ԱՄՆ նախագահի շանտաժն ու Ադրբեջան-Արցախ կոնֆլիկտը

2025թ. դեկտեմբերի 29-ին ԱՄՆ նախագահ Դոնալդ Թրամփն ԱՄՆ-ում Իսրայելի վարչապետ Բենիամին Նեթանյահուի հետ ընդլայնված հանդիպման ժամանակ Ադրբեջան-Արցախ կոնֆլիկտի համատեքստում խոսելով Հայաստանի և Ադրբեջանի ղեկավարների մասին, մասնավորաբար, հայտարարել է. «Առևտուր։ Նրանք առևտուր են անում։ Ես ասացի. «Մենք կդադարեցնենք ձեզ հետ առևտուրը։ Այլևս ոչ մի առևտուր»: Երկուսի հետ էլ… Հետո ես 200 տոկոսանոց մաքսատուրք դրեցի… հաջորդ օրը նրանք զանգահարեցին… 35 տարվա պայքար, և նրանք դադարեցին»:

Մեջբերվածը վկայում է, որ ԱՄՆ նախագահը Հայաստանի և Ադրբեջանի հետ խոսել է շանտաժի լեզվով: Աքսիոմատիկ ճշմարտություն է, որ շանտաժով անհնար է հասնել հուսալի, հիմնարար լուծման ընդհանրապես, Ադրբեջան-Արցախ կոնֆլիկտի պարագայում մասնավորապես:

Ակնհայտ է, որ առևտուրը դադարեցնելու և մաքսատուրքը բարձրացնելու անլուրջ և անհուսալի միջոցներով հնարավոր չէ լուծել ավելի քան 107 տարվա պատմություն ունեցող Ադրբեջան-Արցախ կոնֆլիկտը:

Հետևաբար, ստեղծված իրավիճակը ոչ թե կոնֆլիկտի լուծում է, այլ՝ անավարտ և անարդար խաղաղություն, որը չի կարող լինել մշտական, այն լինելու է անկայուն և հակված վերափոխվելու պատերազմի:

ՍՏԵՓԱՆ ՀԱՍԱՆ-ՋԱԼԱԼՅԱՆ
քաղաքագետ