Այսինքն՝ Ղարաբաղում ծնվել է, անձեռնմխելիությո՞ւն է․ Փաշինյան

Արցախցի Գայանե Մեսրոպյանին ոստիկանները գիշերով ձերբակալել ու մանկահասակ աղջկա հետ Քննչական տարել՝ Փաշինյանի դեմ մեկնաբանություն գրելու համար:

Ինչպես հայտնում է Ազատությունը, վարչապետի մասին մեկնաբանությունը մեկ տարի առաջ է եղել, պատերազմում եղբորն ու ամեն ինչ կորցրած արցախցի կինը ինչ-որ մեկի ստատուսի տակ գրառում է արել, դրանում «սատկացնել» բառն է եղել: Ոստիկանները դա որակել են բռնության կոչ, քրեական գործ հարուցել ու մեկ տարի անց եկել հինգ երեխայի մոր հետևից:

Նրան յոթ տարեկան աղջկա հետ Նոր Հաճնից Դիլիջան են հասցրել: Արցախից տեղահանվելուց հետո ընտանիքն այնտեղ է գրանցվել։

«Մի ժամ սպասել ենք, քննիչը եկել է, թղթերը հանել, թե սա Ձեր ֆեյսբուքյան էջն է, այսինչ գրառումը կատարել եք, դրա համար ենք Ձեզ բերման ենթարկել: Հետո էլ ասում են՝ խոսքի ազատություն է», – նշեց նա:

Հարցի մասին երեկ փաստաբան Ռոման Երիցյանն է ահազանգել։

«Ի՞նչ մտածողություն է ընդհանրապես, այսինքն՝ Ղարաբաղում ծնվել է, անձեռնմխելիությո՞ւն է:<> Ես տեղյակ չեմ՝ ինչի մասին եք խոսում», – այսօր լրագրողներին ի պատասխան ասել է Նիկոլ Փաշինյանը: