են ազատ արձակել հունվարյան բողոքի ցույցերի ժամանակ իշխանությունների կողմից ձերբակալված իրենց համակուրսեցիներին: