Դա նորմա՞լ է․ Իսրայելը վերահսկողություն է ստանձնում Լիբանանի հարավի նկատմամբ

Իսրայելի պաշտպանության նախարար Իսրայել Կացը երեքշաբթի օրը հայտարարել է, որ Իսրայելը կպահպանի Հարավային Լիբանանի վերահսկողությունը։ Նա նշել է, որ լիբանանցիները չեն վերադառնա իրենց տները այս տարածքներում, մինչև Իսրայելի անվտանգությունը չապահովվի։

«Իսրայելի պաշտպանության բանակը կշարունակի գործել Լիբանանում լիակատար ուժով «Հեզբոլլահի» դեմ։ Հարյուր հազարավոր հարավային Լիբանանի բնակիչներ, որոնք տարհանվել են հյուսիս, չեն կարողանա վերադառնալ Լիտանի գետից հարավ գտնվող տարածքներ, մինչև չապահովվի հյուսիսային իսրայելցիների անվտանգությունը», – հայտարարել է Կացը Իսրայելի պաշտպանության բանակի գլխավոր շտաբի նիստում։

Նա հայտարարել է, որ Լիտանի գետի վրայով անցնող բոլոր կամուրջները, որոնք «Հեզբոլլահը» օգտագործել է Հարավային Լիբանան մարտիկներ և զենք տեղափոխելու համար, «ավերվել են», և Իսրայելի պաշտպանության բանակը կվերահսկի մնացած անցումները և անվտանգության գոտին՝ իր սահմանից մինչև գետը։

Իսրայելի գործողությունները Լիբանանում դժգոհություն են առաջացնում միջազգային կազմակերպություններում և մի շարք եվրոպական երկրներում, մասնավորապես՝ Ֆրանսիայում, որը սերտ կապեր ունի Լիբանանի հետ։

Ինչպես Հայաստանը, Լիբանանը սակրալ երկիր է ինչպես արևմտյան, այնպես էլ արևելյան քաղաքակրթությունների համար։ Այս քաղաքակրթությունների արմատները սկիզբ են առնում փյունիկյան մշակույթից, ներառյալ այբուբենի ստեղծումը, մեծ նավերի և աղի օգտագործումը որպես սնունդի պահպանման և, հետևաբար, առևտրի միջոց։ Եվ ինչպես աստվածաշնչյան Արարատյան քաղաքակրթությունը, փյունիկյան Լիբանանը նույնպես անընդհատ հարձակման տակ է։

Վերլուծաբանները խոսում են Լիբանանի վերացման հնարավորության մասին՝ Մերձավոր Արևելքի նոր լանդշաֆտի ձևավորման արդյունքում։ Հայաստանում պետական ​​մակարդակով խոսվում է ինքնիշխանությունը կորցնելու վտանգի մասին։ Արմատների իրավունքը «վերացնելու» արցախյան նախադեպը դաժան կատակ է խաղում ինչպես արևմտյան, այնպես էլ արևելյան քաղաքակրթությունների հետ։