«Դէկավվա»՝ օգնելով կայունացնել արցախցիներին
- 21:49 14.01.2025
Արցախից տեղահանված ընտանիքներին վերաբերող ծրագրերի իրականացման ժամանակ հաճախ կարելի է հանդիպել «Դէկավվա» հիմնադրամին, որն իր գործունեությունը հենց այդ նպատակով է սկսել՝ աջակցել ընտանիքներին հաղթահարելու խնդիրներն ու ավելի կայուն միջավայր ստեղծել նրանց համար։
Ադրիանա Մարությանը, ով հիմնադրամի բարեգործական ծրագրերի ղեկավարն է, նշում է, որ հիմնադրամի համար կարեւոր էր վերականգնել տեղահանվածների հավատն ու վստահությունը ապագայի հանդեպ։
«Մինչ օրս մենք աջակցություն ենք ցուցաբերել 259 ընտանիքի՝ տրամադրելով անհրաժեշտ սնունդ, հագուստ, կենցաղային տեխնիկա, կահույք, երաժշտական գործիքներ, ուսումնական պարագաներ և այլ անհրաժեշտ նյութեր»,- նշում է նա։
«Դէկավվա»-ն նաև մասնակիորեն վճարել է մի քանի ընտանիքների ուսման վարձերը և համագործակցել «Իմաստ» հավելվածի հետ՝ մի շարք կարևոր ֆինանսական նախագծերի, այդ թվում՝ բուժման և բիզնեսի համար ֆինանսավորման նպատակով։
Հիմնադրամի համաֆինանսավորմամբ իրականացվել են մի շարք ծրագրեր՝ «Վըսկէ ծերքեր»-ը, որն աջակցում էր տեղահանված արհեստավորներին եւ մշակութային ժառանգության պահպանությանը։
Ամռանը կազմակերպվեց բացառիկ ցուցադրություն՝ գեղարվեստական կտավների, որոնք հեղինակը կարողացել է փրկել բռնի տեղահանման ժամանակ։
«Մայրենիք»-ը յուրահատուկ նախագիծ է զոհված զինծառայողների երեխաների համար։ Համաֆինանսավորմամբ իրականացրել են նաեւ մի քանի ծրագրեր՝ հրդեհի ժամանակ զոհվածների հիշատակի ծրագիր, ամանորյա ծրագիր՝ Արցախից տեղահանված երեխաների համար։
Նախորդ տարի «Դէկավվա»-յի իրականացրած ծրագրերը միասին կազմել են 64 միլիոն դրամ, ներառյալ տեխնիկայի, կահույքի, դեղորայքի, սննդի ձեռքբերում, երաժշտական գործիքների գնում։
Ի դեպ, հենց երաժշտական գործիքներից մեկի գնումը հիմք հանդիսավաց մեկ այլ գաղափարի ստեղծման, որի մասին կպատմենք մեր առաջիկա ռեպորտաժներում։
Մարիամ Սարգսյան
