Փաշինյան․ ասել եմ՝ “Արցախը Հայաստան է”, որ զորքերը չհանեն՝ բերեն իշխանափոխություն անեն

«Նոր Սահմանադրության մեջ Անկախության հռչակագրին հղում պետք է չլինի, որովհետեւ Անկախության հռչակագիրը կառուցված է կոնֆլիկտի տրամաբանության վրա։ Չենք կարող մենք կոնֆլիկտի տրամաբանության վրա գնալ ու ուզենալ անկախ պետություն կառուցել»,- այսօր լրագրողներին ասաց Նիկոլ Փաշինյանը։

Նա անդրադարձավ նաեւ եկեղեցու դեմ պայքարին․ «Ինչո՞ւ եմ ասում, որ եկեղեցին ստանձել է պատերազմի կուսակցության առաջնորդությունը, որովհետեւ ես գնում եմ պատարագների, այն օրը գնացել եմ պատարագի, արարողակարգում նման բան չկա, բայց տեսնում եմ, որ պատարագի տեքստից շեղվում են եւ հղում են անում Արցախի Հանրապետություն եւ այլն։ Շատ լավ, եկեք բոլորս հղում անենք Արցախի Հանրապետությանը, դա ի՞նչ է նշանակում՝ դա նշանակում է կոնֆլիկտ։

Ամեն այդպիսի նախադասությունը նշանակում է պատերազմի կոչ, գիտեմ, որ հեսա կասեք՝ բա ինչո՞ւ եք դուք ասել՝ «Արցախը Հայաստան է, եւ վերջ»։ Այն ժամանակ, երբ պայքարելու ժամանակն էր, բոլորը կենտրոնացած էին նրա վրա, թե ոնց Երեւանում կառավարությունը փոխեն։ Ուզում էին զորքը հետ քաշեին եւ հեղաշրջում անեին։ Ավարտվել է այդ պատմությունը, ես ասել եմ՝ Ղարաբաղյան շարժում չկա։ Եվ ամեն անգամ, երբ խորանից հղում են անում Արցախի Հանրապետությանը, դա պատերազմի ճանապարհին ոտք դնել է նշանակում»,- հայտարարեց Փաշինյանը։