Թուրք բլոգերը Ստեփանակերտ է մտնում, փորձում բացել Ս. Հակոբ եկեղեցու դուռը (Հեքիմյանի եկեղեցի), սակայն չի ստացվում, քանի որ Աստված փակել է այն: Բարձրանում է Ս. Աստվածածին առաջնորդանիստ եկեղեցի, այս մեկը բաց է, բայց այստեղ էլ մտնել թույլ չի տալիս Աստված:
Բլոգերի տեսանյութում երեւում է, որ եկեղեցու հարեւանությամբ գտնվող Առաջնորդարանի պատերից քերել են խաչերը:
Եկեղեցու խաչերը տեղում են: Տեսանյութը հրապարակված է երկու ամիս առաջ:
Մարութ Վանյան
2023 –ի պատերազմից հետո, երբ Արցախն ամբողջությամբ անցավ Ադրբեջանի վերահսկողության տակ, “Արցախ կարպետ” ընկերության՝ Ստեփանակերտի և Ճարտարի արտադրամասերը դադարեցրին իրենց գործունեությունը, ինչի արդյունքում հարյուրավոր աշխատողներ զրկվեցին աշխատանքից և տեղահանվեցին Հայաստան։
Ընկերությունն իր գործունեությունը սկսել է 2013-ի ամռանը։ Արցախում արտադրություն հիմնելու գլխավոր նպատակը գորգագործությունը՝ որպես հայկական մշակույթի անբաժան մաս, պահպանելը, հանրությանը ներկայացնելն ու ապագա սերունդներին փոխանցելն է։ Նախքան 44-օրյա պատերազմը՝ ընկերությունն ուներ շուրջ 150 աշխատակից։ Արտադրամասեր էին գործում Ստեփանակերտում, Շուշիում, Ճարտարում, Հադրութում և Բերձորում: Թշնամու վերահսկողության տակ անցած արտադրամասերում են մնացել հայկական մշակութային ժառանգության խորհրդանիշ համարվող բացառիկ գորգեր։
Այսօր “Արցախ կարպետ” ընկերությունում աշխատում է ընդամենը 5 գորգագործ։ Ընկերությունն իր արտադրանքը ներկայացնում է Երևան քաղաքի Տաշիր առևտրի կենտրոնում։
-2020-ի պատերազմից հետո 60 աշխատողներով շարունակեցինք մեր գործունեությունը Ստեփանակերտի և Ճարտարի մեր արտադրամասերում։
2017-ին ընկերությունը Երևան քաղաքում խանութ էր բացել, և ամեն ամիս մենք գորգեր էինք ուղարկում, որոնք նախատեսվում էին խանութի համար։ Հենց այդ գորգերն են փրկվել, որոնք այսօր առկա են մեր խանութում։ 2023-ի Արցախի տեղահանումից հետո խանութում տեղ ենք հատկացրել գորգագործության համար, տեղադրել 5 հաստոց։ Մեր գորգագործներն արցախցիներ են․ 3 հոգի՝ Ստեփանակերտի մասնաճյուղից, 2-ը՝ Շուշիից։ Ունենք նաև մեկ տնայնագործ, նախատեսում ենք 2 տնայնագործ ևս ավելացնել եկող տարուց։ Գորգագործության հետ մեկտեղ հայկական գորգանախշերով և արցախյան խորհրդանիշներով արտադրում ենք հագուստ, շարֆեր, սեղանի սփռոցներ, ծածկոցներ, պայուսակներ, տարբեր աքսեսուարներ, գուլպաներ, խաղալիքներ։ Բոլորը ձեռագործ աշխատանքներ են, որոնք վաճառվում են ինչպես խանութում, այնպես էլ ՝ օնլայն հարթակում։ 2023-ից հետո ընկերությունը վեր է ածվել ձեռագործ արվեստների և արհեստների ընկերության։
Բռնատեղահանումից հետո սկսել ենք “Ձեռագործված է Հայաստանում” նախաձեռնությունը, որի նպատակն էր Արցախից տեղահանված, ձեռագործության մեջ հմտացված կանանց համար ստեղծել հարթակ, որպեսզի նրանք կարողանան զբաղվել ձեռքի աշխատանքներով։ Ծրագիրը միտված է լուծելու և՛ սոցիալական, և՛ հոգեբանական խնդիրները։ Արցախցի շնորհաշատ կանանց ձեռքերով մանկական հագուստից սկսած պատրաստվել են տարբեր տեսակի ձեռագործ իրեր՝ այն ամենը, ինչ հնարավոր է պատրաստել թելով։
Սկզբից նախաձեռնությանը միացել է շուրջ 100 արցախցի կին։ Տրամադրվել են հումք և դիզայն, ապա նրանք ներկայացրել են պատրաստի արտադրանքն ու աշխատանքի դիմաց ստացել համապատասխան գումարը։ Նախաձեռնությունը շարունակվում է, այս պահին մեզ հետ համագործակցում են մոտ 30 կանայք,-ասում է ընկերության տնօրեն Սևակ Խաչատրյանը։
“Արցախ կարպետ“–ի խանութ–սրահներում կարելի է գտնել հայկական գորգարվեստին առնչվող ամեն ինչ, ձեռագործ իրեր, հագուստ, աքսեսուարներ, հուշանվերներ: 2024-ին “Արցախ Կարպետ“ ընկերությունը և “Fakejian Jewelry“–ն՝ ոգեշնչված արցախյան հարուստ գորգարվեստով, ստեղծել են արցախյան զարդերի անկրկնելի հավաքածու՝ ինչպես կանանց, այնպես էլ՝ տղամարդկանց համար։ Ընկերությունը շարունակում է ընդլայնել իր արտադրանքը՝ սպառողներին ներկայանալով նոր գաղափարներով։
Կարինե ԲԱԽՇԻՅԱՆ
Արցախյան 44-օրյա պատերազմի մասին պատմող Շողակաթ Վարդանյանի «1489» ֆիլմը հաղթող է ճանաչվել Հռոմի վավերագրական ֆիլմերի միջազգային փառատոնում։ Այդ մասին «Ֆեյսբուքի» իր էջում տեղեկացրել է ֆիլմի ռեժիսոր Շողակաթ Վարդանյանը։
«Սա մեծ պատիվ և մեծ պատասխանատվություն է»,-գրել է Վարդանյանը։
Հիշեցնենք, որ 44–օրյա պատերազմի մասին պատմող «1489» ֆիլմը Հայկական ազգային կինոակադեմիան» չներկայացրեց «Օսկարի»` չնայած, որ ֆիլմը 2023 թ. արժանացել է Ամստերդամի վավերագրական ֆիլմերի միջազգային փառատոնի (IDFA) գլխավոր մրցանակին, նաև դոկումենտալ կինոյի աշխարհի ամենահեղինակավոր կինոփառատոնում՝ IDFA-ում արժանացել էր«լավագույն ֆիլմ» գլխավոր մրցանակին։
Ֆիլմը ներկայացնում է Վարդանյանների ընտանեկան մթնոլորտը, նրանց հույզերը, ապրումները, տառապանքը, սպասումները 2020 թվականի 44-օրյա պատերազմի օրերին, երբ նրանք կորցնում են կապը ռազմաճակատում գտնվող սիրելի որդու, սիրելի եղբոր՝ 21-ամյա Սողոմոն Վարդանյանի հետ։
«Երևանի ու Բաքվի միջև խաղաղության հաստատման հարցում հասել ենք ամենամոտ կետին», – երկրի խորհրդարանում նախօրեին հայտարարել է Թուրքիայի արտգործնախարար Հաքան Ֆիդանը՝ շեշտելով՝ «Հարավային Կովկասում խաղաղության հասնելու հույսի շող կա»։
Ֆիդանը նշել է, որ Թուրքիան աջակցում է խաղաղության բոլոր ջանքերին։
Սիրիայում իրականացրած բլիցկրիգից եւ Քրդիստանի ստեղծումը իր հարավում կանխարգելուց հետո Էրդողանը անցնում է հյուսիսային սահմանին՝ Հայաստանին։ Սիրիայի գրավումից հետո նա ասել է, որ Ասադը չի ընդունել “լավ առաջարկները”, դրա համար ամեն ինչ այսպես ստացվեց։ Դա զգուշացում է հաջորդ “թիրախներին”՝ ընդունեք մեր առաջարկը, թե չե կլինի այնպես, ինչպես Արցախում եւ Սիրիայում։
Հիմա Էրդողանը հայտարարում է, որ «տարածաշրջանում ստեղծված պատմական հնարավորությունը» կնպաստի Բաքվի և Երևանի միջև խաղաղության համաձայնագրի կնքմանը։
Իսկ ի՞նչ է “առաջարկում” Թուրքիան Հայաստանին։ Որպեսզի Հայաստանը ճանաչի ներկայիս Թուրքիայի սահմանները, որոնք 100 տարուց ավելի է գոյություն ունեն ռուս-թուրքական անօրեն պայմանագրի եւ Հայաստանի լռության շնորհիվ միայն։ Թուրքիայի սահմանները հաստատված են Լոզանի պայմանագրով, որը Էրդողանը համարում է սպառված։ Սակայն Թուրքիան չունի միջազգայնորեն հաստատված հյուսիսային սահման Հայաստանի հետ։ Ռուս-թուրքական պայմանագրերը ճանաչված չեն ՄԱԿ-ի կողմից։
Ահա թե ինչու Բաքուն շարունակում է պնդել, թե “Հայաստանի և Ադրբեջանի միջև կայուն խաղաղության հասնելու համար երկու հիմնական խոչընդոտ կա”՝ պնդելով Հայաստանի Սահմանադրության փոփոխության անհրաժեշտությունը, որտեղ, ըստ Բաքվի, տարածքային պահանջ կա Ադրբեջանի նկատմամբ։ Սակայն խոսքը ոչ միայն այսպես կոչված Ադրբեջանի, այլ Թուրքիայի մասին է։ Հիշեցնենք, որ Անկախության հռչակագիրը, որին հղում է անում ՀՀ Սահմանադրությունը, հիշատակում է նաեւ Ցեղասպանության հարցը եւ պատմական պատասխանատվությունը։
ՀՀ Սահմանադրությունը տարածքային պահանջ չի պարունակում հարևան երկրների նկատմամբ, X-ում գրել է Նիկոլ Փաշինյանն, չհիշատակելով Թուրքիան։
Ադրբեջանի փոխարտգործնախարար Էլնուր Մամեդովն է նշել, թե ՀՀ Սահմանադրության մեջ «նշվում է, որ Ղարաբաղը Հայաստանի մաս է»։
Փաշինյանը հակադարձել է՝ հիշեցնելով Հայաստանի Հանրապետության Սահմանադրական դատարանի 2024-ի սեպտեմբերի 26-ի որոշումը, որտեղ նշվում է, որ Սահմանադրության նախաբանում Անկախության հռչակագրի հղումը վերաբերում է բացառապես հռչակագրի այն դրույթներին, որոնք ամրագրված են Սահմանադրության հոդվածներում։
Այսինքն, Հայաստանը չի պատրաստռվում փոխել Սահմանադրությունը, եւ Փաշինյանը դա հայտարարում է Մակրոնի եւ Թրամփի հետ հանդիպումից հետո։
“Սիրիական սցենարը” Թուրքիան, Ռուսաստանը եւ Իսրայելը՝ ԱՄՆ եւ ԵՄ-ի հետ կոնսենսուսի գալով, փորձարկել են 2023-ին Արցախում։ Հիմա՝ այդ սցենարից խուսափելու համար Հայաստանը կարող է միայն մեկ քայլ անել՝ հաստատել իր օրինական սահմանները եւ պահանջել, որ դա անի միջազգային հանրությունը։
Լուսանկարները Մարութ Վանյանի
Հայաստան-Թուրքիա սահմանին անցած ամիս տեղի է ունեցել երկու երկրների մի քանի գերատեսչությունների ներկայացուցիչների հանդիպումը, «Ազատության»-ը հայտնեց Հայաստանի բանագնաց, խորհրդարանի փոխխոսնակ Ռուբեն Ռուբինյանը։ Հանդիպման վերաբերյալ, սակայն, պաշտոնական տեղեկություն այդ օրերին կողմերը չեն հաղորդել: Հայտնի չէ, թե երկու երկրներից ինչ պաշտոնյաներ կամ մասնագետներ են մասնակցել սահմանին կայացած հանդիպմանը։
Երևանի բանագնացն այսօր էլ շատ մանրամասներ չհայտնեց, միայն փոխանցեց. – «Գնահատվել են տեխնիկական կարիքները, որոնք հնարավորություն կընձեռեն գործարկել Ախուրիկ/Աքյաքա երկաթուղու սահմանային անցակետը: Հանդիպումն անցել է դրական և կառուցողական մթնոլորտում»:
