Հայաստանում ԱՄՆ դեսպան Քրիստինա Քվինն այսօր՝ օգոստոսի 18–ին, այցելել է Ջերմուկ։ Այս մասին տեղեկանում ենք Ջերմուկի քաղաքապետարանի ֆեյսբուքյան էջից։
Լուսանկարներից պարզ է դառնում, որ դեսպանին ուղեկցում է ԱՄՆ–ում Հայաստանի դեսպան Լիլիթ Մակունցը։
Այցից այլ մանրամասներ այս պահին չեն հաղորդվում։
Արցախի Հանրապետության նախագահ Արայիկ Հարությունյանը օգոստոսի 17-ին հանդիպել է աշխարհազորի մի խումբ մարտիկների հետ։
Նրանց առաջարկով երկրի նախագահը ներկայացրել է Արցախի անվտանգության ապահովման, ցեղասպանության հետագա ընթացքի կասեցման և հումանիտար աղետի հաղթահարման ուղղությամբ իրականացվող քայլերը։ Ընդգծվել է Արցախի առջև ծառացած մարտահրավերներին դիմակայելու համար բոլորի ջանքերի համախմբման և պետական համակարգի կայունության անհրաժեշտությունը։
Հայաստանի Հանրապետության պահանջով հրավիրված ՄԱԿ Անվտանգության խորհրդի հրատապ նիստի ընթացքում ևս մեկ անգամ արձանագրվեց, որ միջազգային գործընկերները, չնայած Ադրբեջանի կողմից իրականացվող կեղծ քարոզչությանը, հստակորեն գիտակցում են Լեռնային Ղարաբաղում ծանրագույն հումանիտար իրավիճակի փաստն ու դրա հասցեագրման կարևորությունը։ Այս մասին հայտարարություն է տարածել Հայաստանի ԱԳ նախարարությունը:
Հատկանշական էին անդամ պետությունների և ԵՄ ներկայացուցչի ելույթներն առ այն, որ Ադրբեջանը պարտավոր է վերացնել Լաչինի միջանցքի ապօրինի արգելափակումը՝ համաձայն 2020թ. նոյեմբերի 9-ի եռակողմ հայտարարության և ՄԱԿ-ի Արդարադատության միջազգային դատարանի փետրվարի 22-ի և հուլիսի 6-ի՝ իրավական պարտադիր ուժ ունեցող որոշումների։ Աներկբայորեն ընդգծվեց, որ արդեն ութ ամսից ավել շարունակվող շրջափակման հետևանքով ԼՂ բնակչության համար ստեղծված ծանր հումանիտար իրավիճակը պետք է վերացվի։
Ակնհայտ է, որ Ադրբեջանը շարունակում է խեղաթյուրել միջազգային հանրության կոչերը, կեղծ և իրականությանը չհամապատասխանող պատրվակներ փնտրել` չիրականացնելու իր պարտավորությունները և, երկարաձգելով հումանիտար ճգնաժամը, ներառյալ սովամահության միջոցով էթնիկ զտումների ենթարկել Լեռնային Ղարաբաղի բնիկ ժողովրդին։ Ավելին, Ադրբեջանը փորձում է շահարկել միջազգային դերակատարների ցանկացած «հավասարակշիռ» մոտեցում՝ այն մեկնաբանելով որպես իր որդեգրած քաղաքականության շարունակման թողտվություն:
Ընդգծում ենք ԼՂ-ում հումանիտար ճգնաժամի վերացման ուղղությամբ առկա միջազգային ողջ գործիքակազմի օգտագործման և Լաչինի միջանցքով երկու ուղղություններով անխափան տեղաշարժի վերականգնման և ԼՂ միջազգային մարդասիրական կազմակերպությունների անարգել մուտքի ապահովման հրատապությունը:
ՀՀ արտաքին գործերի նախարարությունը, բարձր գնահատելով միջազգային անվտանգությանը և խաղաղությանը նպաստելու իրենց մանդատին հավատարիմ ՄԱԿ Անվտանգության խորհրդի անդամ պետությունների սկզբունքային և արդար դիրքորոշումները, շարունակելու է աշխատանքները տարբեր հարթակներում, այդ թվում՝ ՄԱԿ Անվտանգության խորհրդում, հետևողական քայլերի գործադրմամբ Լաչինի միջանցքի ապաշրջափակման և Լեռնային Ղարաբաղում հումանիտար ճգնաժամի հաղթահարման ուղղությամբ»,- ասված է ԱԳՆ-ի հայտարարության մեջ:
