Ապրիլի 22-ին, «Սարից այն կողմ» դրամայի ցուցադրություն
- 10:49 27.03.2026
Ապրիլի 22-ին, Հ. Թումանյանի անվան Ազգային տիկնիկային թատրոնում, ՀԲԸՄ աջակցությամբ, կկայանա Կարինե Քոչարյանի «Սարից այն կողմ» դրամայի ցուցադրությունը:
2020 թվականի Արցախյան պատերազմի ծանր հետևանքների համապատկերում ստեղծված այս դրամայի հիմքում երկու դեռահասների սերն է, որոնց անձնական վիշտը դառնում է այն ցավոտ պրիզման, ինչի միջով բացահայտվում է իրենց լեռները հավերժ կորցրած ժողովրդի ճակատագիրը:
Գործողությունները տեղի են ունենում 44 օրյա պատերազմից 5-6 ամիս հետո, զուգահեռ պատմությունների միջոցով՝ ներկայացնելով իրենց հողին անքակտելիորեն կապված տարբեր սերունդներին: 85-ամյա պապը, ով տենչում է վերադառնալ սարերի մեջ կորած իր տունը, Արցախյան առաջին պատերազմում հաշմանդամություն ստացած ազատամարտիկը, ով չի պատկերացնում իր կյանքն Արցախից դուրս, տղամարդը, ով փորձում է զրոյից վերակերտել Հադրութում իր կորցրած տունը և խլված ինքնությունը, հույսով ապրող երիտասարդ աղջիկը, ով սպասում է պատերազմում անհայտ կորած իր փեսացուին: Անձնական կորստի և ազգային ողբերգության հատման կետերով՝ այս պիեսը փառաբանում է մի ժողովրդի անկոտրում ոգին, որի համար հայրենիքը սոսկ տարածք չէ, այլ սեփական էության անբաժանելի և շնչող մասնիկը: