Ստամբուլում ավարտվել է Ռուսաստանի և Ուկրաինայի ներկայացուցիչների միջև ուղիղ բանակցությունների երկրորդ փուլը։ Բանակցությունները տևել են մոտ մեկ ժամ, այսինքն՝ դրանք մայիսին տեղի ունեցած առաջին փուլի կեսի չափ էին տևում։
Արդյունքում կնքվել է ռազմագերիների փոխանակման վերաբերյալ նոր համաձայնագիր։ Այս մասին լրագրողներին հայտնել է Ուկրաինայի պաշտպանության նախարարության ղեկավար Ռուստեմ Ումերովը բանակցություններից հետո, հաղորդում է Dialog.UA-ն։
«Մենք համաձայնության ենք եկել փոխանակումների վերաբերյալ։ Շուտով կհրապարակենք մանրամասները։ Մենք կենտրոնանում ենք ծանր վիրավորների, հիվանդների, երիտասարդների, ինչպես նաև զոհվածների մարմինների փոխանակման վրա։ Մենք կհրապարակենք ամբողջ տեղեկատվությունն ու մանրամասները մի փոքր ուշ», – նշել է Ումերովը։ Նա պարզաբանել է, որ համաձայնագիրը վերաբերում է 18-ից 25 տարեկան բոլոր զինծառայողների փոխանակմանը։ Նրա խոսքով՝ հրադադարի հարցը ևս քննարկվել է ռուսների հետ, սակայն ռուսական պատվիրակությունը կտրականապես հրաժարվել է հրադադարից։
Հանդիպումը տեղի է ունեցել Բոսֆորի ափին գտնվող Չիրագան պալատում: Ռուսական պատվիրակությունը, ինչպես նախորդ անգամ, գլխավորում էր նախագահի օգնական Վլադիմիր Մեդինսկին, իսկ ուկրաինական պատվիրակությունը՝ պաշտպանության նախարար Ռուստեմ Ումերովը։
Բանակցություններից հետո տեղի ունեցած մամուլի ասուլիսում ուկրաինական պատվիրակությունը հայտարարել է, որ Մոսկվան իր պահանջները փոխանցել է Կիևին, և Ուկրաինային մեկ շաբաթ կպահանջվի փաստաթուղթն ուսումնասիրելու և հետագա քայլերը որոշելու համար։
Բացի այդ, ուկրաինական պատվիրակությունը առաջարկել է ամսվա վերջին՝ հունիսի 20-ից 30-ը, Սպիտակ տան ղեկավարի հետ միասին Ռուսաստանի և Ուկրաինայի նախագահների հանդիպում նշանակել։
Ուկրաինական պատվիրակության անդամ, Ուկրաինայի փոխարտգործնախարար Սերգեյ Կիսլիցյան հիշեցրել է, որ Ռուսաստանը իր հուշագիրը Կիևին է փոխանցել միայն այս հանդիպման ժամանակ: «Ռուսաստանն ինքն է առաջարկել, որ մենք ավելի մանրամասն ծանոթանանք դրան», – հավելել է նա։
Ռուսական պատվիրակության ղեկավար Վլադիմիր Մեդինսկին բանակցություններից հետո ռուսական լրատվամիջոցների հետ մամուլի ասուլիսում հայտարարել է, որ ռուսական հուշագիրը բաղկացած է երկու մասից՝ ինչպես հասնել երկարաժամկետ խաղաղության և ինչ քայլեր են անհրաժեշտ լիակատար հրադադարի հասնելու համար: Երկրորդ մասը նախատեսում է փոփոխականություն, ասել է Մեդինսկին: «Գնալ այս կողմ կամ այն կողմ», – հավելել է նա՝ առանց բացատրելու, թե յուրաքանչյուր տարբերակ ինչ է նշանակում։
Մեդինսկին ասել է, որ բանակցությունների երկրորդ փուլի ընթացքում լուծվել են մի քանի «գործնական հարցեր»։
Դրանց թվում նա նշել է ուկրաինական կողմին 6000 զինվորների մարմինների փոխանցումը, որը պետք է տեղի ունենա հաջորդ շաբաթ։
Ռուսաստանը և Ուկրաինան կփոխանակեն ծանր հիվանդ և վիրավոր զինվորներին «բոլորը բոլորի դիմաց» բանաձևով, ասել է ռուսական պատվիրակության ղեկավարը: Ինչ վերաբերում է ծանր վիրավոր զինվորներին, երկու կողմերն էլ կկազմակերպեն բժշկական հանձնաժողովներ, ասել է Մեդինսկին, և նման փոխանակումները, ըստ նրա, կլինեն կանոնավոր։
Միևնույն ժամանակ, Մոսկվան, ըստ երևույթին, մերժել է Կիևի առաջարկը՝ անվերապահ հրադադարի մասին: Մեդինսկու խոսքով, Ռուսաստանը Ուկրաինային առաջարկել է հրադադար «2-3 օրով ռազմաճակատի որոշակի հատվածներում»: Մեդինսկու խոսքով, դա արվում է, որպեսզի «հրամանատարները կարողանան հավաքել իրենց զինվորների մարմինները»:
Վլադիմիր Մեդինսկին նաև ցույց է տվել Ուկրաինայի կողմից հանձնված 339 երեխաների անուններից բաղկացած ցուցակ: The Economist-ի թղթակից Օլիվեր Քերոլը X սոցիալական ցանցում գրել է, հղում անելով աղբյուրին, որ Վլադիմիր Մեդինսկին Ուկրաինայի կողմից Ռուսաստան արտաքսված հարյուրավոր երեխաների ցուցակի փոխանցմանը պատասխանել է հետևյալ խոսքերով. «Մի՛ բեմադրեք ներկայացում անզավակ եվրոպացի տարեց կանանց համար»:
The Financial Times-ը նշում է, որ հանդիպման ժամանակ պատվիրակությունները ձեռքսեղմում չեն արել և որևէ առաջարկ չեն արել, որը կարող է վկայել որևէ հնարավոր գործարքի շուրջ աշխատանքի առաջընթացի մասին:
