«Երուսաղեմում հայկական համայնքի վրա պարբերաբար հարձակումներ են լինում քարերով, մարդիկ կազմել են տեղական ջոկատներ, որ պաշտպանեն հայապատկան հողերը։ Մենք այնտեղ բացառիկ ժառանգություն ունենք, աշխարհում երկրորդը չկա։ Երուսաղմեի հայ համայնքն ակնկալում է, որ ՀՀ արտաքին գործերի նախարարությունը կամ դեսպանությունը դրան կարձագանքեն։ Բայց միակ կողմը, որին առնչվում է սա, որը լիազորություններ ունի, լայաղ չի արել անգամ հայտարարություն տարածել։ Կարո՞ղ ենք իմանալ՝ ինչո՞ւ այս առնչությամբ պաշտոնական հայտարարություն չի եղել, դիրքորոշում չի հնչել եւ հայերի ու հայկական բացառիկ ժառանգության շահերը չեն պաշտպանվել»,- Ազգային ժողովում ԱԳ նախարար Արարատ Միրզոյանին հարցրեց «Հայաստան» խմբակցության պատգամավոր Քրիստինե Վարդանյանը։

Ի պատասխան՝ Արարատ Միրզոյանը նշեց, որ խնդիրը պատրիարքարանի դաշտում է, կա դատական գործընթաց։ «Եթե դուք «Կովերի պարտեզի» մասին եք խոսում, կա հողակտոր, որը պատկանում է մի իրավաբանական անձի, տվյալ դեպքում՝ Երուսաղեմի պատրիարքարանին։ Պատրիարքարանը վարձակալության է հանձնել այս տարածքն ինչ-որ մեկին, հետո փոշմանել է, եւ հիմա կա դատական գործընթաց։ Ես ձեզ վստահեցնում եմ՝ մենք աշխարհի որ անկյունում էլ լինի, ՀՀ քաղաքացիների նկատմամբ ուշադիր ենք։ Եթե նրանց շահերը ոտնահարվում են, մենք անում ենք համապատասխան գործողություններ, եթե անհրաժեշտություն է լինում, Աստված մի արասցե, կազմակերպել էվակուացիա, մենք կազմակերպում ենք»,- ասաց Միրզոյանը։

ԱԺ «Պատիվ ունեմ» խմբակցության պատգամավոր Հայկ Մամիջանյանը լրագրողների հետ ճեպազրույցում անդրադարձավ ԱԳ նախարար Արարատ Միրզոյանի հայտարարությանը, թե ՀՀ արտաքին քաղաքականության օրակարգում Ցեղասպանության ճանաչման հարցը առաջնահերթություն չէ։

«Այն փաստը, որ իրենք Սահմանադրությունը ու ՀՀ օրենքները չեն հարգում, դա նորություն չէ։ Նաեւ նորություն չէ, որ իրենց իսկ գրած ծրագրերը չեն հարգում, մասնավորապես, կառավարությանբ ծրագիրը։ Այդպես եղավ այն ժամանակ, երբ իրենք նախընտրական ու հետագայում կառավարության ծրագրում գրեցին, որ Հադրութն ու Շուշին ազատագրելու են, Ղարաբաղի հակամարտության սկզբունքները կարգավորելու են երեք հիմնական սկզբունքների հիման վրա եւ հանձնեցին Արցախը։ Հիմա նույն պատմությունը Հայոց Ցեղասպանության ճանաչման հետ կապված է, որովհետեւ թե իրենց ծրագրում է դա նշված, թե ՀՀ ազգային անվտանգության ռազմավարության մեջ։ Բայց այսօր ՀՀ ԱԳ նախարարն ասում է, որ նման առաջնահերություն ՀՀ-ն չունի։ Երբ տարիներ առաջ ասում էինք՝ Նիկոլ Փաշինյանն ու ՔՊ-ն գալիս են իշխանության՝ Արցախը հանձնելու եւ Ցեղասպանության հարցը մոռացության մատնելու համար, հիմա երկուսն էլ, ցավոք սրտի, իրողություն են»,- ասաց Մամիջանյանը։

Նա նշեց, որ ԱԳՆ-ն վերջին տարիներին Ցեղասպանության միջազգային ճանաչման ուղղությամբ ոչ մի քայլ չէր էլ անում։ «Ուղղակի հայտարարել, որ չեն էլ անելու, դա արդեն ցինիզմի գագաթնակետն է։ ՀՀ ԱԳ նախարարը հայտարարում է, որ Ցեղասպանության ճանաչման հարցը օրակարգային առաջնահերթություն չէ, դրան կարող է հետեւել ինչ ասես։ Դա դավաճանության հասնող ցինիզմ է, դա մեկ նոտա չէ, դա արդեն երգ է։ Հաջորդը, թե ինչ ազգային օրակարգերից են հրաժարվելու ՔՊ-ականները, ես չեմ պատկերացնում։ Կարող է իրենք արդեն դիմեն ՅՈՒՆԵՍԿՕ-ին ու ասեն, որ Արցախում մնացած հայկական մշակութային ու կրոնական կոթողներն անհրաժեշտ չէ պաշտպանել։ Խնդիրն այն քաղաքական մեսիջն է, որը փոխանցվում է Թուքիային ու աշխարհին»,- հավելեց նա։

