2025 թվականի հունվար-սեպտեմբեր ամիսներին հայկական առևտրային բանկերը գրանցել են մոտավորապես 308 միլիարդ դրամի զուտ շահույթ, հաղորդում է Modex-ը։ Դա 15%-ով ավելի է, քան նախորդ տարվա նույն ժամանակահատվածում։
Բանկերի զուտ շահույթը Հայաստանի բյուջեի մոտ 12 տոկոսի չափ է, ինչը խոսում է ոչ թե ՀՀ տնտեսության մեջ բանկերի ակտիվության, այլ կապիտալի և պոտենցիալ ներդրումների անսահմանափակ կողոպտելու մասին։ Նման աղքատ երկրում բանկերի հսկայական շահույթը պատասխանում է պարզ հարցի, թե ո՞ւրեն մարդկանց փողերը։
ԱՄՆ նախագահի վարչակազմը կտրուկ արձագանքեց լրագրողների այն հարցին, թե ինչու է Բուդապեշտն ընտրվել որպես ԱՄՆ նախագահ Դոնալդ Թրամփի և Վլադիմիր Պուտինի հանդիպման վայր։
Լրագրողը հարցրեց Սպիտակ տան մամուլի քարտուղար Քերոլայն Լիվիտին, թե ով է ընտրել Բուդապեշտը ԱՄՆ-Ռուսաստան գագաթնաժողովի անցկացման համար, և ստացել անսպասելի պատասխան։
«Մայրդ», – պատասխանեց Լիվիտը։
Վաշինգտոնյան հռչակագրում Հայաստանը և Ադրբեջանը համաձայնության եկան այն հիմնական սկզբունքների շուրջ, ըստ որոնց պետք է ընթանա ապաշրջափակումը, և դա խիստ կարևոր է։ DW-ին տված հարցազրույցում դրա մասին հայտարարել է ՀՀ արտգործնախարար Արարատ Միրզոյանը։
“Ադրբեջանական կողմը, ցավոք, առաջ է քաշում խաղաղության պայմանագիր ստորագրելու նախապայմաններ։ Մենք համաձայն չենք դրա հետ. մենք ունենք հակափաստարկներ։ Սակայն նրանք կարծում են, որ մեր Սահմանադրության հետ կապված խնդիր կա. սա նրանց տեսակետն է։
Նրանք ուզում են, որ մենք փոփոխենք Սահմանադրությունը։ Սա այն պայմանն է, որը մենք մերժում ենք։ Միևնույն ժամանակ, մենք ունենք Սահմանադրությունը փոփոխելու կամ նոր Սահմանադրություն ընդունելու օրակարգ. մենք քաղաքական հայտարարություն ենք արել”,ասել է Արարատ Միրզոյանը։
“ՀՀ Սահմանադրությունում չկա ոչինչ, որը կարող է վկայել Ադրբեջանի նկատմամբ տարածքային պահանջների մասին։ Բայց նոր Սահմանադրություն մշակող Հանձնաժողովն արդեն ավարտում է աշխատանքը, և մենք, ամենայն հավանականությամբ, այս հարցի վերաբերյալ հանրաքվե կանցկացնենք 2026 թվականի խորհրդարանական ընտրություններից հետո։ Մենք պատրաստ ենք անհապաղ ստորագրել խաղաղության պայմանագիրը»,- հավելել է Միրզոյանը։
Միրզոյանը փաստորեն ոչ թե մերժում է Բաքվի պայմանն, այլ ասում է, որ իշխող ուժը 2018-ից ինքն էր պատրաստվում Սահմանադրություն փոխել։ Խոսքն ակնհայտ Սահմանադրության մեջ Անկախության հռչակագրին հղման մասին է, որտեղ որպես անկախության հիմք է ընդունվում Արցախի և Հայաստանի միավորման մասին 1989 թ․ որոշումը։
Նիկոլ Փաշինյանը չի ճանաչում այս որոշումը, որն ամրագրված է Սահմանադրության մեջ։ Ավելին՝ նա ասում է, որ “18 տարեկան ՀՀ քաղաքացիներին ուղարկել են ծառայելու ՀՀ սահմանից դուրս”, նկատի ունենալով Արցախը։ Թե ոնց է Փաշինյանը որոշում “սահմանը”, անհասկանալի է։ Բայց ակնհայտ է, որ նրան գրեթե ոչ ոք Հայաստանում չի հակադարձում։
Եթե ընդդիմությունը և իսթեբլիշմենթը չեն ասում, որ Արցախը Հայաստան է, և դա ամրագրված է Անկախության հռչակագրում, ապա նրանք դառնում են Նիկոլ Փաշինյանի համահանցակիցներ։
Փաշինյանի այդ հայտարարությունից հետո ոչ մի քաղաքական ուժ չի պնդել, որ 18-ամյա հայ քաղաքացիները ծառայել են այն հողում, որն, ըստ ՀՀ Սահմանադրության, ՀՀ մաս են կազմում։ Եվ քանի դեռ գործում են ՀՀ Սահմանադրությունն ու Անկախության հռչակագիրը, Արցախը՝ ՀՀ օկուպացված մասն է, որտեղից հանցավոր դավադրության և ցեղասպանության արդյունքում վտարվել են 150,000 ՀՀ քաղաքացիներ։
Ընդդիմությունը դա չի ասում, նախընտրելով վատնել լոբբինգի հսկայական ռեսուրսն “արցախցիների վերադարձի” անիմաստ թեզն առաջ քաշելով։ Իսկ Արցախի իսթեբլիշմենթը, փոխանակ “ԼՂ հանրապետության արձակումից” հետո հայտարարի, որ այլևս միակ իրավական հիմքը՝ 1989 թ․ որոծումն է, կրկին խոսում է “վերադարձի” մասին։
Ուկրաինայի նախագահ Վլադիմիր Զելենսկու հետ հանդիպումը շատ հետաքրքիր և ջերմ էր, բայց ես նրան ասացի, ինչպես որ խստորեն խորհուրդ էի տվել նախագահ Պուտինին, որ ժամանակն է դադարեցնել սպանությունները և գործարք կնքել։ ԱՄՆ նախագահ Դոնալդ Թրամփը այս մասին գրել է սոցիալական ցանցերում։
«Բավական է արյուն թափվել, սեփականության սահմանները որոշվում են Պատերազմով և Կամքի ուժով։ Դրանք պետք է կանգ առնեն այնտեղ, որտեղ գտնվում են։ Թող երկու կողմերն էլ հաղթեն, թող պատմությունը դատի։ Ավելի կրակոցներ, ավելի մահեր, ավելի զանգվածային և անկայուն ծախսեր պետք չեն։ Այս պատերազմը երբեք չէր սկսվի, եթե ես նախագահ լինեի։ Ամեն շաբաթ հազարավոր մարդիկ մահանում են. ԲԱՎԱԿԱՆ Է, ԽԱՂԱՂՈՒԹՅԱՄԲ ՎԵՐԱԴԱՐՁԵՔ ՁԵՐ ԸՆՏԱՆԻՔՆԵՐԻ ՄՈՏ»,- նշել է Թրամփը։
Այս հայտարարությունը բացահայտում է բանակցվող սահմանը՝ կանգ առն՞լ ներկայիս առաջնագծում, թե՞ Ուկրաինան պետք է Ռուսաստանին զիջի Դոնեցկի շրջանի իր վերահսկողության տակ մնացած մասերը։ Ուկրաինայի ամբողջության վերականգնումը Մակրոնի և Փաշինյանի սիրված «Ալմա-Աթայի հռչակագրի» շրջանակներում այլևս քննարկման առարկա չէ։
Թրամփի հայտարարությունը ենթադրում է, որ եթե Ռուսաստանը հրաժարվի Դոնբասի մի մասի նկատմամբ հետագա պահանջներից, Ուկրաինան ստիպված կլինի համաձայնվել Ռուսաստանի կողմից արդեն օկուպացված տարածքների կորստին։
Թրամփի հետ զրույցից հետո Զելենսկին զանգահարեց եվրոպացի առաջնորդներին, քանի որ Թրամփի «առաջարկը» Ուկրաինային, ըստ էության, առաջարկ է Եվրոպային: Թրամփի «սեփականության սահմանները որոշվում են պատերազմով և կամքի ուժով» սկզբունքը նշանակում է ներկայիս աշխարհակարգի փլուզում, հատկապես եվրոպական մայրցամաքում և Մերձավոր Արևելքում։
Այս սկզբունքի Եվրոպայի կողմից լուռ ընդունումը և ուժի կիրառման նկատմամբ նրա թողտվությունը, մասնավորապես՝ Արցախյան հարցի շուրջ, անխուսափելիորեն պետք է հանգեցններ այնպիսի իրավիճակի, երբ հարցականի տակ կդրվեն Եվրամիության սահմանները: Կասկած չկա, որ այս սկզբունքից ոգեշնչված՝ Պուտինը, Էրդողանը և Եվրոպայի մյուս «բարեկամները» ԵՄ-ից կպոեն որքան հնարավոր է շատ տարածք, իսկ Թրամփը թագը գլխին կօրինականացնի այն:
Եվրոպան միայն մեկ հնարավորություն ունի՝ վերադառնալու Արցախի հիմնական հարցին, որը սկիզբ դրեց «օրենքի ուժի» օրինականացմանը։ Ֆրանսիայի, Ռուսաստանի և Միացյալ Նահանգների համանախագահությամբ ԵԱՀԿ Մինսկի խմբի լուծարումը Եվրոպային հնարավորություն է տալիս միայնակ պաշտպանել «օրենքի ուժի» սկզբունքը։
Սակայն առայժմ Եվրոպան նախընտրում է պատրաստվել խոշոր, մարտավարական միջուկային պատերազմի և սահմանների նոր վերաձևավորման։ Գերմանիան վերսկսում է ընդհանուր զորահավաքը, Ֆինլանդիան բոլորի համար պատրաստում է ռումբապաստարաններ, իսկ Հունգարիան գծում է նոր կայսրության քարտեզներ, որոնք հասնում են մինչև Վիեննայի պատերը։
ԱՄՆ նախագահ Դոնալդ Թրամփը հայտարարել է, որ Ուկրաինայի նախագահ Վլադիմիր Զելենսկու հետ կքննարկի նոր հնարավորությունները, որոնք թույլ կտան Ուկրաինային խորը հարվածներ հասցնել Ռուսաստանին: «Մենք դա կքննարկենք», – ասել է Թրամփը հոկտեմբերի 17-ին, ուրբաթ, Սպիտակ տանը Զելենսկու հետ համատեղ մամուլի ասուլիսում՝ պատասխանելով հարցին այն մասին, թե արդյոք այդ թեման կբարձրացվի Ուկրաինայի առաջնորդի հետ ավելի ուշ սկսվող բանակցությունների ժամանակ։
«Այո, դա այն բանն է, որը մենք կքննարկենք: Սա սրացում է, բայց մենք դա կքննարկենք»: Թրամփը նաև հույս է հայտնել, որ Ուկրաինայում պատերազմը կարող է ավարտվել առանց «Տոմահավկ» հրթիռների կիրառման: Նա ուղղակիորեն չի պատասխանել այն հարցին, թե արդյոք Ուկրաինան ստիպված կլինի զիջել տարածքներ՝ խաղաղության համաձայնագիր ստորագրելու համար, նշելով, որ պատերազմները անկանխատեսելի են։
Իր հերթին, Ուկրաինայի նախագահը հայտարարել է, որ Կիևը պատրաստ է ԱՄՆ-ին մատակարարել հազարավոր ուկրաինական անօդաչու թռչող սարքեր՝ «Տոմահավկ» թևավոր հրթիռների դիմաց: Թրամփը նշել է, որ ԱՄՆ-ն ինքը «Տոմահավկերի» և այլ հրթիռների կարիքն ունի, բայց ասել է, որ պատրաստ է քննարկել Զելենսկու առաջարկը։
Ռուսաստանի Դաշնության խորհրդի փոխնախագահ Կոնստանտին Կոսաչովը հայտարարել է, որ Մոսկվան միջուկային հարված կհասցնի Ուկրաինայի կողմից «Տոմահավկ» հրթիռներով հնարավոր հարձակման դեպքում: «Նույնիսկ ոչ մասնագետը հասկանում է, որ սա [ամերիկյան «Տոմահավկ»-ների Կիևին փոխանցումը] ուղիղ ճանապարհ է դեպի միջուկային պատերազմ: Որովհետև, երբ միջուկային տերության ուղղությամբ թռչում է միջուկային մարտագլխիկ կրող հրթիռ, պատասխանը կլինի լիովին ակնհայտ: Այն կլինի միջուկային», – հայտարարել է սենատորը «Վմեստե-ՌՖ» հեռուստաալիքի եթերում: Ավելի վաղ նմանատիպ հայտարարություն էր արել Ռուսաստանի Անվտանգության խորհրդի փոխնախագահ Դմիտրի Մեդվեդևը. նրա խոսքով՝ «անհնար է տարբերակել, «Տոմահավկ»-ները միջուկային գլխիկ ունեն թե ոչ», և որ նման հրթիռների արձակումը, եթե դա տեղի ունենա, կիրականացվի ոչ թե Ուկրաինայի, այլ Միացյալ Նահանգների կողմից:
