Նիկոլ Փաշինյանը նախապատարստում է այսպես կոչված «Արեւմտյան ադրբեջանցիների» մուտքը Հայաստան։ Step1.am-ի հետ զրույցում նման տեսակետ հայտնեց արցախցի գործիչ Արթուր Օսիպյանը՝ անդրադառնալով «Ռազմավարական հետազոտությունների անկախ կենտրոնի» ղեկավար, արցախցի Ղարիբ Բաբայանի նկատմամբ հարուցված հանրային քրեական հետապնդմանը։
Համացանցում տարածվել էր տեսանյութ, որտեղ մի խումբ անձինք Երեւանի Հանրապետության հրապարակում ադրբեջաներենով «Ղարաբաղ-Ղարաբաղ» էին երգում։ Արթուր Օսիպյանի խոսքով՝ այդ տեսահոլովակը Ղարիբ Բաբայանին էր ուղարկել նրա ընկերը։
«Ղարիբ Բաբայանն էլ իր կազմակերպության էջում էր հրապարկել տեսանյութը, իր հուզմունքն ու զայրույթն էր արտահայտել դրա վերաբերյալ։ Փաստորեն դա առաջին հերթին ԱԱԾ-ի ու ոստիկանության բացթողումն է, բայց այդ երեւույթը թողել են մի կողմ ու քրեական գործ հարուցել այն մարդու նկատմամբ, ով հնչեղություն է տվել դրան։ Այսինքն՝ եթե վաղը մենք տեսնենք,որ Երեւանի հրապարակում թուրքերը «Ղարաբաղ-Ղարաբաղ» են երգում, դա բարձրաձայնելը, դրան բացասական գնահատական տալը քրեական գործի հարուցում է ենթադրում։ Սա նշանակում է, որ Նիկոլ Փաշինյանը փաստորեն նախապատարստում է «Արեւմտյան ադրբեջանցիների» մուտքը Հայաստան»,- ասաց Արթուր Օսիպյանը։
Նշենք, որ Քննչական կոմիտեն այսօր հայտնել է, որ «Ռազմավարական հետազոտությունների անկախ կենտրոնի» ղեկավար Ղարիբ Բաբայանը ձերբակալվել է։ Արցախցի Ղարիբ Բաբայանն իր ղեկավարած ֆեյսբուքյան էջում տարածել էր տեսանյութ, որում մի խումբ մարդիկ Հանրապետության հրապարակում ադրբեջաներեն երգ են երգում Ղարաբաղի մասին: Տեսանյութը տարծողները նշել էին, որ նրանք ադրբեջանցիներ են։ Ավելի ուշ ԱԱԾ-ն հաղորդագրություն էր տարածել՝ նշելով, որ տեսագրությունում պատկերված անձիք Իրանի քաղաքացիներ են:
Եվ, ահա, այս դեպքով ՀՀ իրավապահ մարմինները հանրային քրեական հետապնդում են հարուցել Ղարիբ Բաբայանի նկատմամբ։
Քննչական կոմիտեից հայտնում են․ «Ատելություն, խտրականություն, անհանդուրժողականություն և թշնամանք հրահրելուն և քարոզելուն ուղղված հրապարակային խոսքի, ինչպես նաև այդ նպատակով նյութեր տարածելու դեպքի առթիվ ՀՀ ազգային անվտանգության ծառայության կողմից ներկայացված հանցագործության մասին պատշաճ հաղորդման հիման վրա 2025 թվականի հունվարի 31-ին ՀՀ Քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում նախաձեռնվել է քրեական վարույթ։ Քրեական վարույթով կատարված քննչական գործողությունների և ձեռնարկված օպերատիվ հետախուզական միջոցառումների արդյունքում պարզվել է, որ Ղ․Բ․-ն 2025 թվականի հունվարի 30-ին իր կողմից օգտագործվող «Ռազմավարական հետազոտությունների անկախ կենտրոն» անվամբ բաց հասանելիություն ունեցող ֆեյսբուքյան էջում հրապարակել է Հանրապետության հրապարակում օտարերկրյա մի խումբ քաղաքացիների մասնակցությամբ կատարված տեսագրություն և դրա էությունը խեղաթյուրող մեկնաբանություններ՝ այդ կերպ տարածելով քաղաքական և այլ հայացքներով, անձնական և սոցիալական բնույթի այլ հանգամանքներով պայմանավորված՝ ՀՀ իշխանությունների և ՀՀ ոստիկանության ծառայողների նկատմամբ ատելություն, անհանդուրժողականություն և թշնամանք հրահրելուն ու քարոզելուն ուղղված նյութ և հրապարակային խոսք։
Նշված արարքը կատարելու համար Ղ․Բ.-ի նկատմամբ հարուցվել է հանրային քրեական հետապնդում՝ Քրեական օրենսգրքի 329-րդ հոդվածի 2-րդ մասի 3-րդ կետով (ատելություն, խտրականություն, անհանդուրժողականություն կամ թշնամանք հրահրելուն կամ քարոզելուն ուղղված հրապարակային խոսքը, ինչպես նաև այդ նպատակով նյութեր կամ առարկաներ տարածելը)։ Վերջինս ձերբակալվել է և նրա նկատմամբ կալանքը որպես խափանման միջոց ընտրելու միջնորդություն է ներկայացվել դատարան»։
Ռոզա Հովհաննիսյան
