Արցախի ԱԳՆ հայտարարությունը

Սեպտեմբերի 19-ին Ադրբեջանի զինված ուժերը սանձազերծել են հերթական ռազմական ագրեսիան Արցախի Հանրապետության դեմ` խախտելով միջազգային իրավունքի սկզբունքները և 2020 թվականի նոյեմբերի 9-ի ռազմական գործողությունների դադարեցման մասին Եռակողմ հայտարարության դրույթները։ Մայրաքաղաք Ստեփանակերտը և այլ բնակավայրերը ներկայումս ենթարկվում են զանգվածային հրետանային և հրթիռային ռմբակոծության և օդային հարվածների։ Կան զոհեր, այդ թվում՝ քաղաքացիական բնակիչների շրջանում։

Արցախի Հանրապետության շարունակվող անօրինական շրջափակման ներքո Ադրբեջանի կողմից սանձազերծված ռազմական ագրեսիան անթաքույց ցեղասպանություն է և Արցախի ժողովրդի հիմնարար իրավունքների ժխտման ծայրահեղ արտահայտում։ Ադրբեջանի պաշտպանության նախարարությունն արդեն բացահայտորեն հայտարարել է Արցախի 120 հազար բնակչության բռնի տեղահանումն իրականացնելու մտադրության մասին, ինչը հավասարազոր է Արցախի ժողովրդին որպես այդպիսին և նրա ընհանրության և ամբողջականության ոչնչացմանը։

Ամբողջ երկիրը ենթարկելով անօրինական պաշարման և որպես պատերազմի մեթոդ օգտագործելով սովը՝ Ադրբեջանը որոշել է դիմել ուժի կիրառման՝ վստահ լինելով, որ չի հանդիպի միջազգային հանրության դիմադրությանը։ Ադրբեջանի իշխանությունները վերջին շաբաթներին հող էին նախապատրաստում այս ռազմական հարձակման համար՝ բացահայտ և կեղծ կերպով մեղադրելով Արցախին և Հայաստանին ռազմական սադրանքների մեջ։ Հարկ է ընդգծել, որ այդ կեղծիքներից ոչ մեկը չի հաստատվել ռուսական խաղաղապահ զորակազմի հաղորդագրություններով։

Արցախի դեմ Ադրբեջանի ռազմական ագրեսիան վերջինիս ցեղասպան գործողությունները և Արցախի՝ ավելի քան 9 ամիս շարունակվող ապօրինի շրջափակումը կասեցնելու ուղղությամբ միջազգային հանրության կողմից հավաքական միջոցների բացակայության ուղղակի հետևանքն է։ Անտեսելով Ադրբեջանի հանցավոր մտադրությունների մասին նախազգուշացումները և հրաժարվելով համապատասխան գործողություններից՝ բոլոր պատասխանատու միջազգային դերակատարները չկարողացան կանխել Ադրբեջանի կողմից Արցախի դեմ հերթական ագրեսիան։

Արցախի Հանրապետությունը պահանջում է միջազգային հանրությունից ձեռնարկել բոլոր անհրաժեշտ միջոցներն ադրբեջանական ռազմական ագրեսիայի շարունակությունը անհապաղ կասեցնելու և բնակչության անվտանգությունն ապահովելու ուղղությամբ։ Ցեղասպանության հանցագործության կանխարգելումը յուրաքանչյուր պետության, ներառյալ ներգրավված դերակատարների պարտականությունն է: Անգործությունը նպաստում է հանցագործության կատարմանը։

«Իրանի Իսլամական Հանրապետությունը Լեռնային Ղարաբաղը համարում է Ադրբեջանի Հանրապետության մաս և կարծում է, որ նրա խնդիրները, այդ թվում՝ բնակիչների իրավունքները և անվտանգությունը, պետք է լուծվեն այս շրջանակում և երկխոսության միջոցով», հայտարարել է Իրանի ԱԳՆ խոսնակ Քանաանին։

Քանաանին ընդգծել է տարածաշրջանի երկրների դերը վեճերի խաղաղ ճանապարհով լուծմանը նպաստելու գործում և հիշեցրել Իրանի Իսլամական Հանրապետության պատրաստակամությունը՝ այդ հարցով 3+3 ձևաչափով հանդիպում անցկացնելու մասին։

Լեռնային Ղարաբաղում տիրող իրավիճակի շուրջ ՄԱԿ Անվտանգության խորհրդի նիստը նախատեսված է անցկացնել սեպտեմբերի 21-ին, ՏԱՍՍ-ին հայտնել է ՄԱԿ-ում նրա դիվանագիտական աղբյուրը։

«Նիստը հինգշաբթի պետք է կայանա», ասել է աղբյուրը։ Նա նշել է, որ Արցախի հարցով ՄԱԿ ԱԽ նիստը Նյու-Յորքի ժամանակով՝ օրվա երկրորդ կեսին է անցկացվելու։

Թուրքիան աջակցում է Ադրբեջանի ռազմական գործողությանը Լեռնային Ղարաբաղում, հայտարարել է Թուրքիայի նախագահ Ռեջեփ Թայիբ Էրդողանը։

«Մենք ի սկզբանե աջակցել ենք Ադրբեջանի և Հայաստանի միջև բանակցային գործընթացին, սակայն Հայաստանը, մեր կարծիքով, պատշաճ չի գնահատել պատմական այդ շանսը։ Ակնկալում ենք, որ Հայաստանն իր կողմից ավելի վաղ տրված խոստումները՝ կապված  առաջին հերթին «Զանգեզուրի միջանցքի» բացման հետ, կիրականացնի»,- հայտարարել է Էրդողանը՝ ՄԱԿ-ի Գլխավոր ասամբլեայում իր ելույթի ժամանակ։

«Մենք աջակցում ենք Ադրբեջանի գործողություններին, որոնք իրականացվում են նրա տարածքային ամբողջականությունը պաշտպանելու նպատակով»,- հավելել է Էրդողանը։

Ռուսաստանի դեսպատան դիմաց ցույց է, բախումներ են տեղի ունեցել բողոքի ակցիա իրականացնող քաղաքացիների և ոստիկանների միջև։ Բողոքի ակցիայի մասնակիցները Արցախի մեծ դրոշ են պարզել դեսպանատան դիմաց, փակել շենքի բոլոր մուտքերը։ Քաղաքացիները Ռուսաստանից պահանջում են դադարեցնել Ադբեջանի ցեղասպանական գործողություններն Արցախի խաղաղ բնակչությանդեմ։

Արցախի 6 համայնքների՝ Խրամորթ, Խնաբադ, Սառնաղբյուր, Նախիջևանիկ, Մաճկալաշեն, Ճանկաթաղ քաղաքացիական բնակչությունը տարհանվել է։ Այդ մասին հայտնում է ԱրցախԻնֆո-ի  տելեգրամյան ալիքը։