Սեպտեմբերի 23-ից Ստեփանակերտի «Նոյ» և «Նադեժդա» սրահներում ժամը 10:00-20:00 անվճար տաք սնունդ կտրամադրվի Ադրբեջանի ռազմական ագրեսիայի հետևանքով տարհանված և սննդի կարիք ունեցող քաղաքացիներին: Այս մասին տեղեկացնում է Արցախի տեղեկատվական շտաբը:
Հեղինակ՝ naira
Բոբ Մենենդեսին, որը հայկական շահերն էր պաշտպանում, հեռացրին, պարզ է, թե ով
ԱՄՆ սենատոր Բոբ Մենենդեսը ժամանակավորապես լքել է Ներկայացուցիչների պալատի արտաքին հարաբերությունների ազդեցիկ հանձնաժողովի ղեկավարի պաշտոնը՝ կաշառակերության մեղադրանքների պատճառով, հայտնում են BBC-ն և Reuters-ը։
ԱՄՆ արդարադատության նախարարության դատախազները պնդում են, որ Մենենդեսը և նրա կինը՝ Նադինը /հայուհի/, հարյուր հազարավոր դոլարներ են ընդունել Եգիպտոսի կառավարությանը օգնություն հատկացնելու դիմաց։
Մենենդեսին վերջին 10 տարվա ընթացքում երկրորդ անգամ են մեղադրում կոռուպցիոն հանցագործությունների մեջ։ Սենատորը մեղադրվում է երեք հանցագործության մեջ, այդ թվում՝ կաշառակերության, դավադրության մասնակից լինելու մեջ, հայտնում է CNN-ը։
Մենենդեսը, որին հաջորդ տարի սպասվում է վերընտրություն, ուրբաթ օրը հերքել է մեղադրանքները: Սենատի մեծամասնության առաջնորդ Չաք Շումերը հայտարարել է, որ Մենենդեսը ժամանակավորապես կհեռանա Սենատի արտաքին հարաբերությունների հանձնաժողովի նախագահի պաշտոնից։
Հիշեցնենք, որ Մենենդեսը պատրաստել էր Արցախում էթնիկ զտումների մասին որոշման նախագիծ, որն արդեն երեւի չի քննարկվի։ Նախագիծն առաջարկում էր պատժամիջոցներ Ալիեւի դեմ եւ 907-րդ ուղղման գործարկում։
Հայաստան է այցելում ԱՄՆ կոնգրեսական պատվիրակություն՝ սենատոր Գերի Փիթերսի գլխավորությամբ. Նա կմեկնի Սյունիք
ՀՀ-ում ԱՄՆ դեսպանությունը ողջունում է սենատոր Գերի Փիթերսի (դեմոկրատ, Միչիգան նահանգ) գլխավորած կոնգրեսական պատվիրակությանը Հայաստանում։
Ս․թ․ սեպտեմբերի 22-25-ը Հայաստան կատարած այցի ընթացքում սենատոր Փիթերսը կհանդիպի ՀՀ վարչապետ Նիկոլ Փաշինյանի, ՀՀ ազգային ժողովի նախագահ Ալեն Սիմոնյանի, ՀՀ արտաքին գործերի նախարարի տեղակալ Պարույր Հովհաննիսյանի և այլ շահագրգիռ անձանց հետ՝ քննարկելու հայ-ամերիկյան հարաբերությունները և Լեռնային Ղարաբաղի հայ բնակչության վրա Ադրբեջանի վերջին ռազմական գործողությունների ազդեցությունը։ Սենատոր Փիթերսը ծաղկեպսակ կդնի Հայոց ցեղասպանության զոհերի հուշահամալիրում։
ԱՄՆ դեսպանությունից հայտնում են, որ նա նաև կմեկնի Սյունիք՝ հանդիպելու տեղի պաշտոնատար անձանց և քննարկելու անվտանգային ու հումանիտար մարտահրավերները։
ԱՄՆ-ն Թուրքիային կոչ է արել աջակցել Լեռնային Ղարաբաղում մարտերը դադարեցնելու ջանքերին
