Ինչ է ակնարկում Սերժ Սարգսյանը Բայդենին, Պուտինին ու Մակրոնին
- 15:24 24.07.2023
Հայաստանի երրորդ նախագահ Սերժ Սարգսյանը նամակ է գրել Բայդենին, Մակրոնին և Պուտինին, որը պարունակում է մի շարք ուշագրավ հատվածներ։
«Դիմում եմ ձեզ, առաջին հերթին, որպես ԵԱՀԿ Մինսկի խմբի համանախագահ երկրների ղեկավարների, որպես առաջնորդների, ովքեր անձամբ գիտեն, թե որտեղ էր ԼՂ հիմնախնդրի կարգավորման բանակցային գործընթացը մինչև 2018 թվականը, երբ մեր հասարակությունը հուզական ընտրություն կատարեց և իշխանությունը հանձնեց պետության մասին պատկերացում չունեցող գործչին։ Ես հասկանում եմ, որ շատերը հնարավորություն ստացան փորձել յուրովի լուծել Արցախի խնդիրը՝ օգտվելով այս մարդու անտրամաբանական քայլերից, որոնք կապ չունեն սեփական երկրի շահերի հետ։ Բայց փաստն այն է, որ խնդիրը չի լուծվել, և հակամարտությունը սրվել է։ Բացի այդ, այս անձը չունի մեր ժողովրդի մանդատը՝ ճանաչելու Արցախը որպես որևէ այլ երկրի մաս, իսկ Արցախի ժողովրդի կողմից բացարձակապես չունի մանդատ՝ իր ճակատագիրը կամայական որոշելու համար»,- ասված է կոչում։
Սարգսյանը նշել է. «Այն, ինչ այսօր կատարվում է, չի բերի այն լուծումներին, որոնք դուք անկեղծորեն պատկերացնում եք»։ «Այսօր լռել կամ շատ ավելի ժամանակ չհատկացնել Արցախի խնդրին, նշանակում է, որ շատ շուտով ձեր երկրները ստիպված կլինեն ժամանակ հատկացնել «Հայկական հարցին»։
Ելնելով վերը նշված մեջբերումներից՝ Սերժ Սարգսյանն ակնարկում է, որ իր նամակի հասցեատերերը 2018թ.-ին Նիկոլ Փաշինյանին իշխանության են բերել՝ Արցախի հարցը իրենց պատկերացումներին համապատասխան լուծելու ակնկալիքով։ Բայց նրանք սխալվեցին, քանի որ Փաշինյանը, ով ձեւացնում է, թե իրենցից յուրաքանչյուրի «պատկերացումների» համապատասխան է գործում, իրականում ամեն ինչ այլ կերպ է անում։ Ավելի հեռուն գնալով ասենք՝ Փաշինյանը ոչ թե իրենց կամակատարն է, ինչպես իրենք են կարծում, այլ բոլորովին այլ ուժերի կամքը կատարողը։ Բացի այդ, նրա կայացրած որոշումները լեգիտիմ չեն լինի։
Եթե Արցախի հարցը չլուծվի, ապա ստիպված կլինեք ջանքեր գործադրել Հայկական հարցը լուծելու համար, ասում է Սարգսյանը։ Նա, փաստորեն, նախագահներին ասում է, որ մինչ իրենք Արցախի հարցի «ցավոտ լուծման» հույս ունեին, Փաշինյանը «բացեց» Հայկական հարցը, և վաղը կարող է առաջանալ Հայաստանի ինքնիշխանության խնդիր։