ԵՄ օգնությունը արցախցիների փոքր և միջին բիզնեսին
- 10:19 07.04.2026
Եվրոպական միությունը և Վերակառուցման և զարգացման եվրոպական բանկը համատեղ, գործընկեր ֆինանսական հաստատությունների (ՄՖՀ) հետ hատուկ վարկային գործիքների միջոցով աջակցում են Ղարաբաղից տեղահանված հայերի կողմից ստեղծված միջին և փոքր ձեռնարկություններին (ՓՄՁ-ներին) հաղթահարելու բիզնես ոլորտում առկա խոչընդոտները՝ նպաստելով նրանց աճին և մրցունակության բարձրացմանը։
Այս աջակցության երկու հիմնական նպատակներն են՝ օգնել այն ՓՄՁ-ներին, որոնք ցանկանում են վերահաստատվել Հայաստանում, նաև այն տեղական բիզնեսներին, որոնք իրենց գործունեությամբ նպաստում են տեղահանվածների տնտեսական ինտեգրմանը։ Աջակցությունը տրամադրվում է ինչպես ֆինանսավորման, այնպես էլ՝ բիզնես խորհրդատվության տեսքով։
Ծրագրի շրջանակում ՄՓՄՁ-ներն ունեն հնարավորություն ստանալու վարկի գումարի մինչև 35%-ի չափով խրախուսական դրամաշնորհներ՝ ներդրումային ծախսերը կրճատելու և Ղարաբաղից տեղահանվածներին աշխատաշուկայում ինտեգրելու նպատակով։ Ինչպես նաև, ՄՓՄՁ-ներն ունեն կարողությունների զարգացման հնարավորություն՝ փոքր բիզնեսների խորհրդատվական ծրագրի միջոցով։
Խմբ․ Մենք չունենք տվյալներ 35 տոկոս քեշբեքով վարկ ստացած արցախցի ձեռնարկատերերի քանակի մասին, բայց հստակ փաստեր ունենք, որ բանկերը անհաղթահարելի պայմաններ են առաջարկում, և դիմողները չափազանց քիչ են։ Կան կասկածներ, որ վարկերը տրամադրվում են ոչ թե արցախյան, այլ տեղական կազմակերպություններին, մի պայմանով, որ արցախցիներին կապահովեն աշխատանքով։ Սա կանոնների խախտում չէ, բայց այս անցքը թույլ է տալիս բանկերին զրկել արցախցիներին անմիջական և ուղիղ աջակցությունից։
ԵՄ այս ծրագիրը, որը իսկապես կարող է շատերի համար փրկություն լինել, կարիք ունի մոնիտորինգի և հրապարակային հաշվետվության՝ կոռուպցիոն և այլ ռիսկերից խուսափելու համար։