Միացյալ Նահանգները Թուրքիային կոչ է անում աջակցել Լեռնային Ղարաբաղում ռազմական գործողությունները դադարեցնելու ջանքերին։ Այս մասին ասվում է ԱՄՆ Պետդեպարտամենտի մամուլի ծառայության ղեկավար Մեթյու Միլերի գրավոր հայտարարության մեջ։ Այն տարածվել է Նյու Յորքում ՄԱԿ-ի Գլխավոր ասամբլեայի 78-րդ նստաշրջանի շրջանակներում ԱՄՆ պետքարտուղար Էնթոնի Բլինքենի և Թուրքիայի արտգործնախարար Հաքան Ֆիդանի հանդիպման արդյունքներով։
«Պետքարտուղարը շնորհակալություն է հայտնել Թուրքիային Սևծովյան հացահատիկի նախաձեռնության վերականգնմանն ուղղված շարունակական ջանքերի համար։ Բացի այդ, նա կոչ է արել աջակցել այն ջանքերին, որոնք ուղղված են Լեռնային Ղարաբաղում ռազմական գործողությունների դադարեցմանը և այնտեղ հումանիտար իրավիճակի վատթարացմանը կանխելուն»,- նշվում է փաստաթղթում։
Միլերը նաև ասել է, որ Բլինքենը կողմ է արտահայտվել Անկարայի կողմից Հյուսիսատլանտյան դաշինքին միանալու Շվեդիայի դիմումի արագ հաստատմանը։ «Պետքարտուղարն ընդգծել է ՆԱՏՕ-ին Շվեդիայի անդամակցության շուտափույթ վավերացման անհրաժեշտությունը», – ասվում է Միլերի հայտարարության մեջ:
Ստեփանակերտ․ հաց են թխում վառարանների վրա
Արդեն 4 օրն է Արցախում լույս չկա, մարդիկ վառարաների վրա փորձում են հաց թխել՝ մնացած ալյուրով: Իսկ վառարանը վառում են ձմռան համար նախատեսված փայտով:
Ասում են, որ ձմեռներն էլ կգան Արցախ, գարուններն էլ, բայց չգիտեն նրանք կլինեն Արցախում, թե չէ:
Հայկական պատ. ցանկացած քայլ տանում է դեպի մատ, պատը միայն կարելի է կոտրել
Հայ ազգը հայտնվել է պատային իրավիճակում, երբ ցանկացած քայլ ճակատագրական է։ Շախմատային “պատը”՝ հայկական «պատ» է, սահման, Արարատ, որի հետևում անշունչ անապատ է, թմբիրներ։
Արցախյան ազգային-ազատագրական պայքարի հիմքի վրա կառուցված Հայաստանի անկախության 30-ամյա շրջանն ավարտվեց հիմքի, էության ավերումով։ Շենքը կամաց-կամաց քանդվում է, իսկ թշնամիները՝ ներսից ու դրսից, սեպեր են մտցնում ճեղքերի մեջ։
Մարդիկ Երևանում փողոց են դուրս եկել՝ սեպտեմբերի 19-ին բացելով իրենց աչքերը և տեսնելով հայկական պատն իրենց առջև՝ չգիտեն ուր գնալ և ինչ անել այս պատի հետ։
Աջից ասում են՝ ձախ մի՛ գնացեք, Նիկոլն այնտեղ է, հանուն իր իշխանության պատրաստ է ամեն ինչ հանձնել թուրքերին։ Իրեն Հայաստանի «ինքնիշխանության» պահապան հռչակած Նիկոլը պատրաստ վաճառել ինքնիշխան «կուսությունը»՝ առանց արցախյան հիմքի։
Ձախից գոռում են՝ աջ մի՛ գնա, այնտեղ ռուսներն են ու նրանց կամակատարները։ Արցախի նոր ղեկավարությունը, Հայաստանում ազգային ցասումին կառավարելու պատրաստ ուժերը մեղադրվում են Հայաստանը ռուսական գավառի վերածելու մտադրության մեջ։ Նրանց «սազանդարություն են» անում ռուս պատգամավորները, որոնք արդեն խոսում են Հայաստանում բոլշևիկների «ժամանակավոր կառավարություն» ստեղծելու մասին։ Բավական է, ասում են, անկախութուն խաղալ։
