Մենեջմենթ Միքսը Կարմիր խաչի միջազգային կոմիտեի (ԿԽՄԿ) և Հայկական կարմիր խաչի ընկերության կազմակերպած Մարդասիրական բիզնես օգնության ծրագրի շրջանակներում Լեռնային Ղարաբաղից տեղահանված անձանց համար անցկացնում է դասընթացներ` օգնելու նրանց նախաձեռնությանը ճիշտ ձևով իրականացնելու և ձեռք բերելու հիմնարար բիզնես հմտություններ:
Month: Հունվար 2025
Բայդենը ներում է շնորհել ընտանիքի անդամներին նախագահության վերջին պահերին
ԱՄՆ նորընտիր նախագահ Դոնալդ Թրամփի երդմնակալության օրը ամերիկացի առաջնորդ Ջո Բայդենը ներում է շնորհել սեփական ընտանիքի անդամներին, հայտնել է Սպիտակ տան մամուլի ծառայությունը։ Սա նրա վերջին որոշումն է որպես նախագահի։
«Իմ ընտանիքը ենթարկվել է անողոք հարձակումների և սպառնալիքների՝ դրդված բացառապես ինձ վիրավորելու ցանկությամբ: Ցավոք, ես հիմքեր չունեմ հավատալու, որ այդ հարձակումները կդադարեն»,- ասել է Բայդենը։
Նրանց թվում են նրա եղբայրը՝ Ջեյմս Բայդենը և նրա կինը՝ Սառան, նրա քույրը՝ Վալերի Բայդեն Օուենսը և նրա ամուսին Ջոն Թ. Օուենսը, և մեկ այլ եղբայր՝ Ֆրենսիս Բայդենը: «Այս ներումների տրամադրումը չպետք է ընդունվի որպես մեղքի ընդունում որևէ հանցագործության մեջ», – ասվում է ԱՄՆ հեռացող նախագահի հայտարարության մեջ։
Առավել մանրամասն՝ այստեղ
Պուտինը «ոչնչացնում է» ՌԴ-ը՝ հրաժարվելով պատերազմին վերջ դնելու գործարքից. Թրամփ
Ազատություն
ԱՄՆ նախագահ Դոնալդ Թրամփը հայտարարել է, որ Կրեմլի առաջնորդ Վլադիմիր Պուտինը «ոչնչացնում է» Ռուսաստանը՝ հրաժարվելով գործարք կնքել Ուկրաինայի պատերազմին վերջ տալու համար՝ հավելելով, որ շուտով կարող է խոսել Պուտինի հետ՝ առանց ժամկետ նշելու։
«Նա պետք է գործարք կնքի: Կարծում եմ՝ նա կործանում է Ռուսաստանը՝ գործարք չգնալով», – ասել է Թրամփը հունվարի 20-ին լրագրողներին՝ իր երդմնակալության արարողությունից հետո:
«Կարծում եմ, որ Ռուսաստանը մեծ դժվարության մեջ է հայտնվելու: Կարծում եմ, որ նա շատ լավ կլիներ, որպեսզի վերջ դնի այդ պատերազմին»», – ասել է Թրամփը:
ԱՄՆ նախագահն ասել է, որ ինչ-որ պահի կխոսի Պուտինի հետ, առանց նշելու ժամանակը. – «Հուսով եմ, որ նա կցանկանա գործարք կնքել»:
Թրամփը նաև նշել է՝ Ուկրաինայի նախագահ Վլադիմիր Զելենսկին իրեն ասել է, որ ցանկանում է խաղաղ համաձայնագիր կնքել պատերազմին վերջ տալու համար։
Վերլուծաբաններն ասում են, որ մոտ ժամանակներս դժվար կլինի դադարեցնել պատերազմն Ուկրաինայում, քանի որ Ռուսաստանի նախագահ Վլադիմիր Պուտինը կարծում է, որ ինքը հաղթում է և մարտերը դադարեցնելու խթան չունի:
12 էպիզոդ՝ Արցախի բնակավայրերի ու կարոտի մասին
«Տանան նիգյարան» փոդքասթի շարքը Անուշ Պետրոսյանը սկսեց իր տնից շատ հեռու՝ Երեւանում։
Երկու անգամ տեղահանվելով՝ Շուշիից եւ հետո Ստեփանակերտից, Անուշը ապրում էր տան կարոտով ու տան մասին հուշերով։
