ԵՄ-ում Ադրբեջանի դեսպանը սպառնացել է սպանել Տիգրան Բալայանին, Երևանը նոտա է հղել. Politico
- 10:08 05.11.2024
Հայաստանի դեսպանությունը պաշտոնական բողոք է հղել Բրյուսելի դիվանագիտական ներկայացուցչություններին՝ կապված ԵՄ-ում Հայաստանի դեսպան Տիգրան Բալայանի հասցեին Ադրբեջանի դեսպան Վագիֆ Սադիգովի հնչեցրած սպառնալիքների հետ։
Ըստ Politico-ի, խմբագրությունը ստացել է նամակի պատճենը, որտեղ ասվում է, որ Բալայանը ենթարկվել է բանավոր հարձակման և ահաբեկման Սադիգովի կողմից, այդ թվում՝ սպառնալիքներ նրա կյանքին։
Միջադեպը, ըստ հրապարակման, տեղի է ունեցել Բրյուսելի Թանգլա հյուրանոցում ընդունելության ժամանակ, որը կազմակերպել էր Թուրքիայի դեսպանությունը՝ Թուրքիայի Հանրապետության 101-ամյակի կապակցությամբ։ Սա Անկարայի կողմից կազմակերպված Հայաստանի դեսպանատան մասնակցությամբ առաջին ընդունելությունն էր 2020 թվականի Հայաստանի և Ադրբեջանի միջև պատերազմից հետո։
Politico-ի խնդրանքին ի պատասխան՝ Սադիգովը հերքել է միջադեպը՝ մեղադրանքներն անվանելով «ծիծաղելի» և նշելով, որ ընդունելությունն անցել է բարեկամական մթնոլորտում՝ բնորոշ դիվանագիտական սովորական իրադարձություններին։
«Ես տեղյակ չեմ որևէ նամակի կամ մեղադրանքի մասին, հայ դիվանագետները կարող են ամեն ինչ ասել»,- հավելեց նա։