Արարատ Միրզոյանը Անատոլիական գործակալությանը տված հարցազրույցի մեջ նշել է, որ երկու կարևոր հարցերի շուրջ Երեւանն ու Բաքուն տարբեր մոտեցումներ ունեն։
«Այս խնդիրներից առաջինը վերաբերում է երկու երկրների սահմանազատման սկզբունքներին, իսկ մյուսը՝ տարածաշրջանային հաղորդակցություններին ու փոխկապակցվածությանը»,- ասել է արտգործնախարարը:
«Ոչ ոք նոր սահմաններ գծելու իրավասություն չունի։ Երևանը ցանկանում է, որ որ Ալմա-Աթայի հռչակագիրը ներառվի խաղաղության պայմանագրի նախագծում։ Այս հարցում Հայաստանը չի կարողանում դրական արձագանք ստանալ Ադրբեջանից»,- ասել է Հայաստանի արտգործնախարարը։
Միրզոյանն նաեւ ընդգծել է. «Մենք դեմ ենք, որ Հայաստանի տարածքով անցնող հաղորդակցային ուղիներով ապրանքների և մարդկանց անվտանգությունն ապահովվի երրորդ երկրների կողմից. տարածաշրջանում տրանսպորտային ուղիները պետք է լինեն այն երկրի ինքնիշխանության և իրավազորության ներքո, որտեղ դրանք գտնվում են»։ Միրզոյանն ընդգծել է, որ թեմայի վերաբերյալ ադրբեջանական կողմը համարժեք արձագանք չի տվել:
Մինչդեռ վերջին տասն օրում վարչապետ Փաշինյանն ու իր թիմը փակ դռների հետևում մի քանի հանդիպում են անցկացրել, սակայն ժամեր տևած քննարկումներից հանրությանը գրեթե ոչինչ հայտնի չէ: ԶԼՄ-ները գրում են, որ խոսքը “անկլավների” մասին է, եւ հանձնման դեպքում “երկու խնդիրներն” էլ կլուծվեն։ Հատկապես՝ հաղորդակցությունների վերահսկողության հարցը։
«Հրապարակ» թերթի տվյալներով, «անցած շաբաթ խորհրդարանում Նիկոլ Փաշինյանը ՔՊ-ի հետ հանդիպման ընթացքում խոսել է Տավուշի այն չորս գյուղերի մասին, որոնք Ադրբեջանն առաջնահերթ պահանջում է հանձնել իրեն։ Փաշինյանը թիմակիցների հետ խոսելիս շեշտել է, որ դրանց մեջ Տիգրանաշենը չի մտնում, բոլորն էլ Տավուշի մարզում են։ Այսպիսով՝ հայտնի է, թե խոսքը որ չորս գյուղերի մասին է․ Բաղանիս-Այրում, Ներքին Ոսկեպար, Խեյրիմլի եւ Կըզըլ Հաջիլի»:
Անկլավների հարցերը օրակարգ եկան այն ժամանակ, երբ Նիկոլ Փաշինյանը հայտարարեց, որ ճանաչում է Ադրբեջանի տարածքային ամբողջականությունը 86 600 քկմ տարածքում եւ այն գյուղերը, որոնք Ադրբեջանը պահանջում է, մտնում են այդ տարածքի մեջ: Այս մասին NEWS.am-ի հետ զրույցում նշեց ԱԺ «Հայաստան» խմբակցության պատգամավոր Քրիստինե Վարդանյանը:
«Մեր հանրությունը պետք է իմանա, որ եթե Տավուշից գյուղեր են հանձնվում եւ այդտեղ տեղակայվում են ադրբեջանցիներ, ինչպես օրինակ, Գորիս-Կապան ճանապարհին, դա կազմաքանդում է մեր ամենակահավորված առաջնագիծը: Բացի այդ, 4 գյուղերը հանձնելու դեպքում 5 տեղ Երեւան-Թբիլիսի միջպետական ճանապարհին տեղակայվում են ադրբեջանական զորքեր, եւ այդ ճանապարհը մեզ համար դառնում է անօգտագործելի։ Ստացվում է, որ Հայաստանը Իրանին եւ Վրաստանին կապող ճանապարհներին նստած են լինում ադրբեջանցիները: Մենք յուրահատուկ անկլավ ենք դառնում»,- ասաց նա:
Մենք Տավուշից արտագաղթ ենք ունենալու: Եւ դրանով ոչ թե ավարտվում է, այլ սկսվում է հանձնման նոր փուլ: Հետո մեզնից քանի՞սը գիտեն, որ Հայաստան եկող գազատարը անցնում է Վերին Ոսկեպարով, աել է նա:
Կարելի է ենթադրել, որ Տիգրանաշենը “պահում” են “սփեշլ” դեպքի համար․ երբ “կարգավորվեն” Թուրքիայի հետ հարաբերությունները եւ բացվի Ջերմուկ-Երասխ-Մարգարա միջանցքը։