Լաչինի միջանցքում տեղակայված ապօրինի անցակետի մոտակայքում ադրբեջանական կողմը կտրել է համացանցի օպտիկամանրաթելային մալուխը՝ խափանելով Արցախի կայուն կապը համացանցի հետ, «Ֆեյսբուք»-ի իր էջում գրել է Արցախի պետական նախարարի խորհրդական Արտակ Բեգլարյանը։
«Երեկ՝ օգոստոսի 17-ին, ժամը 17:55-ին, Բերձորի (Լաչինի) միջանցքում տեղակայված ապօրինի անցակետի մոտակայքում ադրբեջանական կողմը կտրել է համացանցի օպտիկամանրաթելային մալուխը՝ խափանելով Արցախի կայուն կապը համացանցի հետ:
Երեկ երեկոյան Արցախի մասնագետները փորձել են ռուս խաղաղապահների հետ միասին մոտենալ տվյալ հատվածին և վերանորոգել մալուխը, սակայն ադրբեջանական կողմը չի թույլատրել: Այսօր առավոտվանից շարունակվում են բանակցությունները խաղաղապահների ու ադրբեջանական կողմի միջև, որպեսզի մեր մասնագետները կարողանան վերականգնել վնասված մալուխը:
Պատահական չեմ համարում, որ այս նոր հանցագործությունը տեղի է ունեցել ՄԱԿ-ի Անվտանգության խորհրդի նիստից հետո և Արցախի ցեղասպանության թեմայով նախատեսված մամուլի ասուլիսի մեկնարկից բառացիորեն 5 րոպե առաջ: Այս սադրանքի հետևանքով ասուլիսի արցախաբնակ բանախոսները՝ ԱՀ Մարդու իրավունքների պաշտպան Գեղամ Ստեփանյանը և տեղահանված քաղաքացի Ալվինա Ներսեսյանը կարողացել են անկայուն ու այլընտրանքային կապով միանալ մյուս երկու բանախոսներին՝ ԱՀ արտգործ նախարար Սերգեյ Ղազարյանին և ՄՔԴ առաջին գլխավոր դատախազ Լուիս Մորենո Օքամփոյին 45 րոպե ուշացումով: Ի հեճուկս ադրբեջանական ջանքերի՝ ասուլիսը կայացել է, որին մասնակցել են շուրջ 130 անձինք 27 երկրից:
Ի դեպ, այժմ Արցախում խիստ սահմանափակ ծավալի համացանց է հասանելի՝ անկայուն ռադիոկապի միջոցով, որը նույնպես շարունակաբար գտնվում է ադրբեջանական խլացուցիչ համակարգերի ճնշման ներքո»,- գրել է Բեգլարյանը:
Արցախի Հանրապետության նախագահ Արայիկ Հարությունյանը օգոստոսի 17-ին ընդունել է ԱՀ Ազգային ժողովի «Ազատ հայրենիք-ՔՄԴ» խմբակցության պատգամավորներին։
Այս մասին տեղեկացանք Արցախի Հանրապետության նախագահի աշխատակազմի տեղեկատվության գլխավոր վարչության տարածած հաղորդագրությունից։
Նախագահը ներկայացրել է արտաքին քաղաքական դաշտում վերջին շրջանում տեղի ունեցած զարգացումները, մասնավորապես՝ անդրադարձել ՄԱԿ-ի Անվտանգության խորհրդի նիստում կայացած քննարկումներին։
Պատգամավորների հետ հանդիպմանը նախագահ Հարությունյանն անդրադարձել է նաև երկրում ստեղծված ծանրագույն սոցիալ-տնտեսական իրավիճակին, ընդգծել հումանիտար աղետի հաղթահարման նպատակով արտաքին և ներքին ներուժի համակարգված օգտագործման անհրաժեշտությունը։