Թուրքիայից չեն թաքցնում՝ հայ-թուրքական հաշտեցումն ուղիղ կապ ունի հայ-ադրբեջանական կարգավորման հետ: Երկու օր առաջ նույնը պնդել է այդ երկրի խորհրդարանի միջազգային հարաբերությունների հարցերով հանձնաժողովի նախագահ Ֆուաթ Օքթայը՝ խաղաղության հաստատման համար կարևոր պայման համարելով նաև այսպես կոչված «Զանգեզուրյան միջանցքի» բացումն ու Հայաստանի Սահմանադրությունը փոխելու Բաքվի պահանջի կատարումը:
Հիշեցնենք, որ այսօր Էրսողանն ու Ալիեւը հեռախոսազրույցում քննարկել են Հարավային Կովկասում և Սիրիայում տիրող իրավիճակը։ Նշվում է, որ զրույցը տեղի է ունեցել Ալիեւի նախաձեռնությամբ։
«Հայաստանի Հանրապետության համար պետական և դիմակայունության կառուցման պայմանագիր» բյուջետային աջակցության ծրագրի շրջանակներում այս շաբաթ Եվրոպական Միությունը 1.5 միլիոն եվրո դրամաշնորհ է փոխանցել Հայաստանի Հանրապետության կառավարությանը՝ ի լրումն այս տարի սեպտեմբերին հատկացված 13.5 միլիոն եվրո դրամաշնորհի: Այդ մասին հայտնում են ԵՄ հայաստանյան գրասենյակից:
2020 թվականի 44-օրյա պատերազմի և Հադրութի շրջանի օկուպացիայի արդյունքում ոչնչացման սպառնալիքի տակ է հայտնվել շրջանի ողջ մշակութային և պատմական ժառանգությունը։ 2021 թվականին Երևանում բացվեց DizakArt մշակութային և երիտասարդական կենտրոնը, որի հիման վրա հետագայում ստեղծվեց նույնանուն հասարակական կազմակերպությունը։
Կազմակերպության հիմնադիրներն են Հադրութից փախստականներ Երազիկ Հայրիյանը, Լիաննա Պետրոսյանը և Գայանե Բուդաղյանը։ Կազմակերպության նպատակն էր՝ պահպանել Հադրութի շրջանի փրկված նյութական և ոչ նյութական մշակութային և պատմական արժեքները։
«Հադրութից բռնագաղթելուց որոշ ժամանակ անց՝ լինելով Արցախի Հանրապետության Հադրութի շրջանի մշակույթի և երիտասարդության հարցերի բաժնի պետ, սկսեցի մտածել Հադրութի շրջանի մշակութային և պատմական ժառանգության մասին։ Այն մասին, թե ինչպես պահպանենք մեր ավանդույթները, սովորույթները, բարբառը և այլն։ Այս գաղափարի շուրջ համախմբեցի համախոհներին՝ Լիաննա Պետրոսյանին և Գայանե Բուդաղյանին։ 44-օրյա պատերազմի ընթացքում Մոսկվայում տեղի ունեցած սիմպոզիումի ժամանակ ներկայացվել են 27 նկարներ, որոնք նկարվել են Հադրութում եւ մարմնավորում էին տարածաշրջանի հայկական էությունը։ Սիմպոզիումի շնորհիվ դրանք փրկվել են։
Որոշեցինք պատկերասրահ բացել և փրկված ցուցանմուշները տեղափոխել Հայաստան։ Պատկերասրահը հիմք դարձավ մշակութային-երիտասարդական կենտրոնի ստեղծման, այնուհետև DizakArt մշակութային հասարակական կազմակերպության համար։ Սկզբնական շրջանում դա անկյուն էր, որտեղ մեր հադրութցի հայրենակիցները կարող էին հանդիպել ու շփվել միմյանց հետ։ Հետագայում ընդլայնվեց կազմակերպության գործունեության շրջանակը։ Հասարակական կազմակերպության ձևաչափով առաջին լուրջ միջոցառումը «Դիզակի գույները» միջազգային սիմպոզիումն էր, որի նպատակն էր հանրությանը ներկայացնել Դիզակի ողջ գեղեցկությունն ու հայկական էությունը։ Սիմպոզիումի շրջանակներում կազմակերպվել է ցուցահանդես։ Դրանում ներկայացված էին այն 27 կտավները, որոնք փրկվել էին 44-օրյա պատերազմի ընթացքում:
2021 թվականից սկսած մենք ակտիվորեն սկսեցինք զարգացնել գործունեությունը թե՛ Արցախում, թե՛ Հայաստանում։ Երևանում, իսկ ավելի ուշ Աբովյանում բացվեցին երիտասարդական մշակութային կենտրոններ, որտեղ Արցախից սեղահանված երեխաներն անվճար մշակութային կրթություն են ստանում։ Գործում են տարբեր խմբակներ՝ վոկալ, ազգային պար, նկարչություն, կիրառական և թատերական արվեստի, մեր երեխաները նաև սովորում են նվագել հայկական ազգային երաժշտական գործիքների վրա և մասնակցում տարբեր հայկական և միջազգային ստեղծագործական մրցույթների՝ արժանանալով մրցանակների։
Այսպիսով, այս տարի մեր աշակերտներից մեկը Ռուսաստանի Դաշնության Վլադիմիր քաղաքում անցկացված նկարչական մրցույթում գրավեց առաջին տեղը։ Մեր երեխաներից շատերը բարձր միավորներով ընդունվել են Հայաստանի բարձրագույն ուսումնական հաստատությունների համապատասխան ֆակուլտետներ։ Հասարակական կազմակերպության շրջանակներում անցկացվում են նաև արցախյան բարբառով մշակութային տարբեր միջոցառումներ և թատերական ներկայացումներ։
Նման ներկայացումների միջոցով մենք փորձում ենք հանրայնանել և պահպանել մեր բարբառն ու ավանդույթները։ Որոշ ներկայացումների սյուժեն այն կյանքի իրավիճակների մարմնավորումն է, որոնց բախվել են արցախցիներն իրենց կյանքի ամենադժվար ժամանակաշրջաններում։
Մենք նաև անցկացնում ենք տարբեր դասընթացներ՝ մասնավորապես հաշվապահություն, համակարգչային գիտություն, տարբեր վարպետության դասեր։ Արցախի ստեղծագործողներին աջակցելու համար կազմակերպվում են միջոցառումներ՝ ցուցահանդեսներ, գրքերի շնորհանդեսներ և այլն։
Այսպիսով, Արցախում և Հայաստանում 2021 թվականից սկսած երեք անգամ կազմակերպել ենք հայկական ավանդական ազգային խաղեր։ Ամեն ամառ մեր սաների համար Աբովյանում կազմակերպվում են մշակութային կրթական ճամբարներ։
Մեր նպատակն է նաեւ սոցիալական աջակցությունն արցախցիներին, այդ թվում՝ զբաղվածության առումով։ Այսպիսով, կենտրոնի բոլոր ուսուցիչներն արցախցի են։ Կենտրոնը կարողացավ համախմբել արցախյան հասարակության տարբեր շերտերին։
Ներկայումս կենտրոններում սովորում է ավելի քան 150 երեխա և դեռահաս։ Մինչև 2023 թվականի սեպտեմբերը «ԴիզակԱրտ»-ը գոյություն է ունեցել մասամբ Արցախի պետբյուջեի հաշվին, քանի որ մեր ուսուցիչների աշխատավարձերը վճարվում էին այնտեղից։ Ամբողջական արտաքսումից հետո կազմակերպությունը գոյություն ունի հովանավորչական ներդրումների և պետական փոքր դրամաշնորհների շնորհիվ։ Մենք երախտապարտ կլինենք բոլորին, ովքեր կաջակցեն մեզ մեր նախագծերի մշակման և իրականացման գործում»,- Step1.am-ի հետ զրույցում ասաց DizakArt-ի համահիմնադիր Երազիկ Հայրիյանը։
Արսեն Աղաջանյան
Արցախի Ազգային ժողովն Անկախության հանրաքվեի օրվա առթիվ այսօր ընդունեց հայտարարություն՝ ուղերձներ հղելով միջազգային հանրությանը։ Այս մասին Արցախի ԱԺ արտահերթ նիստից հետո ասաց Արցախի ԱԺ պատգամավոր Աշոտ Դանիելյանը։