«Արցախում աշխատանքի բերումով շատ էի գյուղեր գնում, գյուղական առօրյան ու մարդկային պարզությունը ինձ շատ էր գրավում», – նշում է Անուշն ու ավելացնում, որ տեղահանությունից հետո այդ գյուղերի մասին պատմությունները կորստի առաջ են կանգնած։
Անուշն ասում է, որ ինքն անգամ այդքան շրջելով Արցախում, հասկացել էր, որ կան բնակավայրեր, որոնց մասին գրեթե տեղեկություն չուներ։
Իր տասներկու էպիզոդներում անդրադարձել է մի քանի բնակավայրի՝ կոլորիտային կերպարներով, կարոտով ու ավանդազրույցներով։
«Մասնակցել եմ Մեդիա նախաձեռնությունների կենտրոնի կազմակերպած դասընթացին, որի ընթացքում ստացել եմ գիտելիքներ փոդքասթի մասին, բայց պայմանավորվածություն ենք ձեռք բերել վեց էպիզոդի համար: Այնքան սիրեցի ու կարեւորեցի այս շարքը, որի իմ միջոցներով եւս վեց էպիզոդ նկարեցի, բայց էլ շարունակել չէի կարող»,-ասում է Անուշը։
Ամեն էպիզոդից առաջ հնարավորինս ուսումնասիրում էր բնակավայրը, ամեն անգամ մի նոր բացահայտում անում։
««Նիգյարան» բառը դժվար է «թարգմանվում», բացատրում եմ՝ մտահոգ, անհանգիստ, տունը կարոտելով, բայց միեւնույն է գրական համարժեքը չկա»,- ասում է Անուշը։
Երազում է մի օր հնարավորություն ունենա շարունակել փոդքասթի շարքը, անդրադառնա Արցախի բոլոր գյուղերին։
«Չեմ կարող նկարագրել, ինչ էր նշանակում նախագիծն ինձ համար։ Չնայած երկու անգամ եմ տեղահանվել, շատերի պես չեմ մնացել այստեղ, այլ վերադարձել եմ Արցախ, մինչեւ վերջին օրը ապրել եմ Ստեփանակերտում, բայց Էլի կիսատության զգացում ունեի։ Փոդքասթով այդ կիսատությունն էի ուզում լրացնել, բայց զգացողությունս չի փոխվե»,- ասում է Անուշն ու կիսվում իր ամենակարեւոր մտահոգությամբ։
Մտածում է՝ հաջորդ սերունդներն ի՞նչ կիմանան Արցախի գյուղերի մասին, ոչ նյութայան մշակութային ժառանգության, երբ ամեն կերպ բարբառն էլ է դուրս մղվում եւ խուսափում են անգամ Արցախ բառն ասել։
Մարիամ Սարգսյան
Մովսես Սարգսյանը ցանկանում է տրամադրված հավաստագրով բնակարան ձեռք բերել․ առաջացել են խնդիրներ
Այսօր արցախահայության համար առաջնային է շարունակում մնալ բնակապահովման խնդիրը։ ՀՀ կառավարության Արցախից բռնի տեղահանվածների բնակարանաշինության, բնակարանային ապահովման ծրագիրը 2024 թվականի հունիսի 15-ից է մեկնարկել։ Ծրագրին մասնկացելու գլխավոր պայմանը ՀՀ քաղաքացիություն ունենալը և ծրագրի շահառու լինելն է։ Ծրագիրն իրականացվում է 3 փուլով։
Մովսես Սարգսյանն Արցախից է տեղահանվել։ Նրա ընտանիքը ծրագրի շահառու է հանդիսանում։ Տեղահանությունից հետո, ստանալով ՀՀ քաղաքացիություն, ընտանիքի 2 անձի կազմով ստացել է բնակարան ձեռք բերելու հավաստագիր։
-2020 թվականին եմ Հայաստանից տեղափոխվել Արցախ և ծնողներիս հետ հաստատվել Ստեփանակերտ քաղաքում՝ հաշվառվելով Արցախում։ Արցախյան վերջին երեք պատերազմների մասնակից եմ։ Քառօրյա պատերազմից հետո ծառայում էի ՀՀ ՊՆ Ջերմուկի զորամասում։ 2022-ին տեղափոխվել եմ ԱՀ ՊԲ՝ ծառայությունս շարունակելով Ասկերանի զորամասում։ Այդ ընթացքում արդեն բնակություն էի հաստատել Ասկերանի շրջանի Շոշ համայնքում, որտեղ ինձ բնակելի տուն էր հատկացվել։
