Արցախի և Նախիջևանի մասին հիշատակելը չի կարող տարածքային պահանջ լինել այլ երկրի նկատմամբ

Երկրորդ նախագահի առաջնորդած «Հայաստան» խմբակցության քարտուղար Արծվիկ Մինասյանը ասում է, որ երբեք չեն ունեցել տարածքային պահանջ, այդ թվում՝ Արցախի նկատմամբ:

«Խոսքը չի գնում տարածքային պահանջների մասին, – ասաց Արծվիկ Մինասյանը. – Նախ՝ մենք խոսում ենք արցախցիների արժանապատիվ, երաշխավորված, անվտանգության երաշխավորված իրավունքներով վերադարձի միջազգային մակարդակում ընդունման մեխանիզմի մասին: Տարածքային պահանջ երբեք չենք էլ ունեցել մենք: Որևէ քաղաքական ուժ տարածքային պահանջ պաշտոնապես չի էլ ներկայացրել, ըստ էության չի էլ ասել դրա մասին»:

Արծվիկ Մինասյանը չհիշատակեց 1989 թ․ դեկտեմբերի 1-ի Արցախի և Հայաստանի վերամիավորման մասին որոշումը։ Չհիշատակեց նաև Կարսի պայմանագիրը, որով հայկական Նախիջևանը 1921 թ․ փոխանցվեց Ադրբեջանի պրոտեկտորատի տակ, հիմա էլ Ալիևը հանել է Կարսի պայմանագրի հղումը Նախիջևանի սահմանադրությունից։ 

Արծվիկ Մինասյանը ճիշտ է․ Արցախի և Նախիջևանի մասին հիշատակելը չի կարող տարածքային պահանջ լինել այլ երկրի նկատմամբ։ Նույնն է, ինչ Սյունիքի հարավի մասին խոսելը կարող է ընկալվել որպես տարածքային պահանջ ԱՄՆ-ին։