Թուրքերն ասում են՝ հայրիկի մոտ արի, ռուսներն ասում են՝ մայրիկի մոտ։ Երկուսն էլ բնազդաբար ձգվում են դեպի Հայաստան՝ որպես երկուսի “ծննդավայր”։
Արևմուտքը, որին ձգտում է հայկական աշխարհի քաղաքակիրթ հատվածը, ի դեմս ՄԱԿ-ի անդամների քարտ բլանշ է տալիս՝ թույլ չտալ ղարաբաղցիներին դուրս գալ թակարդից, թույլ տալ Հայաստանի “ժողովրդավարական” իշխանությանը ավարտին հասցնել մահաբեր ծրագիրը, չմտցնել միջազգային խաղաղապահ զորքեր։ Այստեղ էլ պատ է։
Թուրք-բոլշևիկյան թակարդը մոտ է շրխկոցով փակվելուն։ Հայաստանից դուրս հոգեվարքը ավելի հստակ է զգացվում, քան ներսից։ Մարդիկ, որոնց նախկինում հազիվ թե կարելի էր կասկածել հայերին համակրելու մեջ, գրում են կարեկցական մահախոսականների նման տեքստեր՝ հանկարծ հիշելով, որ հայերը «ոչ պակաս հին ազգ են», հասկանալի է՝ ում հետ համեմատ։ Նրանք մարգարեանում են, ասելով, որ եթե հայկական արմատը հանվի այս հողից, մի ահռելի ակոս կանցնի ողջ մեծ տարածաշրջանով մեկ։ Արդեն բացահայտ ասում են, որ Պուտինն ու Էրդողանը Ղրիմը փոխանակել են Հայաստանի հետ։ Ղրիմը Ուկրաինա կամ Ռուսաստան չէ, Ղրիմը թաթարներինն է, ասում են Պուտինն ու Էրդողանը։ Դե, իհարկե։
Հայաստանի ներսում գզվռտում են, իրար մեղադրում, լեզու չեն գտնում իրար մեջ ու չեն դնում ինքնապահպանման բնազդով թելադրված միակ նպատակը՝ չթողնել, որ արմատախիլ անեն։
Արամ Ա կաթողիկոսը համաժողովրդական մոբիլիզացիայի կոչ է անում։ Նա ավելի լավ գիտի, նա ապրում է Օիկումենեի հենց կենտրոնում, որտեղ ծնվել է ներկայիս համաշխարհային քաղաքակրթությունը և որտեղ հայկական արմատը հազարավոր տարիներ արմատախիլ չեն արել՝ գիտակցելով, որ հակառակ դեպքում ամեն ինչ կփլվի։ Հայկական ծառը պարբերաբար «էտում» են, բայց արմատներն ավելի ու ավելի են խորանում։ Այնտեղ գիտեն, որ «տերա, տարածք» բառի հիմքում ընկած է հայերեն «տեր» բառը՝ սեփականատեր։ Նրանք գիտեն, որ հայերեն «ոստան» բառը «մատրիցայի» աղբյուրն է։
Անդրիաս Ղուկասյանը համաժողովրդական հանրահավաքի կոչ արեց՝ Վազգեն Մանուկյանի Ազգային կոմիտեի, ԱԺԿ-ի և նրանց՝ ուսանողների, արցախցիների, բաց աչքերով մարդկանց հետ միասին, ովքեր ճանապարհ են փնտրում՝ ճեղքելու պատը։ Այն չես կարող կոտրել առանձին: Եվ պետք է հարվածեք մեկ կետին, այլ ոչ ամբողջ պատին: Եվ թույլ չտալ, որ արմատները հանվեն:
Նաիրա Հայրումյան
Արցախի ՄԻՊ-ը և այլ մարմիններ երկու օրում ստացել են ավելի քան 600 դիմում անհետ կորածների վերաբերյալ
Վերջին 2 օրվա ընթացքում Արցախի Մարդու իրավունքների պաշտպանի աշխատակազմը և պետական այլ համապատասխան մարմիններ ստացել են ավելի քան 600 զանգ և խնդրանք անհետ կորածների վերաբերյալ։ Ինչպես տեղեկացնում է «Արմենպրես»-ը, այս մասին X-ի իր միկրոբլոգում գրել է Արցախի մարդու իրավունքների պաշտպան Գեղամ Ստեփանյանը։