Մինչև շրջափակումը հորս առողջական վիճակի վատթարացման պատճառով նրան տեղափոխել եմ քաղաք Երևան, իսկ ինքս ռուս խաղաղապահների միջոցով վերադարձել Արցախ ու անցել իմ ծառայությանը։ 2023-ի սեպտեմբերի 19-ին մարտական դիրքերում էի։ Պատերազմի ավարտից հետո, երբ ցանկանում էի գնալ գյուղ, ասացին, որ այն արդեն թշնամու ձեռքին է։ Այդպես էլ ոչինչ չկարողացա վերցնել տանից։ Համագյուղացիներից լսեցի, որ ռմբակոծության հետևանքով իմ տունը լրիվությամբ այրվել է։ Սեպտեմբերի 23-ին դուրս եկա Արցախից և հասնելով Հայաստան՝ հաստատվեցի Էջմիածին քաղաքում։ Այնտեղ մեզ տրամադրվեց փոքրիկ տնակ,- պատմում է Մովսեսը և ավելացնում, – ապրում ենք 5 հոգով՝ հայրս, մայրս, եղբայրս և կինս։ Ամուսնացել եմ տեղահանությունից հետո։
Հայաստանում հաստատվելուց հետո Մովսեսը կրկին անցել է ծառայության և այժմ ծառայում է ՀՀ ՊՆ շարքերում։ Մովսեսը, աշխատանքի բերումով, ստիպված առանձին բնակարան է վարձակալել, սակայն մտադիր է ընտանիքը միավորել և այդ պատճառով ցանկանում է ՀՀ կառավարության արցախցիների բնակապահովման ծրագրի շրջանակներում տրամադրված հավաստագրով բնակարան ձեռք բերել։
-Մեր ընտանիքից ծրագրի շահառու ենք հանդիսացել միայն ես ու հայրս, քանի որ մայրս ու եղբայրս այդ ժամանակ Արցախում չէին։ Թեև իմ ընտանիքն ընդգրկվում է 3-րդ փուլում, սակայն ընդառաջելով ինձ, թույլատրվեց ստանալ հավաստագիր։ Քանի որ 6 մլն դրամով չեմ կարող տուն գնել, պարզ է, որ պետք է գումարի պակասող մասը լրացնեմ հիպոթեքային վարկով։ Փորձել եմ բանկերից ճշտել․ արդյո՞ք ինձ վարկ կտրամադրվի։ Պարզվել է, որ ես սև ցուցակում եմ՝ մինչև 2020 թվականն ստացած և չվճարված վարկի պատճառով։ Վարկն ստացել էի Հայաստանում և չէի կարողացել վերադարձնել։ Այժմ ևս ի վիճակի չեմ։
Խնդրի լուծման համար դիմել եմ ՀՀ Վարչապետի աշխատակազմ։ Սպասում եմ պատասխանին։ Եթե հարցը լուծում չստանա, ես ստիպված կլինեմ վերադարձնել հավաստագիրը և սպասել 3-րդ փուլին։ Թե ինչ կլինի այն ժամանակ՝ դժվարանում եմ ասել։ Երևի նույն վիճակը, եթե բնակարանային ծրագրում փոփոխություններ չկատարվեն։ Ես մտադիր եմ Երևան քաղաքում կառուցվող փայտե տներից ձեռք բերել, որոնք քիչ թե շատ մատչելի են արցախահայության համար, – ասում է Մովսես Սարգսյանը։
Կարինե ԲԱԽՇԻՅԱՆ
Դոնալդ Թրամփը խոստանում է «ոսկե դար» Ամերիկայի եւ փոփոխություններ՝ աշխարհի համար
Ամերիկայի ոսկե դարն այժմ սկսվում է. Այս մասին հունվարի 20-ին երդմնակալության արարողության ժամանակ հայտարարել է Միացյալ Նահանգների 47-րդ նախագահ Դոնալդ Թրամփը։
«Այս օրվանից մեր երկիրը բարգավաճելու է և կրկին հարգանքի է արժանանալու ամբողջ աշխարհում։ Բոլոր պետությունները կնախանձեն մեզ, մենք թույլ չենք տա մեզ օգտագործել իրենց շահերի համար։
Մենք այնպես կանենք, որ Ամերիկան միշտ առաջին տեղում լինի։ Մեր սուվերեն պարտքը կմարվի, մեր անվտանգությունը կվերականգնվի.