ԱԺ «Պատիվ ունեմ» եւ «Հայաստան» խմբակցությունները նախաձեռնելու են ԱԺ հրատապ նիստ, իրականացվում է ստորագրահավաք։ Այս մասին լրագրողների հետ ճեպազրույցում ասաց «Պատիվ ունեմ» խմբակցության պատգամավոր Հայկ Մամիջանյանը։

«Հրատապ նիստի նպատակն է առաջարկել Ազգային ժողովին՝ ընդունել հայտարարություն, որն ուղղված կլինի Հայաստանի կառավարիչերին, միջազգային հանրությանը եւ Ադրբեջանին՝ կապված Բաքվում անօրինաբար պահվող հայ գերիների, այդ թվում՝ Արցախի ռազմաքաղաքական առաջնորդներին ազատ արձակելու հարցի հետ։ Տեսնենք, թե ինչպես ՔՊ-ն իրեն կպահի հայ գերիների վերադարձի վերաբերյալ հայտարարության քննարկման եւ ընդունման համատեստում։ Խոսքը գնում է ԱԺ հայտարարության նախագծի մասին, այլ ոչ թե երկու խմբակցությունների։ Առաջարկում ենք ԱԺ-ին ընդունել հայտարարություն, առնվազն զարմանալի կլինի, եթե ՀՀ ԱԺ-ն չընդունի հայ գերիների վերադարձի վերաբերյալ հայտարարությունը»,- ասաց Մամիջանյանը։

Ազգային ժողովում «Հայաստան» խմբակցության պատգամավոր Արմեն Ռուստամյանը հարցրեց Արտաքին գործերի նախարար Արարատ Միրզոյանին․ «Արցախյան հակամարտության կարգավորման հարց արտգործնախարարության օրակարգում գոյություն ունի՞, թե՞ ոչ։ Հայոց Ցեղասպանության միջազգային ճանաչման հարց ԱԳՆ օրակարգում գոյություն ունի՞, թե՞ ոչ»։

«Երբ ասում եք Լեռնային Ղարաբաղի հակամարտություն, մենք հասկանում ենք այն ամբողջ կոնֆլիկտը, որը եղել է եւ քանի դեռ պայմանագիրը ստորագրվա՞ծ չէ Հայաստանի ու Ադրբեջանի միջեւ, ես լավ չեմ հասկանում։ Այսինքն՝ բոլորս ունենք մեր պատերացումները։ Որպեսզի կարողանանք հարցադրումները ճիշտ հասկանալ ու պատասխանել, պետք է շատ հստակ ձեւակերպումներ անենք։ Ես մի բան եմ հասկանում՝ Լեռնային Ղարաբաղի հակամարտություն ասելով, դուք կարող է մեկ այլ բան։ Մենք զբաղվում ենք այս պահին, եւ այդ մեր զբաղվելիքը ունի հետեւյալ վերնագիրը՝ Ադրբեջանի հետ հարաբերությունների կարգավորում»,- ասաց Արարատ Միրզոյանը։

Հայոց Ցեղասպանության միջազգային ճանաչման հարցին անդրադառնալով, ԱԳ նախարարը նշեց․ «Ինչպես կարող եք ենթադրել նրանից, որ ես առաջնահերթությունները թվարկելիս դրան առանձին չանդրադարձա, դա մեր թիվ մեկ առաջնահերթությունը չէ։ Եվ պատմության ողբերգական անցքերը՝ Հայոց Ցեղասպանությունն ուսումնասիրելը կամ դա թիվ մեկ առաջնահերթություն դարձնելը, անշուշտ, արտաքին գործերի նախարարության օրակարգը չէ»։

Միրզոյանը հավելեց․ «Իմ պարտականությունն է այնպես անել, որ Հայաստանի Հանրապետության քաղաքացիներն ապրեն անվտանգ ՀՀ 29 743 քառակուսի կիլոմետր ինքնիշխան եւ ապահով տարածքում։ Ես որեւէ նախադասություն, որեւէ քայլ, որեւէ հանձնարարություն կամ ուղերձ բխեցնում եմ միմյան այդ պատկերացումից ու պարտականությունից։ Ես իրավունք չունեմ, թույլ տալ, որ սենտիմենտները մեզ առաջնորդեն, դուք կարող եք դա ձեզ թույլ տալ»։