ՊԲ ստորաբաժանումները թողնում են դիրքերը․ ՌԴ խաղաղապահ առաքելություն
Ռուսաստանի Դաշնության զինծառայողների վերահսկողության ներքո սկսվել է Լեռնային Ղարաբաղի Պաշտպանության բանակի ստորաբաժանումների զենք-զինամթերքի հանձնումը: «Արմենպրես»-ի հաղորդմամբ՝ այս մասին հաղորդագրություն է տարածել Լեռնային Ղարաբաղում տեղակայված ՌԴ խաղաղապահների «Տելեգրամ»-ի ալիքը։
« Բացի այդ, Ղարաբաղի զինված կազմավորումները թողնում են իրենց դիրքերը Եվլախում հանդիպման ժամանակ ձեռք բերված պայմանավորվածությունների շրջանակներում։ Այսօրվա դրությամբ հանձնվել է ավելի քան 800 միավոր հրաձգային զենք, նռնակներ, ականանետեր, հակատանկային կառավարվող հրթիռներ, զենիթահրթիռային համալիրներ»,- նշված է հաղորդագրության մեջ։
Լեռնային Ղարաբաղում տեղի ունեցող իրադարձությունները հավասարազոր են ցեղասպանության. Մելանի Օ՛Բրայեն
Երկու տարի առաջ Ցեղասպանության հետազոտողների միջազգային ասոցիացիայի նախագահ Մելանի Օ’Բրայենը զգուշացրել էր, որ Լեռնային Ղարաբաղում տեղի ունեցած իրադարձությունները հավասարազոր են ցեղասպանություն: Երկու տարի անց նրա մտավախությունները բազմիցս հաստատվեցին, այն աստիճան, որ նա և իր գործընկերները դիմեցին ՄԱԿ-ին՝ դադարեցնելու տեղի ունեցողը:
Blankspot-ին տված բացառիկ հարցազրույցում նա բացատրում է, թե ինչու են Ադրբեջանի գործողությունները համարվում ցեղասպանություն:
«Ակնհայտ է, որ Ադրբեջանը հարձակվում է Լեռնային Ղարաբաղի հայերի վրա, քանի որ նրանք հայ են։ Այդպիսով, խումբը համարվում է էթնիկ և/կամ ազգային, որոնք երկուսն էլ պաշտպանված խմբեր են՝ համաձայն Ցեղասպանության կոնվենցիայի», – ասում է Մելանի Օ’Բրայենը:
Նրա խոսքով՝ ցեղասպանության գործընթացը հաջողությամբ պսակվեց Լաչինի միջանցքի շրջափակման շնորհիվ։
«Լաչինի միջանցքի շրջափակումը և առողջապահական ծառայություններից օգտվելու մերժումը ցույց են տալիս Լեռնային Ղարաբաղը հայերից ոչ միայն էթնիկական մաքրման, այլև նրանց ֆիզիկապես ոչնչացնելու մտադրությունը։ Սննդի և բժշկական օգնության մերժումը հանգեցնում է միայն մահվան, և այդ գործողությունները ցեղասպանության կարևոր մասն են, ինչը մենք տեսել ենք այլ ցեղասպանություններում, ներառյալ Հոլոքոստը, Հայոց ցեղասպանությունը, Կամբոջայի ցեղասպանությունը և Ռոհինջաների ցեղասպանությունը»:
Նա նշել է. «Ադրբեջանն ասել է, որ կբացի Լաչինի միջանցքը, որպեսզի ազատ արձակի Լեռնային Ղարաբաղի բնակիչներին։ «Սակայն նրանք չեն կարողանա վերադառնալ։ Այսպիսով, Լեռնային Ղարաբաղի այս 120,000 մարդկանց ընտրությունը մնում է հետևյալը՝ ցեղասպանություն ենթարկվում սովի և բժշկական օգնության բացակայության պատճառով: Եվ դա այն դեպքում, երբ Միջազգային դատարանը հասկացրեց Ադրբեջանին, որ Լաչինի միջանցքի շրջափակումն ուղղակի վտանգ է ստեղծում հայերի համար»,-ասաց նա՝ հավելելով, որ Ադրբեջանը լիովին գիտակցում է դա։