Արցախի պետնախարար Գուրգեն Ներսիսյանը գրում է. Արցախում ստեղծված իրավիճակը 2020 թվականի նոյեմբերի 9-ի եռակողմ հայտարարությամբ կողմերի ստանձնած պարտականությունները չկատարելու հետևանքն է: «Հետևաբար միջազգային հանրության աջակցությունը պետք է հայցել ոչ թե հումանիտար խնդիրների լուծման հարցում, այլ 2020 թվականի նոյեմբերի 9-ի եռակողմ հայտարարության, Արդարադատության միջազգային դատարանի 22.02.2023թ. և 06.07.2023թ. որոշումների կատարման, գազի ու էլեկտրաէներգիայի մատակարարումը վերականգնելու համար»,- գրում է նա։
Արցախի ղեկավարությունը համառորեն կառչած է Եռակողմ հայտարարությանը, որը փորձ է օրինականացնել արցախյան 2020 թվականի ահաբեկչական պատերազմի արդյունքները։ Այս հայտարարությունն այնքան անօրինական է, որ նույնիսկ պատերազմից 3 տարի անց չեն համարձակվում այն անվանել անգամ զինադադարի պայմանագիր։
Արցախի ղեկավարությունը ոչ թե պետք է լուծի Եռակողմ հայտարարության «իրականացման» խնդիրը, այլ մերժի այս հայտարարությունն ու պահանջի միջազգային բանակցություններ։
Նոյեմբերի 9-ի հայտարարության էությունը հանգում է երկու կետի՝ Աղդամի, Քարվաճառի և Քաշաթաղի շրջանների առանց կռվի հանձնում և ռուսական զորքերի տեղակայում՝ հայկական զորքերի դուրսբերմամբ։ Այս հայտարարության մնացած մասը բլա բլա բլա է:
Բաքվում խոստովանել են, որ վերոնշյալ կետերի նման հեշտ «իրականացում» հայկական կողմից չէին սպասում։ Բայց դա եղավ, և Բաքուն պատճառ չունի չշարունակելու ճնշումը, քանի դեռ նա իր դաշնակիցների հետ միասին կարող է առաջ շարժվել։
Հիմա, ըստ ամենայնի, եկել է այն պահը, երբ հայկական կողմի վրա ճնշումը չի ստացվում. ի շնորհիվ Իրանի դիմադրության, մի շարք այլ երկրների դիրքորոշման և դժվարություններին դիմանալու Արցախի հասարակության պատրաստակամության, եթե սա է հայոց պետականության պահպանման գինը։
ՄԱԿ-ի Անվտանգության խորհրդի նիստից առաջ Արցախի նախագահը կոշտ հայտարարություններ է արել՝ միջազգային մեխանիզմների և բանակցությունների միջազգային ձևաչափի անհրաժեշտության մասին։ Հանդիպումից հետո Արցախի ղեկավարությունը չի առարկել Հայաստանի արտգործնախարարի դիրքորոշմանը, որը չի պահանջել միջազգային խաղաղապահներ, կարգավորում՝ միջազգային օրինական նորմերի, այդ թվում՝ ինքնորոշման իրավունքի շրջանակներում։ Նախարարը միայն խղճահարության կոչ արեց՝ խնդրելով բացել ճանապարհը։
Հայաստանը չի հայտարարել հակամարտությունների ուժային կարգավորման անթույլատրելիության և ահաբեկչական պատերազմի արդյունքների չճանաչման մասին։ Փոխարենը Ֆրանսիան հայտարարեց ուժային որոշումների անթույլատրելիության մասին։
ՄԱԿ-ի Անվտանգության խորհուրդը բանաձև չընդունեց նաև այն պատճառով, որ հայկական կողմը քաղաքական որևէ պահանջ չի ներկայացրել, և Ստեփանակերտը դա չի առարկում։
Այժմ Գուրգեն Ներսիսյանը խոսում է Եռակողմ հայտարարության մասին: Արդյո՞ք եռակողմ հայտարարությունը մեզ ձեռնտու է, թե՞ դեռ կան կետեր, որոնք Հայաստանը չի կատարել, օրինակ՝ Զանգեզուրի միջանցքը։
Օգոստոսի 17-ին Հայաստանում Չինաստանի չխոսկան դեսպան Ֆան Յոնգը հանդիպել է լրագրողների հետ եւ հայտարարել, որ «մենք պատրաստ ենք համագործակցել Հայաստանի հետ ավանդական և ոչ ավանդական հակամարտությունները լուծելու և Հարավային Կովկասում խաղաղության հասնելու համար»։
Ֆան Յոնգը հիշեցրել է, որ Չինաստանը և Հայաստանը հնագույն քաղաքակրթություններ են և ունեն համանման հայացքներ՝ պատրաստակամություն հայտնելով համագործակցել Երևանի հետ՝ ուղղված գլոբալ զարգացմանը։
«Հայաստանի և Չինաստանի միջև հարաբերությունները սկսվել են հազարավոր տարիներ առաջ»,- ընդգծել է դիվանագետը։
Չինաստանը լուրջ արդյունքների է հասել անվտանգության ոլորտում և հանդիսանում է ՄԱԿ-ի երկրորդ խաղաղապահ ուժը, որը ակտիվորեն հանդես է գալիս երկխոսության օգտին։ Դիվանագետը հիշեցրել է, որ Պեկինի միջնորդությամբ Սաուդյան Արաբիան և Իրանը վերականգնել են դիվանագիտական հարաբերությունները։ Նրա խոսքով, նշված բոլոր ուղղությունները ենթադրում են հարաբերությունների զարգացում նաև Հայաստանի հետ։
Նա հույս է հայտնել, որ համապատասխան կողմերի ներգրավմամբ Հայաստանն ու Ադրբեջանը կկարողանան ամրապնդել երկխոսությունը, հաղորդակցությունը և համառորեն մոտենալ խնդիրների լուծմանը։
Հայաստանում Չինաստանի դեսպանատան ռազմական կցորդ Ան Ցիանգը նշել է, որ Չինաստանը և Հայաստանը կարող են «համագործակցել միջազգային խաղաղապահության, հումանիտար ականազերծման, ռազմական կրթության, ռազմական բարեփոխումների և տեխնոլոգիաների ոլորտում»։
Չինաստանը գլոբալ մակարդակաում մրցում է Հնդկաստանի հետ։
Ինչպես գրում է Eurasianet-ը, Ղարաբաղը դառնում է Քաշմիրի հակամարտության երկարացում Պակիստանի և Հնդկաստանի համար, երկուսն էլ այժմ զենք են մատակարարում հիմնական պատերազմող կողմերին՝ Հայաստանին և Ադրբեջանին։
Պակիստանի աջակցությունն Ադրբեջանին սերտորեն կապված է Բաքվի գլխավոր հովանավոր Թուրքիայի հետ Իսլամաբադի սերտ ռազմավարական հարաբերությունների հետ: Թեև պաշտոնապես հաստատված չէ, պակիստանցի ռազմական խորհրդականները, ինչպես հաղորդվում է, ներգրավված են եղել Երկրորդ Ղարաբաղյան պատերազմում, գրում է թերթը:
2022 թվականի աշնանը Հնդկաստանն ուժեղացրեց իր աջակցությունը Հայաստանին՝ տրամադրելով 245 միլիոն դոլար արժողությամբ հնդկական հրետանային համակարգեր, հակատանկային հրթիռներ և զինամթերք։
Ղարաբաղյան հակամարտությանը միջամտելու Հնդկաստանի որոշումը պայմանավորված է «Իսլամի հետ ունեցած սեփական բարդ պատմությամբ», գրում է թերթը։ Հնդկաստանի ղեկավարները, վախենալով թուրք-մահմեդականների ազդեցության աճից, անհրաժեշտ են գտել ակտիվացնել համագործակցությունը Հայաստանի հետ։
Հունիսի վերջին ադրբեջանական լրատվական գործակալությունը հրապարակեց մի զեկույց, որտեղ պնդում էր, որ հնդիկներին հավաքագրում են Ղարաբաղում որպես վարձկաններ կռվելու համար: Աշխարհաքաղաքական նոր կոնֆիգուրացիան վկայում է ավանդական միջնորդների ազդեցության թուլացման մասին, ինչպիսիք են ԵԱՀԿ-ն, ՆԱՏՕ-ն և ՀԱՊԿ-ը»,–գրում է թերթը։
Հայաստանի նկատմամբ Իրանի քաղաքական դիրքորոշումը հաշվի է առնվում այլ երկրների կողմից, ինչը բխում է նրանց հռետորաբանությունից, ասել է Կապանում Իրանի գլխավոր հյուպատոս Մորթեզա Աբեդին Վարամինը։ Ըստ ամենայնի, նա նկատի ուներ Էրդողանի այն հայտարարությունը, թե Զանգեզուրի միջանցքին դեմ է ոչ թե Հայաստանը, այլ Իրանը։
