Գերության մեջ գտնվող Վագիֆ Խաչատրյանի ընտանիքը ամսական մեկ անգամ նրա հետ շփվելու հնարավորություն ունի

«Վերջին անգամ մենք խոսել ենք հոկտեմբերի 30-ին։ Հեռախոսային կապն ապահովում է Կարմիր Խաչը։ Մի քանի րոպեանոց զրույցի ընթացքում կարողանում ենք տեղեկանալ նրա ինքնազգացողության մասին և պատմել ընտանիքի և հարազատների հետ կապված նորությունները։ Չնայած իր դրությանը՝ նա մեզ հանգստացնում է, ասում, որ մենք ամուր մնանք և հոգ տանենք միմյանց մասին։ Նրա վիճակը վատ չէ, բայց մենք զգում ենք, թե ինչքան է նրա համար դժվար հարազատներից հեռու։ Հայրս հույս չունի, որ մի օր կտեսնի մեզ, բայց մենք չենք կորցնում հույսը, որ նա կվերադառնա մեզ մոտ, որովհետև մենք գիտենք, որ մեր հայրը անմեղ է»,- ասում են հարազատները։

Հիշեցնենք, որ 2023 թվականի ամռանը 70-ամյա Վագիֆ Խաչատրյանը գերի է վերցվել ադրբեջանցիների կողմից Հակարի կամրի անցակետում, երբ Կարմիր Խաչի առաքելությունը նրան տեղափոխում էր Արցախից Հայաստան՝ բուժման շարունակման համար։ Բաքվի դատարանը նրան դատապարտել է 15 տարվա ազատազրկման՝ առաջին ղարաբաղյան պատերազմի ընթացքում ծանր գործողությունների համար։ Խաչատրյանը մերժել է իրեն առաջադրված մեղադրանքները՝ հայտնելով. «Ես չեմ մասնակցել այդ պատերազմին»։

Վագիֆ Խաչատրյանի հարազատները հայտարարում են, որ նա կապ չունի դատարանում ներկայացված գործողությունների հետ, պարզապես նրա անունը և ազգանունը շփոթվել են մեկ այլ արցախցու հետ։ Նրանք հույս ունեն, որ «մի օր ինչ-որ հրաշքով հայրը կարդարացվի»։

Ալվարդ Գրիգորյան