«Ադրբեջանը գիտի Հաագայի բանաձեւի մասին, բայց շարունակում է շրջափակումը։ Բացի այդ, Ադրբեջանը վերջին օրերին ռմբակոծում է քաղաքացիական բնակավայրերը, ինչը նույնպես համարվում է ռազմական հանցագործություն։ Ադրբեջանի կողմից գրավված ու օկուպացված գյուղերից հազարավոր մարդիկ փախել են՝ այլ ելք չունենալով։ Ադրբեջանն այժմ սպանում է ռմբակոծությունների, սովի և բժշկական օգնությունից հրաժարվելու միջոցով: Ադրբեջանը հայտարարել է, որ սնունդ և վառելիք է մատակարարելու Լեռնային Ղարաբաղ, բայց դեռ պետք է պարզել, թե արդյոք դա կարվի՞ 9 ամիս նման մարդասիրական կարիքները մերժելուց հետո»:
Նրա գնահատմամբ՝ ցեղասպանության ռիսկի գործոնները Լեռնային Ղարաբաղում գոյություն ունեին երկար տարիներ, այդ թվում՝ ատելության հրահրումը և հայկական մշակութային ժառանգության վայրերի, ինչպիսիք են եկեղեցիների ոչնչացումը:
«Ատելության խոսք և դեմոնիզացում, ի թիվս այլ բաների, տեղի է ունենում երկրի ղեկավարների կողմից, լրատվամիջոցներում և դպրոցական մակարդակում: Սակայն 2022 թվականի դեկտեմբերից, երբ Ադրբեջանը փակեց Լաչինի միջանցքը, ապա Լեռնային Ղարաբաղի մյուս ճանապարհները, հենց այդ ժամանակ մենք տեսանք, որ ցեղասպանության վտանգը մեծանում է»,- նշել է նա։
Վարդան Թադևոսյան. Կարմիր խաչի միջոցով կփորձենք ծանր վիրավոր երեխային տեղափոխել Հայաստանի Հանրապետություն
Իրավիճակը փոխվում է ամեն րոպե, բայց կարող եմ ասել, որ այս պահին մի քանի տասնյակ մահվան դեպքեր են գրանցվել, որոնց թվում, ավաղ, կան խաղաղ բնակիչներ, նաեւ՝ մանկահասակ երեխա։ Այս մասին Step1.am-ի հետ զրույցում ասաց Արցախի առողջապահության նախարար Վարդան Թադևոսյանը։
«Նրա եղբայրը ծանր վիրավոր է, ևս մեկ ծանր վիրավոր երեխա կա. Այժմ մենք փորձում ենք կազմակերպել այս տղայի տարհանումը մոր և մահացած երեխայի մարմնի հետ Հայաստանի Հանրապետություն։ Նոր տեղեկացա, որ Կարմիր Խաչի աջակցությամբ վիրավորները Մարտունիից տեղափոխվել են Ստեփանակերտի Հանրապետական հիվանդանոց, որտեղ նրանց բուժումը կշարունակվի։
Ցավոք սրտի, մենք խնդիրներ ունենք Մարտակերտից զոհվածների մարմինների և ծանր վիրավորների տեղափոխելու հարցում, ինչը պայմանավորված է նրանով, որ ուղեկցող ռուս խաղաղապահներ չկան։ Հուսով ենք, որ վաղը դա կարող ենք անել եւս Կարմիր Խաչի օգնությամբ:
Աշխատում ենք կազմակերպել 30 ծանր վիրավորների տեղափոխումը Հայաստան՝ այնտեղ բուժումը շարունակելու համար, շատ ենք ուզում, որ դա տեղի ունենա այսօր։ Մենք աշխատում ենք Հայաստանի առողջապահության նախարարության հետ այս աշխատանքները կազմակերպելու համար, և ես ուրախ եմ, որ ԿԽՄԿ-ն համաձայնել է ուղեկցել և տրամադրել մեքենաները, որոնք պետք է ժամանեն Հայաստանից»,- ասաց Վարդան Թադևոսյանը։
