Իսրայելն ու Լիբանանը ուղիղ բանակցություններ կսկսեն Վաշինգտոնում

Իսրայելի և Լիբանանի միջև ուղիղ բանակցությունները կսկսվեն հաջորդ շաբաթ Վաշինգտոնում՝ ԱՄՆ Պետդեպարտամենտում, գրել է Axios-ի լրագրող Բարաք Ռավիդը՝ հղում անելով իսրայելցի բարձրաստիճան պաշտոնյայի։

Իրանի փոխարտգործնախարար Սաիդ Խատիբզադեն երեկ BBC-ին ասել է, որ չորեքշաբթի օրը Լիբանանի վրա Իսրայելի կողմից իրականացված հարվածները ԱՄՆ-ի և Իրանի միջև կնքված հրադադարի լուրջ խախտում են։ Նա մեղադրել է Իսրայելին Լիբանանում «զանգվածային սպանությունների» մեջ. Առողջապահության նախարարության տվյալներով՝ չորեքշաբթի օրը այնտեղ սպանվել է 203 մարդ։

Խատիբզադեն նաև հայտարարել է, որ Հորմուզի նեղուցը կվերաբացվի, եթե ԱՄՆ-ն դադարեցնի իր «ագրեսիան»։

Հարցին, թե արդյոք Իրանը կհեռանա բանակցություններից, եթե Իսրայելի հարվածները շարունակվեն, նա պատասխանել է. «Մենք մեծ նշանակություն ենք տալիս ամբողջ Մերձավոր Արևելքի բարեկեցությանը»։

Պակիստանը, որը միջնորդել է ԱՄՆ-ի և Իրանի միջև հրադադարը, սկզբում հայտարարել է, որ Լիբանանը համաձայնագրի մաս է կազմում։ Սակայն Իսրայելը հերքել է դա և շարունակել է իր ավիահարվածները։

Պակիստանում Իրանի դեսպան Ռեզա Ամիրի Մողադամը հաստատել է, որ իրանական պատվիրակությունն այսօր մեկնում է Պակիստան՝ պատերազմը դադարեցնելու համար ԱՄՆ-ի հետ բանակցություններ սկսելու համար։ Նրանք շաբաթ օրը Իսլամաբադում հանդիպում կունենան ԱՄՆ փոխնախագահ Ջ.Դ. Վենսի հետ։