Նա կրկնեց Թեհրանի պաշտոնական դիրքորոշումը, որ Իրանը չի ճանաչում տարածաշրջանում սահմանների և քարտեզների փոփոխությունները, և դա վերաբերում է ոչ միայն Հայաստանին, այլև Հարավային Կովկասի մյուս երկրներին։
«Սյունիքի մարզը ռազմավարական նշանակության շատ կարևոր մարզ է»,- ասաց հյուպատոսը։ Եթե Իրանը 100-200 տարվա հարաբերություններ ունի այլ երկրների հետ, ապա Հայաստանի հետ բարեկամությունը խորանում է հազարամյակների մեջ, նշել է նա։
Իրանցի դիվանագետը հույս է հայտնել, որ տարածաշրջանում ոչ մի երկիր ռազմական գործողություններ չի սկսի իր սահմաններից դուրս։
Նաիրա Հայրումյան
Պետնախարար Գուրգեն Ներսիսյանը գրում է․
Ծագած խնդիրների լուծման ուղիները որոշելու համար անչափ կարևոր է բուն խնդրի ճշգրիտ որոշումը: Արցախում ստեղծված իրավիճակը 2020 թվականի նոյեմբերի 9-ի եռակողմ հայտարարությամբ կողմերի ստանձնած պարտականությունները չկատարելու հետևանքն է:
Հետևաբար ոչ թե պետք է ընդամենը բարձրաձայնել հումանիտար խնդիրներ և փորձել փնտրել դրանց լուծման ուղիները, այլ պետք է հասնել եռակողմ հայտարարության կատարմանը:
Ակնհայտ է, որ Արցախի բնակչությունը հումանիտար ճգնաժամի մեջ է հայտնվել արհեստականորեն, Ադրբեջանի դիտավորյալ ու կանխամտածված քայլերի հետևանքով, որպեսզի այդ վիճակից դուրս գալու համար առաջարկության դեմքով պարտադրվեն նաև հումանիտար ճանապարհներ` այդ ամենը ներկայացնելով որպես մարդասիրության վեհ դրսևորում:
Հետևաբար միջազգային հանրության աջակցությունը պետք է հայցել ոչ թե հումանիտար խնդիրների լուծման հարցում, այլ 2020 թվականի նոյեմբերի 9-ի եռակողմ հայտարարության, Արդարադատության միջազգային դատարանի 22.02.2023թ. և 06.07.2023թ. որոշումների կատարման, գազի ու էլեկտրաէներգիայի մատակարարումը վերականգնելու համար:
Այն կատարվելու դեպքում արցախցին ինքնուրույն լուծելու է իր բոլոր հումանիտար խնդիրները և չի լինելու ո՛չ ԿԽՄԿ աջակցության և ո՛չ էլ «փրկության» նոր ճանապարհների կարիքը:
Ի դեպ` փրկության ճանապարհներին ադրբեջանցիների ներկայությունը կամ դրանց մոտ լինելը մեզ համար հումանիտար ճգնաժամ, «անցակետում» հիվանդի արհամարհական հետազոտություն, բերքահավաք անող տեխնիկայի ռազմական թիրախավորում, ԿԽՄԿ տարբերանշանը կրող մեքենայից Վագիֆ Խաչատրյանի առևանգում, մոլորյալ Ռաշիդ Բեգլարյանի գերեվարում և «խաղաղության» հասնելու Ադրբեջանի իշխանությունների կամքը ցայտում ձևով վերահաստատող այլ հետևանքներ է արժենում:
Արցախի ԱԳ նախարար Սերգեյ Ղազարյանն անթույլատրելի է անվանել Լաչինի միջանցքի և այլ հաղորդակցությունների միջև հավասարության նշան դնելը։ Այս մասին նա ասել է Արցախի շրջափակմանը նվիրված օնլայն համաժողովի ժամանակ։
Միևնույն ժամանակ, նա մտահոգություն է հայտնել մի շարք երկրների դիրքորոշման կապակցությամբ, որոնք ցանկանում են Լաչինի միջանցքի և այլ հաղորդակցությունների միջև հավասարության նշան դնել։
«Արցախն ադրբեջանա-ղարաբաղյան խնդրի խաղաղ կարգավորման կարիք ունի։ Սակայն նման բանակցությունները պետք է ընթանան միջազգային ձևաչափով և երաշխիքներով»,-նշել է Ղազարյանը։
Նախարարը հաստատել է, որ առաջարկվել է հանդիպել Եվլախում օգոստոսի սկզբին։
Սակայն Վագիֆ Խաչատրյանի առևանգումը հաստատել է առանց միջնորդների նման հանդիպման անհնարինությունը։ Ղարաբաղյան կողմը պարբերաբար առաջարկություններ է անում, սակայն ադրբեջանական կողմը դրանք անտեսում է։
Նախարարը տեղեկացրել է, որ Արցախում ինտերնետի հետ կապված խնդիրներ են առաջացել: «Ադրբեջանական կողմը միտումնավոր խոչընդոտում է Արցախի մասնակցությանը, որպեսզի վերջինս չկարողանա պատմել ծանրագույն իրավիճակի մասին։ Ուստի նախարարն ինքն է ներկայացրել իրավիճակը»,-նշել է Ղազարյանը։
Նրա խոսքով՝ ներկայիս իրավիճակը ստեղծվել է 2020 թվականի սեպտեմբերին սանձազերծված պատերազմի՝ վարձկանների օգտագործման, Թուրքիայի մասնակցության համար Ադրբեջանի անպատժելիության արդյունքում։
Երեկ մի խումբ արցախցի կանայք բողոքի ակցիայի են դուրս եկել Ստեփանակերտում՝ պահանջելով միջանցքը բացել և ապահովել երեխաների անվտանգությունն ու սնունդը։ Կանանց ընդունել է պետնախարարը և խորհուրդ տվել սպասել ԱԽ-ում քննարկումների արդյունքին, որից հետո հնարավոր կլինի որոշել։
Երեկ ՄԱԿ-ի Անվտանգության խորհրդում շուրջ երկու ժամ քննարկվում էր Արցախի հարցը։ Բանաձևեր չեն ընդունվել, թեև հետագայում չի բացառվում դրանց ընդունումը։ Սակայն Նիկոլ Փաշինյանի այսօրվա ելույթը վկայում է այն մասին, որ Հայաստանը չի պնդի բանաձևերի վրա և շարունակելու է իր «խաղաղ օրակարգը»։
Իրականում ոչինչ չի փոխվել։ Ի՞նչ են մտադիր անել Արցախի իշխանությունները։ ՄԱԿ-ում երեկվա հանդիպման վերաբերյալ Արցախից պաշտոնական հայտարարություններ ու գնահատականներ դեռ չեն եղել։
Tert.am-ին տված հարցազրույցում ԱԺ արտաքին հարաբերությունների հանձնաժողովի նախագահ, ՀՅԴ անդամ Վահրամ Բալայանը նշել է, որ ՄԱԿ-ի Անվտանգության խորհուրդը արձանագրել է իրողությունները, սակայն կոնկրետ միջոցներ ձեռնարկելու մասին չի հայտարարել։ Միաժամանակ նա ՄԱԿ-ի Անվտանգության խորհրդում Ռուսաստանի ներկայացուցչի ելույթն անվանել է «հավասարակշռության փորձ»։ Հիշեցնենք, որ ՌԴ ներկայացուցիչը կրկնել է Լավրովի թեզը «Ադրբեջանի օրենսդրության շրջանակներում ղարաբաղցիների իրավունքների պաշտպանության» մասին։
Դաշնակցությունը, որը փաստորեն Արցախում իշխանության է եկել ի դեմս խորհրդարանի նախագահի, պատրա՞ստ է «Ադրբեջանի օրենսդրության» շրջանակներում ինտեգրվելուն։
Արցախցի քաղաքագետ Դավիթ Կարաբեկյանը հիշեցրել է, որ Լավրովը ՄԱԿ-ի Անվտանգության խորհրդի նիստից առաջ զանգահարել է Բաքվի իր գործընկերոջը և «խնդրել է չանհանգստանալ ԱԽ նիստի որոշման արդյունքով»։
«Ժամանակն է բարձրացնել Արցախի ամբողջական շրջափակման համար Ռուսաստանի ռազմաքաղաքական ղեկավարության իրավական և քաղաքական պատասխանատվության հարցը… Ավելին՝ ողջամիտ հարցում ուղարկել միջազգային դատական և այլ ատյաններ»,- ասաց նա։
