Այսօր Արցախի «Հեղափոխական կուսակցության» նախագահ Արթուր Օսիպյանի կոչով Ստեփանակերտի Վերածննդի հրապարակում հանրահավաք է տեղի ունեցել։

Օսիպյանի խոսքով՝ «դեպի Հակարի կամուրջ զինված դիրքերի միջով անզեն անցնելու մեր առաջարկը միանշանակ չի ընկալվում, և դա հասկանալի է»։ Այսօրվա հանրահավաքը լավ առիթ է մարդկանց բացատրելու խաղաղ գործողության ուժը և անվտանգության ինչ երաշխիքներ այն կարող է բերել։ «Մենք կարծում ենք, որ դա միակ ճանապարհն է, որը թույլ կտա առանց արյունահեղության ապաշրջափակել միջանցքը։ Իսկ միջանցքի ապաշրջափակումը կնշանակի, որ Արցախը մնալու է հայկական»,- ասաց Օսիպյանը։

Այսօր Ստեփանակերտում բողոքի ակցիա անցկացրած մի խումբ կանանց ընդունել են Արցախի պետական ​​նախարարն ու նախագահի օգնականը։ Ինչպես նշեց ակցիայի նախաձեռնող Ժաննա Արզումանյանը, իրենք պայմանավորվել են սպասել ՄԱԿ-ի Անվտանգության խորհրդի այսօրվա որոշմանը, նոր միայն պահանջել իրենց հարցերի պատասխանները։ Կանայք պահանջել են բացել ճանապարհը, ապահովել երեխաների անվտանգությունն ու սնունդը։

Արզումանյանի խոսքով, իրենք որոշել են ցրվել, մինչեւ կպարզվի ՄԱԿ-ի հետ կապված իրավիճակը։

Արցախում մի խումբ կանայք հավաքվել են Ստեփանակերտում նախագահականի մոտ՝ պահանջելով բացել միջանցքը, ձեռնարկել բոլոր միջոցները երեխաների անվտանգությունն ու սնունդն ապահովելու համար։

Փաստաբան Ժաննա Արզումանյանն ասում է, որ արդեն արձանագրվում են սովից մահվան և վիժումների դեպքեր։ Մարդիկ իրենց ամբողջ ժամանակն անցկացնում են հերթերում, որտեղ ուշագնացություներ են լինում։ Ինչպես նշեց փաստաբանը, նախագահի հետ վերջին հանդիպումից անցել է երկու շաբաթ, սակայն իրավիճակը գնալով վատթարանում է։

Կանայք մտադիր են անժամկետ ակցիա սկսել և այժմ սպասում են պետնախարարի հետ հանդիպմանը։

Վերջին շրջանում Արցախն այնքան հարվածներ է ստացել Հայաստանից, որ նույնիսկ դժվար է պատկերացնել, թե որն է լինելու հաջորդ հարվածը։ Բայց, ամեն դեպքում, մենք ակնկալիքներ ունենք այսօր նախատեսված ՄԱԿ-ի Անվտանգության խորհրդի նիստից։ Հայաստանը պարտավոր է ըստ էության բանակցություններ վարել և արցախյան հիմնախնդրին մոտենալ ճիշտ առաջնահերթություններով։ Հայաստանը պետք է ՄԱԿ-ի նիստում ներկայացնի Արցախում տիրող իրավիճակը ըստ էության և բոլոր առումներով՝ պատմական, իրավական և այլն»,- մեկնաբանելով ՄԱԿ-ի Անվտանգության խորհրդի առաջիկա նիստը՝ Step1.am-ին ասաց «Հադրութի դեօկուպացիա» ՀԿ նախագահ Մերի Դավթյանը։

Ֆրանսիան լրացուցիչ 3 միլիոն եվրո կհատկացնի Կարմիր խաչի միջազգային կոմիտեին Լեռնային Ղարաբաղում մարդասիրական գործունեությանն աջակցելու համար։ «Արմենպրես»-ի հաղորդմամբ՝ այս մասին հաղորդագրություն է տարածել Ֆրանսիայի արտաքին գործերի նախարարությունը՝ մանրամասներ ներկայացնելով Հայաստանի Հանրապետության արտաքին գործերի նախարար Արարատ Միրզոյանի և Ֆրանսիայի Հանրապետության Եվրոպայի և արտաքին գործերի նախարար Կատրին Կոլոննայի հեռախոսազրույցից։

Ֆրանսիայի ԱԳ նախարարը խորը մտահոգություն է հայտնել, որ Լեռնային Ղարաբաղի բնակչությունն արդեն ավելի քան ութ ամիս է, ինչ տառապում է Ադրբեջանի կողմից Լաչինի միջանցքի արգելափակման հետևանքով։

Կոլոննան ափսոսանք է հայտնել Ադրբեջանի կողմից շարունակվող շրջափակման կապակցությամբ, որը հակասում է հրադադարի մասին համաձայնագրերի շրջանակներում ստանձնած պարտավորություններին և վնաս է հասցնում բանակցային գործընթացին:

Նա ընդգծել է, որ չլուծված հարցերը կարող են լուծվել միայն բանակցությունների միջոցով, ինչն արդար և տևական խաղաղության հասնելու հնարավորություն կտա: Այդ մասին նախարարը նշել էր նաև ապրիլի 27-ին և 28-ին Ադրբեջան և Հայաստան կատարած իր այցերի ժամանակ:

Նախարարը կրկնել է Լաչինի միջանցքով մարդկանց և ապրանքների ազատ տեղաշարժը երկու ուղղություններով վերականգնելու, բնակչությանն անխափան գազ և էլեկտրականություն մատակարարելու իր կոչը:

Նա հիշեցրել է, որ Ադրբեջանը պետք է կատարի իր միջազգային պարտավորությունները, մասնավորապես, իրականացնի Արդարադատության միջազգային դատարանի փետրվարի 22-ի որոշումը, որն ունի պարտադիր կատարման ուժ։

Միացյալ Նահանգները կոչ է արել Ադրբեջանին վերականգնել ազատ տեղաշարժը Լաչինի միջանցքով՝ Վաշինգտոնում լրագրողների հետ հանդիպմանը հայտարարել է ԱՄՆ պետքարատուղարության փոխխոսնակ Վեդաթ Փաթելը, գրում է Ամերիկայի ձայնը։

Ամերիկացի դիվանագետն ընդգծել է՝ Լաչինի միջանցքի փակումը «վատթարեցնում է հումանիտար իրավիճակը և խաթարում խաղաղ գործընթացի նկատմամբ վստահություն ստեղծելու ջանքերը»՝ միաժամանակ կոչ անելով Ադրբեջանի կառավարությանը «վերականգնել մարդասիրական և մասնավոր մեքենաների ազատ տեղաշարժն այս միջանցքով»:

«Խորապես մտահոգված ենք Լաչինի միջանցքի շարունակական փակմամբ՝ առևտրային, մարդասիրական և մասնավոր մեքենաների համար: Այս տեսակի մարդասիրական տեղաշարժերի դադարեցումը, մեր կարծիքով, վատթարեցնում է հումանիտար իրավիճակը և խաթարում խաղաղ գործընթացի նկատմամբ վստահություն ստեղծելու ջանքերը: Կոչ ենք անում Ադրբեջանի կառավարությանը վերականգնել մարդասիրական և մասնավոր մեքենաների ազատ տեղաշարժն այս միջանցքով։ Նաև տեղյակ ենք, որ չորեքշաբթի ՄԱԿ-ի Անվտանգության խորհուրդը հանդիպում է գումարում ՝ քննարկելու Լեռնային Ղարաբաղի հարցը: Ակնկալում ենք, որ այնտեղ նույնպես տեղի կունենան հավելյալ քննարկումներ»,- ասել է Վեդաթ Փաթելը։

Միևնույն ժամանակ, փոխխոսնակը հրաժարվել է ներկայացնել, թե ԱՄՆ-ն ինչ դիրքորոշում է որդեգրելու Անվտանգության խորհրդում, սակայն նշել է․ «Հետևողականորեն ընդգծել ու կրկնել ենք այն փաստը, որ ուղիղ երկխոսությունը էական նշանակություն ունի այս երկարատև հակամարտությունը կարգավորելու համար։ Կարծում ենք, որ ցանկացած ներգրավվածություն, որն ի վերջո խաղաղություն և կայունություն կբերի Հարավային Կովկասի ժողովուրդներին, լավ երևույթ է և դրական քայլ»։