Մեր հիմնական խնդիրն է ստեղծել մի պետություն, որը կբարգավաճի, Ամերիկան կդառնա էլ ավելի մեծ, նույնիսկ ավելի հզոր, քան պատմության ցանկացած ժամանակ։
Մենք սկսում ենք ազգային հաջողության նոր դարաշրջան, փոփոխությունների ալիք է գալիս մեր երկիր, և այն կտարածի աշխարհով մեկ:
Ամերիկան կօգտագործի այդ հնարավորությունները, ինչպես երբեք պատմության մեջ:
Բայց նախ պետք է վերլուծել մեր առջեւ ծառացած խնդիրները։ Դրանք շատ են, բայց մենք կկարողանանք հաղթահարել դրանք, ինչը թույլ կտա մեզ վերադարձնել ԱՄՆ-ի մեր հպարտ անունը։
Իսթեբլիշմենթը խլել է իշխանությունը մեր ժողովրդից, մեր հասարակության կառուցվածքն է քանդվել։
Մենք ունեինք կառավարություն, որը չկարողացավ հաղթահարել մեր երկրի ներսում առկա ճգնաժամը։ Կարելի է թվարկել նաև արտասահմանում տեղի ունեցած աղետալի իրադարձությունների մի ամբողջ շարք»,- նշեց նա։
Այսօր ես կստորագրեմ մի շարք պատմական գործադիր հրամաններ, որոնք կսկսեն Ամերիկայի ամբողջական վերականգնումը, ասել է Թրամփը։
Այսօր ես կստորագրեմ մի շարք պատմական գործադիր հրամաններ, որոնք կսկսեն Ամերիկայի ամբողջական վերականգնումը, ասել է Թրամփը։
«Առաջին հերթին ես համազգային արտակարգ դրություն եմ հայտարարելու մեր հարավային սահմանին։
ԱՄՆ բոլոր անօրինական ներթափանցումները կդադարեն, և կսկսվի միլիոնավոր հանցագործ տարրերի վերադարձը այնտեղ, որտեղից նրանք եկել են:
«Ես զորքեր կուղարկեմ մեր հարավային սահման՝ հետ մղելու մեր երկիր այս ներխուժումը, որն իսկական աղետ է դարձել», – հավելել է Թրամփը։
Իր երդմնակալությունից անմիջապես հետո Թրամփը ստորագրել է շուրջ 100 գործադիր հրամաններ՝ կատարելով իր նախընտրական խոստումները։
Օրինակ՝ անօրինական ներգաղթի դեմ պայքարի շրջանակներում Թրամփը, ինչպես խոստացել էր, արտակարգ դրություն հայտարարեց ԱՄՆ հարավային սահմանին՝ հեշտացնելով անօրինական ներգաղթյալների զանգվածային արտաքսումը։ Նա նաև վերջ դրեց «բռնել և ազատ արձակել» պրակտիկային, որով իրավապահներն ազատում էին միգրանտներին, մինչ նրանք սպասում էին ներգաղթի դատական նիստերին: Թրամփի հրամանները կասեցրեցին փախստականների վերաբնակեցման ծրագրերը և չեղյալ համարեցին միգրանտ երեխաների՝ ԱՄՆ քաղաքացիություն ստանալու իրավունքը՝ ելնելով ԱՄՆ-ում նրանց ծննդյան իրավունքից:
Միացյալ Նահանգների էներգետիկ հատվածը զարգացնելու համար հանրապետականը հրամայեց «առավելագույնի հասցնել» բնական ռեսուրսների արդյունահանումն ու արտադրությունը, ինչպիսիք են նավթն ու գազը, և արագացնել հարակից նախագծերի հաստատումը: Նա մեկնարկեց գլոբալ տաքացումը սահմանափակող Փարիզի կլիմայի համաձայնագրից դուրս գալու գործընթացը և հրամանագիր ստորագրեց, որով վերջ դրեց ԱՄՆ-ի բոլոր ֆինանսական պարտավորությունները Կլիմայի փոփոխության մասին ՄԱԿ-ի շրջանակային կոնվենցիայով:
Թրամփը նաեւ ներում է շնորհել Կապիտոլիում ներխուժածներին։
ԱՄՆ նախագահ Դոնալդ Թրամփը հայտարարել է Պանամայի ջրանցքի նկատմամբ ԱՄՆ վերահսկողությունը վերականգնելու մտադրության մասին։
Նրա խոսքով՝ Պանամայի ջրանցքից հրաժարվելու որոշումը սխալ էր։
Թրամփը բացատրել է, որ ամերիկյան նավերը ներկայումս գերվճարում են Պանամայի ջրանցքով անցնելու համար, այդ թվում՝ ռազմածովային ուժերի նավերը։ Նրա խոսքով՝ ջրանցքը վերահսկվում է Չինաստանի կողմից։ «Մենք այն չենք տվել Չինաստանին, մենք տվել ենք այն Պանամային: Եվ մենք այն հետ ենք վերցնում»:
Հայաստանը Թուրքիային է արտահանձնել երկու անձի, հայտնի են անունները
Արձագանքելով Ինտերպոլի Կարմիր ծանուցմամբ ներկայացված խնդրանքին` 2025 թվականի հունվարի 19-ին Հայաստանը Թուրքիային է արտահանձնել երկու անձի, որոնք Թուրքիայում ներգրավված են եղել կազմակերպված հանցավորության մեջ: Այս մասին հայտարարություն է տարածել ՀՀ ԱԳՆ-ն:
Այլ մանրամասներ չեն հաղորդվում:
Թուրքական լրատվամիջոցների փոխանցմամբ՝ արտահանձնվել են կազմակերպված հանցավոր խմբավորման առաջնորդ Էրքան Յըլմազն ու կազմակերպության անդամ Իբրահիմ Քայմակը։
Ստեղծվել է «Հանուն Արցախի» միավորումը
Արցախյան հասարակական կազմակերպություններն ու անհատները միավորվել են՝ ստեղծելով «Հանուն Արցախի» միավորումը։ Այսօր միավորումը համաժողով անցկացրեց։
Կոչ հնչեց, որ այսքան կորուստներից հետո գոնե հիմա պետք է համախմբվել, անձնական ամբիցիաները դնել մի կողմ ու պետականամետ մտածելակերպ դրսեւորել։
Արցախի «Նախնյաց հետքերով» ՀԿ նախագահ Սայիդա Պողոսյանը ասաց, որ պետք է միավորվել։ «Ամեն ինչ կորսված չէ, ամեն ինչ դեռ առջեւում է, Արցախի ժամանակավոր կորուստ ունենք, բայց պետք է պայքարենք։ Ամենքս մեզ վրա պետք է մի փոքր պատասխանատվություն վերցնենք ու առաջ գնանք։ Առանց պատասխանատվության ոչնչի չենք հասնի։ Մեր հնարավորությունների շրջանակներում պայքարելու ենք հանուն Արցախի։ Մեծ նպատակներ ունենալու համար մեզ անհրաժեշտ են փոքր հաղթանակներ, ես համարում եմ, որ սա արդեն մեծ հաղթանակ է, որ կարողացել ենք արցախցիներով հավաքվել ու գալ համաձայնության։ Այնպես որ, հանուն Արցախի պետք է միավորվենք»,- ասաց նա։
«Հանուն Արցախի» միավորման անդամները հայտարարում են, որ համախմբված ու համակարգված գործունեություն են սկսում՝ հանուն միասնական նպատակների։
Նպատակներն են՝
- Արցախի ժողովրդի հավաքական վերադարձ Արցախ եւ նրա անվտանգ, արժանապատիվ, ինքնորոշված ու կայուն կյանքի ապահովում իր պատմական հայրենիքում։
- Արցախից բռնի տեղահանված անձանց իրավունքների պաշտպանություն ու սոցիալական խնդիրների կարգավորում Հայաստանի Հանրապետությունում ու միջազգային հարթակներում։
- Արցախի ժողովրդի դեմ իրականացված հանցագործությունների մեղավորներինին անհատական ու ինստիտուցիոնալ պատասխանատվության ենթարկում։
- Ադրբեջանական բռնազավթման տակ գտնվող Արցախի ժողովրդի մշակութային ժառանգության, հանրային ու մասնավոր սեփականության պաշտպանություն։
Հայաստանը ՄԻԵԴ կներկայացնի Ադրբեջանում հայ գերիների վերաբերյալ նոր ապացույցներ և պահանջներ
Ադրբեջանում պահվող հայ ռազմագերիների եւ քաղաքացիական անձանց նկատմամբ հարուցված քրեական գործերով դատաքննության մեկնարկի առնչությամբ Միջազգային իրավական հարցերով ներկայացուցչի գրասենյակը հիշեցման կարգով հայտնում է, որ դեռեւս 2022 եւ 2024 թվականներին Հայաստանի Հանրապետության կողմից՝ Ադրբեջանում ապօրինաբար մեղադրվող բոլոր հայ ռազմագերիների եւ քաղաքացիական անձանց արդար դատաքննության, ազատության և անձնական անձեռնմխելիության իրավունքների պաշտպանությանն ուղղված երկու միջպետական գանգատ է ներկայացվել Մարդու իրավունքների եվրոպական դատարան։ Հայտնում են գրասենյակից:
ՄԻՀՆ գրասենյակը հետեւում է նաեւ այս օրերին Ադրբեջանում ընթացող դատավարություններին։
«Ցանկանում ենք տեղեկացնել, որ ըստ սահմանված ընթացակարգի եւ ժամկետների Եվրոպական դատարան կներկայացվեն անհրաժեշտ լրացուցիչ ապացույցներ եւ պահանջներ»,-ասվում է հայտարարությունում։
TikTok-ը դադարեցրել է գործունեությունը ԱՄՆ-ում
ԱՄՆ-ում ուժի մեջ է մտել օրենք, ըստ որի՝ երկրում անվտանգության նկատառումներից ելնելով արգելված է հանրահայտ TikTok սոցիալական ցանցը։ Նախկինում չինական ByteDance ընկերությունը համաձայնել էր վաճառել հարթակը արգելքից խուսափելու համար։
Ծառայությունը դադարեցրել է գործունեությունը ԱՄՆ-ում մինչև արգելքի ուժի մեջ մտնելը: Հավելվածը բացելիս օգտատերերը տեսնում են հաղորդագրություն, որ TikTok-ն անհասանելի է:
«ԱՄՆ-ն օրենք է ընդունել, որն արգելում է TikTok-ը։ Ցավոք, սա նշանակում է, որ դուք դեռ չեք կարող օգտագործել TikTok-ը: Լավ է, որ նախագահ Թրամփը հասկացրել է, որ ինքը կաշխատի մեզ հետ TikTok-ը վերականգնելու լուծման վրա, երբ նա ստանձնի պաշտոնը: Խնդրում ենք հետևել թարմացումներին»,- ասվում է հավելվածի հաղորդագրության մեջ։
Նախօրեին Դոնալդ Թրամփը NBC News-ին և ABC-ին ասել էր, որ մտադիր է TikTok-ին 90-օրյա հետաձգում տրամադրել։ ԱՄՆ ընտրված նախագահը խոստացել է համապատասխան հայտարարություն անել երդմնակալությունից հետո։
Իսրայելի և ՀԱՄԱՍ-ի հրադադարը խզվե՞լ է, թե՞ հետաձգվել է մինչև Թրամփի երդմնակալությունը
Իսրայելի պաշտոնյաները հայտնել են, որ հրադադարը, որը նախատեսվում էր սկսել հունվարի 19-ին ժամը 06:30-ին (տեղական ժամանակով 08:30-ին), հետաձգվում է այնքան ժամանակ, մինչև Իսրայելը ՀԱՄԱՍ-ից չստանա բոլոր 33 պատանդների անունները, որոնք պետք է ազատվեն առաջին փուլում: Այս մասին հայտարարել է Իսրայելի պաշտպանության բանակի խոսնակ Դանիել Հագարին։ ՀԱՄԱՍ-ը նշում է, որ չի կարողացել ժամանակին տրամադրել ամբողջական ցուցակը «տեխնիկական» խնդրի պատճառով։