ՄԱԿ-ի Անվտանգության խորհրդում քննարկումը Լաչինի միջանցքը բացելու հավաքական կոչ էր, բայց չի ասվում, թե ինչ կլինի, եթե Ադրբեջանը անտեսի այդ կոչը, ասում է Վահրամ Բալայանը։ «Մենք կոնկրետ գործողությունների ենք սպասում ՄԱԿ-ի Անվտանգության խորհրդի անդամներից, նրանք նման հնարավորություն ունեն»,- ասաց նա։
Ստեփանակերտում խոսակցություններ են պտտվում որոշ պաշտոնանկությունների մասին, որոնք սպասվում են օրերս։ Այն բանից հետո, երբ խորհրդարանի նախագահ ընտրվեց ՀՅԴ ներկայացուցիչը, ով դեռ իր դիրքորոշումը չի հայտնել, իսկ ՄԱԿ-ի Անվտանգության խորհուրդը բանաձևեր չի ընդունել, հրաժարականներն անխուսափելի են դառնում։
Օգոստոսի 16- ին, ժամը 22:10-ի սահմաններում Բաքվի զինուժը Մարտակերտի շրջանում խախտել է հրադադարը՝ կիրառելով հրաձգային զենք։ Այս մասին հաղորդում է Պաշտպանության բանակը։ Հայկական կողմում կորուստներ չկան։
Լուսանկարը՝ “Кавказский узел” կայքից
Ռուսական Sputnik Արմենիա գործակալությանը տված հարցազրույցում քաղաքագետ Բենիամին Մաթևոսյանն ասել է, որ Լեռնային Ղարաբաղում ռուս խաղաղապահների դեմ գործողությունները՝ հերթական փորձն են վարկաբեկելու Ռուսաստանի Դաշնության ներկայությունը և, հաշվի առնելով վերջին իրադարձությունները, հարթեցնելու բացասական տեղեկատվական ֆոնը Հայաստանում եվրոպացի դիտորդների շուրջ։
Մաթևոսյանը համոզված է, որ ռուս խաղաղապահների վրա տեղեկատվական հարձակումը ձեռնտու է առաջին հերթին Ադրբեջանին և Արևմուտքին։ Ոմանք, արևմտյան կուրատորների առաջարկով, սադրանքներ են կազմակերպում խաղաղապահների դեմ, ասում է քաղաքագետը՝ հիշեցնելով Օսիպյանի՝ Բերձորի միջանցքը ապաշրջափակելու համար երթ կազմակերպելու մտադրության մասին։ Հիշեցնենք, որ երեկ ռուս խաղաղապահները ուժով ապաշրջափակել էին Ստեփանակերտի օդանավակայանի տարածքում գտնվող իրենց բազա տանող ճանապարհը, որը փակել էր Միջանցքի ապաշրջափակման շըաբը։
«Կատարվող ամեն ինչի ֆոնին (հանկարծ!) համացանցում հայտնվում է ինչ-որ փաստաթուղթ, որն իբր առաջարկել է Ռուսաստանի արտգործնախարար Սերգեյ Լավրովը հուլիսի 25-ին Մոսկվայում ու որը վերաբերում է Լեռնային Ղարաբաղի հետագա «ինտեգրմանը» Ադրբեջանին։ Եվ դա տեղադրում է սորոսական ակտիվիստ, Հակաճգնաժամային խորհրդի նախագահ (ԼՂ ղեկավարի կից գործող) Տիգրան Պետրոսյանը»,- ասում է քաղաքագետը։
Ըստ Մաթևոսյանի, թեև փաստաթուղթը վերագրվում է ռուս նախարարին, սակայն այնտեղ ուրվագծված կետերն ավելի համահունչ են արևմտյան քաղաքական գործիչների լեքսիկոնին և դիրքորոշմանը։
Փաստորեն, ռուսական թերթը միանում է Բաքվի «մենակատարներին», ովքեր սարսափած գրում են, որ Ղարաբաղում դժգոհ են խաղաղապահների առաքելությունից։ Բաքուն և Մոսկվան ամեն ինչ անում են, որպեսզի ռուս խաղաղապահները մնան, և կարգավորումը տեղի ունենա «Լավրովի պլանով»։
Ի դեպ, ինքը՝ Լավրովը, կասկած չի հայտնել հրապարակված փաստաթղթի իսկության վերաբերյալ։ Երեկ ՄԱԿ ԱԽ նիստում ՌԴ ներկայացուցիչը բառացիորեն կրկնել է այդ առաջարկը։ Բայց «հավատարիմ» Մաթևոսյանը չի էլի “հավատում”։