Վրաստանի պաշտպանության նախարարը Շուշիում. կօգնի՞ Բաքուն «ազատագրել» Աբխազիան
- 10:52 02.10.2026
«Թուրքիայի ազգային պաշտպանության նախարար Յաշար Գյուլերը, Ադրբեջանի պաշտպանության նախարար Զաքիր Հասանովը և Վրաստանի փոխվարչապետ և պաշտպանության նախարար Իրակլի Չիկովանին այցելել են Շուշա՝ հոկտեմբերի 2-ին կայանալիք Ադրբեջանի, Թուրքիայի և Վրաստանի պաշտպանության նախարարների եռակողմ հանդիպումից առաջ», – ասվում է Թուրքիայի պաշտպանության նախարարության հայտարարության մեջ։
Վրաստանի պաշտպանության նախարարի այցը օկուպացված Արցախ կարող է նախաբան լինել երեք երկրների միջև պաշտպանական համաձայնագրի կնքման համար։
Շուշիում հանդիպումը տեղի ունենում Բաքվի իշխանությունների կողմից ներկայիս Ադրբեջանի տարածքում գտնվող Սուրբ Գևորգ Քուրմուխ եկեղեցու տարածքում հողային աշխատանքների շուրջ առաջացած փոքր սկանդալից հետո։ Վրաստանի պատրիարքարանը նշել է, որ աշխատանքներն իրականացվում են անհասկանալի նպատակներով և չեն համակարգվել Վրաստանի հուշարձանների պաշտպանության մարմինների և Պատրիարքարանի հետ։
Ի պատասխան՝ Ադրբեջանի արտաքին գործերի նախարարությունը կոչ արեց Վրաց ուղղափառ եկեղեցուն «չկրկնել Հայ եկեղեցու մոտեցումները և չհետևել նրա օրինակին», նշելով միայն, որ վրացական հայտարարության մեջ եկեղեցու անվանումը վրացերենով (քուրմուխի), այլ ոչ թե ադրբեջաներենով (քուրմյուք) է նշված: Ադրբեջանի արտաքին գործերի նախարարությունը այս մոտեցումը համարեց «տարածքային պահանջներ պարունակող» և «հակասող Ադրբեջանի և Վրաստանի միջև բարեկամության, գործընկերության և բարիդրացիության գոյություն ունեցող հարաբերությունների ոգուն»: Արտաքին գործերի նախարարությունը նաև հայտարարեց, որ Ադրբեջանի տարածքում գտնվող բոլոր հուշարձանները «ադրբեջանական ժողովրդի և ադրբեջանական պետության ազգային ժառանգության անբաժանելի մասն են կազմում»:
Դրանից հետո Վրաստանի պաշտպանության նախարարը այցելում է Շուշի և մտադիր է ինչ-որ համաձայնագրեր ստորագրել Թուրքիայի և Ադրբեջանի հետ: Վրաց նախարարին, անշուշտ, ցույց տվեցին, թե ինչի էր վերածվել հայկական Ղազանցեցոց եկեղեցին «Ադրբեջանին վերադառնալուց» հետո, և ինչ ճակատագիր էր սպասվում վրացական եկեղեցիներին:
Արդյո՞ք Բաքուն և Անկարան խոստացան օգնել Թբիլիսիին վերականգնելու նրա տարածքային ամբողջականությունը:
Սեպտեմբերի 27-ին Վրաստանը նշեց Սուխումի կորստի 33-րդ տարեդարձը: Վրաստանի միասնության համար զոհված հերոսների հուշահամալիրում վարչապետ Իրակլի Կոբախիձեն ընդգծեց տարածքային ամբողջականության խաղաղ վերականգնման անհրաժեշտությունը։
«Մինչև վերջերս Եվրամիությունը որևէ փաստաթղթում կամ հայտարարության մեջ երբեք չէր հիշատակում, որ Ռուսաստանը օկուպացրել է Վրաստանի տարածքը, և Աբխազիան ու Ցխինվալիի շրջանը անվանում էր Վրաստանից անջատված տարածքներ։ Եվրամիությունը պետք է վերջապես հրաժարվի նման կրկնակի չափանիշներից և օկուպացիան անվանի «օկուպացիա», – ասաց Վրաստանի խորհրդարանի խոսնակ Շալվա Պապուաշվիլին։
Բաքվի լրատվամիջոցները հիշեցրին, որ ԵՄ-ն երբեք Արցախը չի անվանել օկուպացված տարածք։ «Վրացական իշխանությունները այսօր գիտակցում են, որ երկրի համար դժվար է հույսը դնել ԵՄ իրական օգնության վրա՝ իր տարածքային ամբողջականությունը վերականգնելու գործում», – հաղորդեցին Բաքվի լրատվամիջոցները։ Թեկուզ Վրաստանի իշխանությունները հույս ունեն «Աբխազիայի և Ցխինվալիի շրջանի խաղաղ վերադարձնել Վրաստանին»։