«Սպասելիքներն այս պահին այդքան էլ շատ չեն, որովհետեւ երբ մենք Արցախում էինք, հայտարարություններ էր անում Ազգային ժողովը, թե ինչպիսի իրավիճակ էր Արցախում, եւ միջազգային հանրությունը քայլեր պետք աներ։ Ցավոք, բայց չեղավ դա։ Այսօր ՀՀ իշխանությունները փորձում են Արցախի մասին ամեն ինչ մոռացության տալ, բայց չի կարելի մոռանալ, որ 1991 թվականին, երբ ԽՍՀՄ-ը փլուզվում էր, սեպտեմբերի 2-ին ԼՂԻՄ մարզային խորհուրդը եւ Շահումյանի շրջանային խորհուրդը որոշում ընդունեցին Անկախության հռչակագրի մասին։ Եվ դրան հետեւեց դեկտեմբերի 10-ի հանրաքվեն, որտեղ մասնակցել են մոտ 110 հազար արցախցիներ եւ միասնական «այո» են ասել անկախությանը։
Այդ ժամանակ մոտ երկու տասնյակ միջազգային դիտորդներ կային Արցախում, որոնք միայն արձանագրեցին, որ ադրբեջանական ագրեսիայի եւ ռմբակոծության ժամանակ արցախցիները հետ չէին կանգնում, դուրս եկան ու «այո» ասացին անկախությանը։ Եվ այդ օրը մենք ունեցանք 10 քաղաքացիական զոհ։ Այսինքն՝ պատերազմ էր, ռմբակոծություն էր, բայց մարդիկ դուրս եկան եւ իրենք «այո»-ն պետք է ասեին։ Եվ այսօր Հայաստանի իշխանությունները, եթե սա ուզում են մոռացության տալ, դա չի ստացվելու։ Երբ Հայաստանում կլինեն ազգային իշխանություններ, այս բոլոր հարցերին մանրակրկիտ կանդրադառնան»,- ասաց նա։
Աշոտ Դանիելյանի խոսքով՝ երբեք ուշ չի լինում, հնարավոր է նորից հետ բերել այն, ինչ կորցրել ենք։ Նա նշեց նաեւ, որ Արցախի ԱԺ-ն լեգիտիմ մարմին է՝ Արցախի ժողովրդի առաջնային մանդատն ունեցող։ Արցախի ներկայացուցչությունը գործում է, պատգամավորներն աշխատում են, հանդիպում են բնակչությանը, եղած ռեսուրսներով անում են այն աշխատանքը, որը հնարավոր է իրականացնել։
Արցախի Ազգային ժողովն այսօր հրավիրել է արտահերթ նիստ՝ 1991 թվականի Արցախի անկախության հանրաքվեի և 2006 թվականին Սահմանադրության ընդունման կապակցությամբ։
Կոչ է ընդունվել ՄԱԿ-ի անդամ երկրներին և ԵԱՀԿ Մինսկի խմբի համանախագահներին՝ ճանաչել Արցախի անկախությունը և նրա Սահմանադրությունը։
Նույն օրը Ադրբեջանի ԱԳՆ ղեկավարի տեղակալն ասել է, որ «խաղաղության պայմանագրի» կնքման խոչընդոտը Հայաստանի Սահմանադրությունն է, որում «Ղարաբաղը Հայաստանի մաս է»։ Բաքուն նշում է, որ քանի դեռ Հայաստանի Սահմանադրությունը չի փոխվել, ուժի մեջ է 1989 թվականի դեկտեմբերի 1-ի որոշումը Հայաստանի և Արցախի վերամիավորման մասին։
Արցախի անկախության հանրաքվեն տեղի ունեցավ 1991 թվականի դեկտեմբերի 10-ին այն բանից հետո, երբ Հայաստանի խորհրդարանը 1991 թվականի սեպտեմբերի 21-ին որոշեց հանրապետության տարածքում հանրաքվե անցկացնել՝ առանց հաշվի առնելու 1989 թ. որոշումը։ Եվ սա չնայած այն հանգամանքին, որ 1990 թվականին ընդունված Անկախության հռչակագրում ասվում էր, որ Հայաստանի անկախությունը կառուցվել է, ի թիվս այլ բաների, Հայաստանի և Արցախի վերամիավորման ակտի վրա։