Հարցին, թե եղե՞լ են դեպքեր, երբ մարդիկ մահացել են տարհանման անհնարինության պատճառով, նախարարը պատասխանեց. «Ցավոք սրտի, եղել են դեպքեր, երբ հնարավոր չի եղել փրկել վիրավորների կյանքը օգնության ուշացման պատճառով»։
Ինչ վերաբերում է մարզերի հետ կապին, ապա, ըստ Վարդան Թադևոսյանի, «պատերազմի մեկնարկից մեկ ժամ անց անջատվել է էլեկտրաէներգիան և կապը, որն մինչեւ այդ էլ վատ էր աշխատում, բայց հիմա գրեթե ամբողջությամբ ընդհատված է»։ «Այս պայմաններում դժվար է աշխատել նույնիսկ փոքր հեռավորությունների վրա։ Եվ սա հանգեցնում է խնդիրների, բայց մենք փորձում ենք հաղթահարել այդ խնդիրները։ Ինչ վերաբերում է դեղերին, փառք Աստծո, կա ռեզերվ, և կարծում եմ, որ առաջիկայում ավելի շատ կստանանք Հայաստանի Հանրապետությունից»,- նշեց Թադևոսյանը։
Ա.Գրիգորյան
ՄԻԵԴ-ն ամբողջությամբ բավարարել է ՀՀ կառավարության պահանջը և միջանկյալ միջոց կիրառել ընդդեմ Ադրբեջանի
ՄԻԵԴ-ն ամբողջությամբ բավարարել է ՀՀ կառավարության պահանջը և միջանկյալ միջոց կիրառել ընդդեմ Ադրբեջանի: Ինչպես հաղորդում է «Արմենպրես»-ը, այս մասին հայտնում է Միջազգային իրավական հարցերով ՀՀ ներկայացուցչի գրասենյակը։
«Հաշվի առնելով այն հանգամանքը, որ Լեռնային Ղարաբաղում ստեղծված իրավիճակը հանգեցնում է Կոնվենցիայով երաշխավորվող իրավունքների խախտման լրջագույն վտանգի և չնայած սույն թվականի սեպտեմբերի 20-ին ձեռք բերված հրադադարի համաձայնության՝ սույն թվականի սեպտեմբերի 22-ին Մարդու իրավունքների եվրոպական դատարանը, բավարարելով ՀՀ կառավարության ներկայացրած պահանջը, Ադրբեջանի նկատմամբ կիրառել է միջանկյալ միջոց: Մասնավորապես,ՄԻԵԴ-ը Ադրբեջանին պարտավորեցրել է ձեռնպահ մնալ ցանկացած գործողության իրականացումից, որը կարող է հանգեցնել Կոնվենցիայի 2-րդ (կյանքի իրավունք) և 3-րդ (խոշտանգման արգելք) հոդվածներով երաշխավորվող իրավունքների խախտմանը:
ՄԻԵԴ-ը նաև որոշում է կայացրել այս մասին հրատապ ծանուցել ԵԽ Նախարարների կոմիտեին»,- ասվում է ՀՀ ներկայացուցչի գրասենյակի հայտարարության մեջ:
Բանակցություններ են ընթանում զորքի հետքաշման և քաղաքացիների՝ բնակավայր վերադառնալու գործընթացը կազմակերպելու համար
Ռուս խաղաղապահների միջնորդությամբ բանակցություններ են ընթանում ադրբեջանական կողմի հետ՝ զորքերի հետ քաշման գործընթաց կազմակերպելու և ռազմական ագրեսիայի հետևանքով տարհանված քաղաքացիների՝ իրենց բնակավայրերը վերադարձն ապահովելու ուղղությամբ: Այս մասին հայտնում է Արցախի տեղեկատվական շտաբը։
Միաժամանակ քննարկվում է նաև քաղաքացիների Արցախ մուտքի և Արցախից ելքի ընթացակարգը: