Շարունակվելու է բնակապահովման ծրագրի պարտադիր պահանջ մնալ ՀՀ քաղաքացի դառնալը

Այսօր հրավիրած ասուլիսում աշխատանքի եւ սոցիալական հարցերի նախարար Նարեկ Մկրտչյանին հարց ուղղվեց՝ բռնի տեղահանված արցախցիներից քչերն են դիմում ՀՀ կառավարության բնակապահովման ծրագից օգտվելու համար, քանի որ ՀՀ քաղաքացի դառնալու պարտադիր նորմին դեմ են, կառավարությունը նախատեսո՞ւմ է վերանայել այս դրույթը։

Ի պատասխան նախարարն ասաց․ «Հարցին, արդյոք մենք գո՞հ ենք այս արդյունքից, թե ոչ, բնականաբար արդյունքից գոհ չենք, որ քիչ թվով մարդիկ են դիմում։ Բայց ձեր հարցին՝ արդյոք մենք հետքայլ անելո՞ւ ենք քաղաքացիության հարցից, ասում ենք, որ՝ ոչ, հետքայլ չենք անելու։ Շարունակվելու է ծրագրի պարտադիր պահանջ մնալ ՀՀ քաղաքացի դառնալը։ Հետեւաբար, պետք է եւս մեկ անգամ կոչ անեմ մեր հայրենակիցներին՝ դառնալ քաղաքացի, ապա՝ դառնալ մեր ծրագրի շահառու, ներառվել եւ անցնել զարգացման ճանապարհով»։