Այսպես թե այնպես, 2023 թվականի սեպտեմբերի 19-20-ին Արցախը կորցրեց իր անկախ պետականությունը, և նրա կարգավիճակը վերադարձավ 1989թ. որոշմանը։ Այս որոշումը նույնկերպ անտեսվում է թե՛ Հայաստանի, թե՛ Արցախի իշխանությունների կողմից։
Արցախի Ազգային ժողովը պետք է հանդիպեր դեկտեմբերի 1-ին և պահանջեր համաշխարհային հանրությունից դատապարտել 2020-2023 թվականների ահաբեկչական պատերազմը, հայտարարել դրա արդյունքները չճանաչելու և ԵԱՀԿ Մինսկի խմբի սկզբունքների հիման վրա բանակցությունները վերսկսելու մասին։
Այսօր տեղի է ունեցել Արցախի Հանրապետության Ազգային ժողովի արտահերթ նիստը՝ Արցախի անկախության հանրաքվեի օրվա առթիվ։
«Ընդունվեց ուղերձ, որով դիմում ենք ՄԱԿ-ի անդամ պետություններին՝ ճանաչելու Արցախի անկախությունը եւ Սահմանադրությունը։ Ինչպես նաեւ քննարկվեցին վերադարձի խնդիրները։ Ճիշտ է, մենք այս 30 տարիների ընթացքում համոզվեցինք, որ միջազգային հանրությունը որպես այդպիսին գոյություն չունի, որովհետեւ այդ 30 տարիների ընթացքում ոչ մեկ ուշադրություն չդարձրեց, որ փոքրիկ մի էթնոս ուզում է ինքնորոշվել, սակայն նրա ցանկությունը չի ընդունվում։ Միգուցե այսօր հնարավոր դառնա հասկանալ, որ չի կարելի խաղալ ժողովրդի ճակատագրի հետ։ Այսօր տեղահանված արցախցիները շատ ծանր հոգեվիճակի մեջ են»,- նիստից հետո ասաց Արցախի ԱԺ նախկին պատգամավոր Արզիկ Հարությունյանը։
Անդրադառնալով ՀՀ իշխանությունների վարած քաղաքականությանը՝ նա ասաց, որ հույս չի կապում ՀՀ այսօրվա իշխանությունների հետ։ Նա նշեց, որ դեռ շատ վաղուց Հայաստանը պետք է ճանաչեր Արցախի անկախությունը։ «Սակայն հույսն այն է, որ միգուցե ՄԱԿ-ի անդամ պետություններից կարողանան անդրադարձ կատարել, առավել եւս Մինսկի խմբի համանախագահ պետությունները, որոնք տարիներ շարունակ զբաղվել են Արցախի հարցով, գուցե թե նորից վերականգնվի նրանց օրինական իրավունքները, եւ Արցախի հարցը նորից դրվի քննարկման»,- ասաց նա։
Այսօր տեղի է ունեցել Արցախի Հանրապետության Ազգային ժողովի արտահերթ նիստը՝ Արցախի անկախության հանրաքվեի օրվա առթիվ։
Նիստին հրավիրված են եղել նաեւ ՀՀ ԱԺ պատգամավորներ։ ՀՀ ԱԺ պատգամավոր Գառնիկ Դանիելյանը նիստից հետո լրագրողներին ասաց, որ կարեւոր ուղերձներ են ընդունվել։ Այդ ուղերձները կփոխանցվեն միջազգային հանրությանը, Մինսկի խմբի եռանախագահ երկրներին։
«Արցախի հարցը փակված չէ, էթնիկ զտում ու ցեղասպանություն է տեղի ունեցել։ Եվ դրա արդյունքում հայրենազրկվել են 150 հազար մեր քույրերն ու եղբայրները։ Եվ մեր պարտքն է, որպեսզի ամեն օր աշխատել է այդ ուղղությամբ։ Նույն միջազգային հանրության տարբեր դերակատարներն էլ են դրա մասին բազմաթիվ հայտարարություններ արել։ Եվ մենք պետք է ամեն ինչ անենք, որպեսզի արցախահայերի վերադարձի իրավունքը դառնա օրակարգ։ Ցավոք սրտի, միակ երկիրը Հայաստանի Հանրապետությունն է, որն այդ ուղղությամբ որեւէ քայլ չի ձեռնարկում։ Ողբերգությունն այն է, որ դրա մասին խոսում են շատ երկրներ, բացի ՀՀ կառավարությունից եւ իշխանություններից»,- ասաց նա։