Վիկտոր Օրբանը չհայտարարված այցով ժամանել է Մոսկվա

Հունգարիայի վարչապետ Վիկտոր Օրբանը ուրբաթ՝ հուլիսի 5-ին չհայտարարված այցով ժամանել է Մոսկվա: Օրբանի մամուլի քարտուղար Բերտալան Հավասիի խոսքով՝ այցի նպատակը ՌԴ նախագահ Վլադիմիր Պուտինի հետ հանդիպումն է։ Մի քանի օր առաջ Օրբանն այցելել էր Կիև։

«Իր խաղաղապահ առաքելության շրջանակներում վարչապետ Վիկտոր Օրբանը ժամանել է Մոսկվա։ Կառավարության ղեկավարը կհանդիպի ՌԴ նախագահ Վլադիմիր Պուտինի հետ»,- Հավաշիի խոսքերն է մեջբերում MTI լրատվական գործակալությունը։

Ավելի վաղ որոշ լրատվամիջոցներ գրել էին Ռուսաստան այցելելու Օրբանի ծրագրերի և Բրյուսելի մտահոգությունների մասին։ Հուլիսի 5-ին ԵՄ դիվանագիտության ղեկավար Ժոզեպ Բորելը ասել է, որ Հունգարիայի վարչապետը «ոչ մի կերպ» չի ներկայացնի ԵՄ-ն այցի ժամանակ։

Օրբանի այցը Մոսկվա «կայանում է բացառապես Հունգարիայի և Ռուսաստանի երկկողմ հարաբերությունների շրջանակներում», – ընդգծել է Բորելը։ Նա հավելել է, որ չնայած այն հանգամանքին, որ Հունգարիան վերջերս դարձավ Եվրոպական խորհրդի նախագահ, դա Օրբանին պաշտոնական լիազորություններ չի տալիս՝ ներկայացնելու Եվրամիությունը արտասահմանում։ Դա անելու իրավունքը մնում է անձամբ Բորելին, ով ԵՄ արտաքին հարաբերությունների և անվտանգության քաղաքականության գերագույն ներկայացուցիչն է, ինչպես նաև Եվրոպական խորհրդի նախագահ Շառլ Միշելը։

«Պուտինին մեղադրանք է առաջադրվել Միջազգային քրեական դատարանի կողմից և կալանքի օրդեր տրվել նրա դերի համար՝ կապված Ուկրաինայից Ռուսաստան երեխաների բռնի արտաքսման հետ», – հիշեցրել է Բորելը, գրում է DW-ն։