Հագարին ասել է, որ ՀԱՄԱՍ-ը չի կատարել հրադադարի պայմանները:
Կատարի, Եգիպտոսի և ԱՄՆ-ի միջնորդությամբ Իսրայելի և ՀԱՄԱՍ-ի միջև կնքված գործարքի համաձայն, 2023 թվականի հոկտեմբերի 7-ին իսրայելցի պատանդների փոխանակումը իսրայելական բանտերում պահվող պաղեստինցիների հետ պետք է սկսվեր հունվարի 19-ին: 33 պատանդների դիմաց Իսրայելը խոստացել է բանտից ազատել ավելի քան 700 պաղեստինցիների։ Ընդհանուր առմամբ, ՀԱՄԱՍ-ի գերության մեջ է մնում 98 իսրայելցի պատանդ։
Հագարիի խոսքով՝ Իսրայելը մտադիր է շարունակել ռազմական գործողությունը Գազայում այնքան ժամանակ, քանի դեռ ՀԱՄԱՍ-ը չի կատարել իր պարտավորությունները։
Կիրակի գիշերը՝ հրադադարի ծրագրված մեկնարկից մի քանի ժամ առաջ, իսրայելական բանակը հարվածներ է հասցրել Գազայի հատվածի հյուսիսային հատվածին, հայտնում է AFP-ն։
Հիշեցնենք, որ ԱՄՆ նախագահներ Բայդենն ու Թրամփը փորձում են իրենց վերագրել զինադադարի կնքումը։ Եթե այն ուժի մեջ մտնի հունվարի 20-ից հետո, դա կհամարվի Թրամփի ձեռքբերումը։
Ինչպես հայր Ալիևը համաձայնեց «իջեցնել նշաձողը»
Ազատություն
Մինչ Հայաստանի վարչապետը հայտարարում է, թե հրադադարի հաստատումից՝ 1994 թվականից ի վեր Ղարաբաղյան խնդրի շուրջ բանակցությունները եղել են միայն Արցախը Ադրբեջանի կազմ վերադարձնելու մասին, Միացյալ Նահանգների Պետդեպարտամենտի տարիներ առաջ հասանելի դարձած փաստաթղթերը վկայում են՝ հայկական կողմը պահանջել է անկախություն, և առնվազն 1997-ին հայր Ալիևը՝ Մինսկի խմբի համանախագահների ճնշման տակ, Վաշինգտոնում համաձայնել է կարգավորման փուլային տարբերակին, որով հայկական ուժերը պետք է դուրս բերվեին Ղարաբաղի հարակից վեց շրջաններից, կողմերի միջև ստեղծվեր բուֆերային գոտի՝ բազմազգ խաղաղապահ ուժերով, բացվեին տարածաշրջանի ճանապարհներն ու երկաթգծերը: Դրանից հետո՝ երկրորդ փուլում արդեն, պետք է որոշվեր Լեռնային Ղարաբաղի կարգավիճակը, որը շաղկապվում էր հայկական ուժերի դուրսբերման հետ Լաչինից ու Շուշիից։ Ալիևն անգամ ասել էր՝ պատրաստ է ուղիղ բանակցությունների ոչ միայն Հայաստանի, այլև Լեռնային Ղարաբաղի ներկայացուցիչների հետ։ Այդ մասին Մինսկի խմբի իր գործընկերներին գրել է ԱՄՆ փոխպետքարտուղար Սթրոբ Թալբոթը 1997 թվականի օգոստոսի 7-ին՝ Միացյալ Նահանգներ Հեյդար Ալիևի այցից հետո (փաստաթուղթը տե՛ս այստեղ).
«Նա (Ալիևը) թե’ բաց տեքստով, թե’ առանձնազրույցների ժամանակ հաստատեց Ադրբեջանի պատրաստակամությունը՝ ուղիղ բանակցությունների մեջ մտնել Հայաստանի ու Լեռնային Ղարաբաղի հետ՝ Մինսկի խմբի հովանու ներքո։
Նա հրապարակավ ընդունեց Մինսկի խմբի համանախագահների առաջարկը որպես բանակցությունների հիմք»։
Շարունակությունը այստեղ