Այն հայտարարությունից հետո, որ սովը չպետք է որպես զենք օգտագործվի հակամարտությունների ժամանակ, Հռոմի պապ Լևոն XIV-ը, բնականաբար, ընդունեց Ալիևի կնոջը՝ Մեհրիբանին, որը նաև Բաքվում փոխնախագահ է։
2022 թվականի դեկտեմբերի 12-ին քաջարի ադրբեջանցի կանայք, ձեռքներին սատկած աղավնիներ, փակեցին Բերձորի միջանցքը՝ դատապարտելով 120,000 արցախցիների սովի և, ի վերջո, ցեղասպանություն իրականացնելով, քրիստոնյաներին վտարեցին իրենց հազարամյա հայրենիքից։
Մեհրիբանը անմիջապես հիշեցրեց Հռոմի պապին, որ «վերջին տարիներին Հեյդար Ալիևի հիմնադրամը լայնածավալ աշխատանք է կատարել Սուրբ Աթոռի հետ՝ ինչպես վերականգնողական աշխատանքների, այնպես էլ գիտական հետազոտությունների և մշակութային փոխանակումների ոլորտներում»։
Մեհրիբանը նաև Հռոմի պապին նվիրեց հնաոճ գորգ, որը, ըստ երևույթին, հայերը թողել էին իրենց լքված տներում։
Դրանից հետո Հռոմի պապը այլևս անհարմար զգաց Ալիևային մեղադրելու սովը որպես զենք օգտագործելու մեջ։
«Ժողովրդավարության բաստիոնում այսօր իրավապաշտպանների կարիքն ավելի շատ կա, քան կարելի է պատկերացնել։ Սա անպատկերացնելի իրավիճակ է՝ մարդիկ հայտարարում են, թե գնում են դեպի Եվրոպա, թե ստեղծել են ժողովրդավարության բաստիոն, բայց արդյունքում՝ այսօր իրավապաշտպանների կարիքը շատ ավելի է զգացվում։ Ինչ-որ դիսոնանս կա, ինչ-որ մի տեղ ինչ-որ մեկը սուտ է խոսում»,- step1.am-ի հետ զրույցում ասաց ՆԺԱՐ սահմանադրական շարժուման համահիմնադիր, նախկին իրավապաշտպան Նինա Կարապետյանցը։
Ավելի վաղ Նինա Կարապետյանցը հայտարարել էր, որ դադարեցնում է իրավապաշտպան գործունեությունը, այնուհետեւ նախկին ՄԻՊ Արման Թաթոյանը հայտարարեց իրավապաշտպանությունը դադարեցնելու եւ քաղաքականություն մուտք գործելու մասին։ Նինա Կարապետյանցն ասել էր, որ Հայաստանում իրավապաշտպանությունը լուրջ հետընթաց է ապրում։
Մեր հարցին, թե ինչո՞ւ են պասիվ իրավապաշտպանները, ի՞նչ է կատարվում, Կարապետյանցը պատասխանեց, կար ժամանակ, երբ կային քաղհասարակության եւ իրավապաշտպանության հայրերը, բայց, ցավոք սրտի, իրենց մեծ մասն այլեւս ողջ չեն։
«Եվ մնացած դաշտը կարծես որոշեց, որ կարելի է թուլանալ եւ զբաղվել գործերով, որոնք այս պահին գուցե այդքան էլ արդիական չեն։ Շղարշ ու տպավորություն են ստեղծում, թե շատ բուռն աշխատանքով են զբաղված, ինչը նաեւ իրենց բարեկեցությունն է ապահվում։ Ավելին, իրենք փորձում են ցույց տալ, որ իրենց մի մասը շատ կառուցողական են, այսինքն՝ անունն են դրել կառուցողական եւ այս իշխանությունների հետ սերտ համագործակցություն են ապահովում։ Ցավոք սրտի, սա ավելին շատ նման է անձնական հարցերի լուծման, քան իրավապաշտպանության կամ քաղհասարակության իրական ֆունկցիաների իրականացման։ Դա է պատճառը, որ ես դադարեցրել եմ իրավապաշտպան գործունեությունը եւ հասկացել, որ խնդիրը շատ ավելի խորքային է, այդ թվում՝ նաեւ քաղհասարակության խնդիրները լուծելու համար, այսինքն՝ զտելու, յուրահատուկ լյուստրացիա իրականացնելու համար անհրաժեշտ են լուրջ քաղաքական գործնթացներ։ Այնպես որ, սպասեք գործընթացների, այդ թվում՝ նախկին գործընկերները, որովհետեւ չի կարող իրավապաշտպան ներկայացող մարդը փաստացի դառնալ օրվա իշխանության պրոպագանդիստը։ Դա անթույլատրելի է, հակաքաղհասարակական գործունեություն է, եթե չասեմ, որ դա բարոյականությունից դուրս է»,- ասաց նա։
Ըստ Նինա Կարապետյանցի՝ բոլոր երկրերում քաղհասարակությունն իշխանություններին զսպելու միջոց ու հնարավորություն է, բայց մեզ մոտ քաղհասարակության մի մասն ուղիղ լծվել է իշխանությանը փառաբանելու, իշխանության հակասահմանադրական գործողություններն արդարացնելու գործին։
«Սա քաղհասարակություն չէ։ Այնպես չէ, որ բոլորն են այդպիսին, բազմաթիվ մարդիկ կան, ովքեր շատ ազնիվ նվիրյալներ են, մնացել են իրեցն դիրքում, բայց մեծ մասը․․․ ուղղակի ամոթ իրենց»,- հավելեց նա։
Ռոզա Հովհաննիսյան
Արցախցիների՝ Հայաստանում ինտեգրվելու մասին թեզը կեղծ թեզ է։ Այս մասին step1.am-ի հետ զրույցում ասաց արցախցի քաղաքագետ Դավիթ Կարաբեկյանը՝ անդրադառնալով իշխանությունների այն հայտարարություններին, թե արցախցիները պետք է ինտեգրվեն Հայաստանում, քանի որ վերադարձի հնարավորություն չկա։
«Եթե ինտեգրացիայի խնդիր լիներ, 1988 թվականը չէր լինի։ Մենք բաժանված լինելով՝ միշտ մեր կապը պահպանել ենք։ Դեզինտեգրացիայի թեզը գալիս է այն ուժերից, որոնք շահարկում են «070» անձնագրի կոդը, հակաարցախյան քարոզ են անում եւ ակնհայտ սահմանափակումներ են դնում արցախցիների համար»,- ասաց Կարաբեկյանը։
Նա նշեց, որ թեկուզ Արցախը Հայաստանից առանձին էր, չճանաչված, բայց 33 տարիների ընթացքում Արցախը տարածաշրջանային եւ համաշխարհային գործընթացներին մասնակցում էր Հայաստանի միջով։
«Ես՝ որպես դասախոս, հիշում եմ, որ երբ հարցնում էին՝ դուք ինչո՞ւ եք Բոլոնյան համակարգին անցնել, պատասխանը մեկն էր՝ որովհետեւ Հայաստանն անցում է կատարել այդ համակարգին։ Հիմա պատասխանատվությունից խուսափելու համար ասում են՝ տարբեր հասարակություններ են, պետք է ինտեգրվեք։ Հիմա շատերի Աստվածը փողն է, իրենք եւ եկեղեցին են հալածում, եւ դպրոցից ազգային ու հայեցի ծրագրերն են հանում։ Եթե ինտեգրված չէինք, ինչո՞ւ էր մեզ մոտ հայկական դրամը։
Երկրորդը՝ միջազգային դիվանագիտությունն ուղղորդված էր դեպի ՀՀ, Ղարաբաղի նախագահ Արկադի Ղուկասյանն ասում էր, որ ՀՀ-ն տիրապետում է Արցախի հիմնախնդրին եւ կարող է ներկայացնել եւ Հայաստանի, եւ Արցախի շահերը։ Դա 2004-2005 թվականներն էին։
Երրորդ ատրիբուտը զինված ուժերն էին։ Հիմա ո՞նց է հնարավոր, որ կարեւոր ոլորտները, որոնք ինտեգրված էին, հանկարծ բաժանվեն։ Հանկարծ պարզվի, որ 33 տարի միացած չէինք, ինտեգրված չէինք։ Միայն նրա համար, որ 44-օրյա պատերազմի պատասխանատվությունը չընկնի Փաշինյանի վրա, ասում են՝ Ղարաբաղը առանձի՞ն էր։ Ոչ, միասին են եղել։
Ո՞նց է հնարավոր, որ մեկ ժողովուրդ լինի, բայց ֆինանսական, ռազմական, հոգեւոր, մշակութային առումով ինտեգրումը չլինի։ Այդ ինտեգրացիան գլխավոր ուղղություններում միշտ եղել է։
Խոչընդոտն իրականում հենց այն մարդկանց պատճառով է, որոնք գիշեր-ցերեկ հայ ազգի հատվածների մեջ կեղծ օրակարգեր են ստեղծում ու թշնամիներ են հորինում։ Կամ, օրինակ, ասում են՝ ղարաբաղյան կլան։ Եղբայր, ղարաբաղյան կլանն է քեզ իշխանության բերել, եւ հիմա դու փորձում ես այդ ժողովրդից վրեժ լուծել։
Այսինքն՝ ինտեգրցիայի քողի տակ կրկնակի ստանդարտներ են կիրառվում, կեղծ օրակարգ է մեջտեղ բերվում, թե Հայաստանը փողն ուղարկում էր Ղարաբաղ, Ղարաբաղը պրոբլեմներ էր ստեղծում։ Լավ, հիմա մենք չկանք, Ադրբեջանը խաղաղության պայմանագիր կնքե՞լ է կամ էլ Հայաստանի նկատմամբ ավելի բարեկամական տրամադրությո՞ւն ունի։ Ո՞րն է բարեկամության նշանը, որ Փաշինյանը սուրճ է բերե՞լ Ալիեւի համար»,- նշեց Կարաբեկյանը։
Անդրադառնալով արցախցիների վերադարձի հնարավորությանը՝ Դավիթ Կարաբեկյանն ասաց, որ այս իշխանությունների համար դա անհնար է, որովհետեւ իրենք դրանով արդարացնում են Արցախը հանձնելը։ «Եթե իրենք ինքնուրույն լինեն, հասկանալի է, բայց իրենք այն քաղաքական պատվերի շրջանակներում են գործում, որն իջեցված է նրանց պատվիրատուների կողմից։ Ագենտը ասում ու անում է այն, ինչ իրեն պատվիրված է։ Իսկ արցախցիների վերադարձ, ըստ իս, լինելու է, այդ հարցը երբեք օրակարգից չի հանվել։ Ավելի հզոր գործընթացներ կան, մեր հազարամյակների պատմությունը ցույց է տվել, որ երբ մեկը փորձել է մեզ արանքից հանել, մեր խնդիրը փակել, ինքն իր ընտանիքի ու դինաստիայի գլխին փորձություններ է բերել»,- հավելեց նա։
Ռոզա Հովհաննիսյան
Վաղը նախատեսվում է «Մեր ձևով» շարժման կողմից հայտարարված հանրահավաքը, որին նախորդել են բազմաթիվ ձերբակալություններ: Այս ձերբակալությունները նպատակ ունեն ոչ միայն «գլխատել» շարժումը, այլև վախ սերմանել պոտենցիալ մասնակիցների մեջ։
Մինչդեռ երկարացվել է «Մեր ձևով» շարժման առաջնորդ Սամվել Կարապետյանի, ինչպես նաև Միքայել Սրբազանի ազատազրկման ժամկետը: Ձերբակալվել են բարձրաստիճան հոգևորականներ, այդ թվում՝ Գարեգին Բ կաթողիկոսի զարմիկ՝ արքեպիսկոպոս Մկրտիչ Պռոշյանը: Կալանավորվել է փաստաբան Ալեքսանդր Կոչուբաևը: Այսօր ձերբակալվել են Մանկավարժական համալսարանի ռեկտորը և պրոռեկտորը՝ մեղադրվելով «հանցավոր խումբ ստեղծելու» մեջ։
Չնայած ձերբակալվածներից յուրաքանչյուրը մեղադրվում է անհատական մեղադրանքներով՝ կոռուպցիայի կամ նույնիսկ ահաբեկչության նախապատրաստման մեջ, ընդհանուր միտումը հստակ է. ընդդիմադիր հայացքներ ունեցող և հասարակության մեջ ազդեցություն ունեցող անձինք ուղարկվում են բանտ:
Եվրոպական և այլ իրավապաշտպան կազմակերպությունները, որոնք մեղադրում են Վրաստանի իշխանություններին մարդու իրավունքների խախտումների և ռուսամետ դիրքորոշման մեջ, բավականին հանդուրժող են Հայաստանի իշխանությունների գործողությունների նկատմամբ։ Դա պայմանավորված է նրանով, որ Հայաստանում իշխանամետ քարոզչությունը ուղղակիորեն մեղադրում է ձերբակալվածներին Ռուսաստանի օգտին գործելու և Կրեմլի կողմից կազմակերպված դավադրությանը մասնակցելու մեջ։
Եվրոպական մարդու իրավունքների և ժողովրդավարական ինստիտուտները շփոթված են՝ պաշտպանե՞լ մարդու իրավունքները, թե՞ Նիկոլ Փաշինյանի «հակառուսական» քաղաքականությունը։ Վերջիվերջո, Փաշինյանը հաղթում է, և ահաբեկումը Հայաստանում թափ է հավաքում։ Ինչ վերաբերում է Միացյալ Նահանգներին, ժողովրդավարական և մարդու իրավունքների ինստիտուտները այնտեղ լիովին փակվել են։
Մինչդեռ եթե նախկինում Հայաստանում մարդու իրավունքների խախտումների զոհերը գիտեին, որ կարող են դիմել միջազգային կազմակերպություններին աջակցության համար, այժմ նրանք ստիպված են հույսը դնել միայն իրենց վրա։
Որոշ վերլուծաբաններ ասում են, որ քաղաքացիական անհնազանդության բացակայության դեպքում ձերբակալությունների, ճնշումների և բռնապետության ալիքը կհասնի յուրաքանչյուրին, և ոչ ոք չի ապահովագրվի գիշերային խուզարկություններից, հարցաքննություններից և ձերբակալություններից։
Առնվազն երկու փաստաբան՝ Էրիկ Ալեքսանյանը և Ռոման Երիցյանը, անժամկետ գործադուլ են հայտարարել իրենց գործընկեր Կոչուբաևի ձերբակալությունից հետո՝ Facebook-ում արված գրառման համար։ Ճիշտ է, սա բավականին «վտանգավոր» գրառում էր իշխանությունների համար, քանի որ կոչ էր պարունակում իրավապահ մարմինների, այսպես ասած՝ «օրինական բռնության» կրողներին, որոնց վրա հենվում է Փաշինյանը։ Սակայն, իրավական պետությունում նման պատճառով ձերբակալությունները թույլատրելի չեն։
Կոչեր են արվում բոլոր փաստաբաններին բոյկոտ հայտարարել և այդպիսով արտահայտել իրենց բողոքը։ Նմանատիպ կոչ է արվում նաև քահանաներին, ովքեր մինչ այժմ հավատարմորեն կատարել են իրենց առաքելությունը և խոնարհաբար բանտ են գնում՝ որպես երկնային փորձություն։
«Թավիշը» մաշվել է, և տակից դուրս են ցցվել մուրճն ու անագե քարտեզը։
«Արարիչ» հասարակական կազմակերպության նախաձերնությամբ կազմակերպվեց «Նկարիչ, Արցախ նկարիր» խորագրով միջոցառում։
«Տարիներ առաջ Արցախում անցկացված «Նկարիչ, Արցախ նկարիր» նախաձեռնությունը նոր կյանք ստացավ «Արարիչ» հասարակական կազմակերպությունում։
Նախաձեռնության նպատակը մնում է նույնը՝ յուրաքանչյուրի ներսում պահպանված Արցախը պատկերել գույներով, ձևերով ու հույզերով։
Միջոցառմանը միացել են «Արարիչ» ՀԿ-ի երիտասարդներն ու երեխաները՝ «զինված» վրձիններով ու ներկապնակներով:
Յուրաքանչյուր մասնակից իր հոգու Արցախն էր պատկերել՝ եկեղեցիներ ու բերդեր, քաղաքային տեսարաններ, մշակութային օջախներ ու արցախյան բնության անկրկնելի գույներ:
Միջոցառմանը ներկա էին Արցախի Ներքին գործերի նախարար Կարեն Սարգսյանը, ինչպես նաև «Արարիչ» հասարակական կազմակերպության անդամները, կամավորներ, հյուրեր։
Ողջույնի խոսքում շեշտվեց երիտասարդների դաստիարակության, հայրենասիրական մտածողության և ազգային ինքնության պահպանման կարևորությունը։
Թեժ և ջերմ մթնոլորտում հնչեցին հայրենասիրական երգեր, իսկ միջոցառման ավարտին կազմակերպվել էր փոքրիկ հյուրասիրություն։
Երեխաների ստեղծագործությունները ներկայացվել են ցուցադրության ձևաչափով՝ որպես յուրօրինակ պատգամ խաղաղության և վերադարձի հավատին։
«Նկարիչ, Արցախ նկարիր» նախաձեռնությունը ևս մեկ անգամ վկայեց, որ Արցախն ապրում է մեր հիշողության, գույների և ստեղծագործ հոգու մեջ», ասված է կազմակերպության հայտարարության մեջ:
Հիշեցնենք որ «Արարիչ» բարեգործական հիմնադրամը Արցախում իրականացնում էր բազմաթիվ կրթական ծրագրեր երեխաների և երիտասարդների համար։ Հիմնադրամը չի դադարեցրել գործունեությունը անգամ շրջափակման ընթացքում, մինչև արցախցիների հարկադիր տեղահանությունը դեպի Հայաստան։
Հայաստանում՝ «Արարիչը» շարունակում է իր գործունեությունը որպես ՀԿ և նպատակ ունի միավորել երեխաներին, դեռահասներին և երիտասարդներին, ովքեր ձգտում են գիտակցել իրենց ինքնությունը, պատրաստ են ստեղծել նոր իրականություն՝ ավելի գիտակից, ավելի խորը, ավելի համարձակ։
Արսեն Աղաջանյան
Հանրապետության տարածքում հոկտեմբերի 18-20-ին սպասվում է առանց տեղումների եղանակ։ Օդի ջերմաստիճանն հոկտեմբերի 20-21-ին գիշերը կբարձրանա 4-5 աստիճանով։
Երևանում հոկտեմբերի 18-20-ին սպասվում է առանց տեղումների եղանակ։
Մայրաքաղաքում առաջիկա գիշերը կլինի +6-ից +8, իսկ վաղը ցերեկը՝ +21-ից +23 աստիճան։
Ձերբակալվել են Խաչատուր Աբովյանի անվան հայկական պետական մանկավարժական համալսարանի ռեկտորը և պրոռեկտորներից մեկը: Այս մասին հայտնում են հակակոռուպցիոն կոմիտեից՝ հաստատելով, որ Հակակոռուպցիոն կոմիտեի կողմից իրականացվող քրեական վարույթի շրջանակներում են ձերբակալվել ռեկտորը և պրոռեկտորը։
Ինչպես հայտնում են հակակոռուպցիոն կոմիտեից, վերջիններս մեղադրվում են համալսարանի տարբեր աշխատակիցներից կազմված հանցավոր կազմակերպություն ստեղծելու և ղեկավարելու, առանձնապես խոշոր չափերով վատնում և խարդախություն կատարելու, ինչպես նաև կաշառք ստանալու մեջ: Քրեական վարույթի շրջանակներում ձերբակալվել են նաև համալսարանի մի շարք այլ աշխատակիցներ: