Ռուսաստանի պետական ​​լրատվական գործակալության՝ «ՌԻԱ Նովոստի»-ի հաղորդմամբ՝ Ռուսաստանի զինված ուժերը «Օրեշնիկ» հրթիռներ են օգտագործել Ուկրաինայի կարևորագույն օբյեկտների վրա զանգվածային հարձակման ժամանակ, հայտարարել է Պաշտպանության նախարարությունը։ Սա «Օրեշնիկ» հրթիռների երկրորդ օգտագործումն է Ուկրաինայում՝ 2024 թվականին Դնեպրի վրա հարվածից հետո։

Ռուսական ուժերը նաև հարվածել են գործարանին, որտեղ արտադրվել են օդաչուներ, որոնք Ուկրաինան օգտագործել է Պուտինի նստավայրը ռմբակոծելու համար։

Ավելի վաղ Ռուսաստանը հայտնել է դեկտեմբերի 28-ի երեկոյան Ուկրաինայի զինված ուժերի կողմից Պուտինի Վալդայում գտնվող նստավայրը գրոհելու փորձի մասին։

Ռուսական օկուպացիոն բանակը երեկ՝ հունվարի 8-ի երեկոյան, օդային հարված է հասցրել Լվովի մարզին՝ վնասելով ենթակառուցվածքային օբյեկտ, գրել է Լվովի քաղաքապետ Անդրեյ Սադովին իր Ֆեյսբուքյան էջում։

Լվովը Արևմտյան Ուկրաինայի մայրաքաղաքն է, որը գտնվում է Լեհաստանի հետ սահմանից 70 կմ հեռավորության վրա, և Ռուսաստանը փորձում է եվրոպական երկրներին ցույց տալ իր մահացու հրթիռների հեռահարությունը։

Ուկրաինացի փորձագետ Վիտալի Պորտնիկովի խոսքով՝ Ռուսաստանի գլխավոր թիրախը ուկրաինական Ուժգորոդ քաղաքն է, որը գտնվում է Սլովակիայի, Հունգարիայի, Ռումինիայի և Լեհաստանի հետ սահմանների հատման կետում։ Նա հավելել է, որ Ռուսաստանը ցանկանում է այնտեղ տեղակայել հրթիռային գունդ՝ Կենտրոնական Եվրոպային սպառնալու համար։

Արցախի վերջին նախագահ Սամվել Շահրամանյանի հայցի քննությունն ընդդեմ 9-րդ դասարանի «Հայաստանի պատմություն» դասագրքի հեղինակների եւ ԿԳՄՍ նախարարության այսօր ավարտվել է։ Դատարանն այս գործով պետք է առաջիկայում որոշում կայացնի։

Հիշեցնենք, որ փաստաբան Ռոման Երիցյանը Սամվել Շահրամանյանի անունից դիմել էր դատարան՝ ընդդեմ 9-րդ դասարանի «Հայաստանի պատմություն» դասագրքի հեղինակների եւ ԿԳՄՍ նախարարության՝ պահանջելով  հերքել գրքում տեղ գտած զրպարտչական տեղեկությունները։ Մասնավորապես, դասագրքում տեղ է գտել այն միտքը, թե «Լեռնային Ղարաբաղի Հանրապետության նախագահը ստորագրեց ԼՂՀ լուծարման մասին հրամանագիր»։

Այսօրվա նիստից հետո լրագրողների հետ զրույցում Սամվել Շահրամանյանի պաշտպան Ռոման Երիցյանն ասաց․ «Վերստին հայտարարում ենք, որ Արցախի Հանրապետության իրավական համակարգում գոյություն չունի որեւէ իրավական ակտ, համաձայն որի՝ Արցախի Հանրապետությունը լուծարված է»։

Ըստ նրա՝ դասագրքում տեղ գտած ձեւակերպումները արատավորում են Արցախի նախագահի պատիվը, արժանապատվությունը եւ բարի համբավը․ «Դասագրքում տեղ գտած ձեւակերպումներից ստացվում է, որ քանի որ Արցախի Հանրապետության նախագահն իբրեւ թե կայացրեց Արցախը լուծարելու վերաբերյալ հրամանագիր, դրա հետեւանքով Արցախի ողջ բնակչությունը տարհանվեց եւ բռնի տեղահանվեց Արցախի Հանրապետությունից։ Կարծում եմ՝ բոլորի համար պարզ  ու ակնհայտ է, որ Արցախի Հանրապետության բռնի տեղահանումն ամենեւին կապված չէ նման բովանդակությամբ հայտարարության հետ»։

Միաժամանակ նա ասաց, որ Արցախի Հանրապետության նախագահի հրամանագրով չեն կարող Արցախի պետական ինստիտուտները լուծարվել, դրա վկայություն այն է, որ Արցախի Ազգային ժողովը գործում է եւ նոր նախագահ ընտրեց Աշոտ Դանիելյանին, որը, Արցախի Սահմանադրությունում կատարված փոփոխության համաձայն, ստանձնել է նաեւ Արցախի նախագահի պարտականությունները։

«Ադրբեջանի կողմից ի սկզբանե Արցախի Հանրապետության նախագահի առաջ պահանջ էր դրվել հրավիրել ԱԺ նիստ եւ ընդունել հռչակագիր՝ Արցախի Հանրապետությունը լուծարելու վերաբերյալ, ինչից Շահրամանյանը խուսափել է»,- հավելեց Երիցյանը։

Թուրքիայում քրդերը զանգվածային բողոքի ցույցեր են անցկացնում Հալեպում Թուրքիայի կողմից աջակցվող սիրիական կառավարական բանակի՝ քրդական ուժերի դեմ իրականացվող լայնածավալ ռազմական գործողության դեմ։

Հանրահավաքներ և երթեր են տեղի ունենում Վանում և Մարդինում, ինչպես նաև այլ քաղաքներում։

«Հայաստանի եւ Ադրբեջանի հարաբերություններում կան բազմաթիվ հարցեր, եւ այդ հարցերը պետք է անդրադարձ ունենան խաղաղության գործընթացում։ Մենք կենտրոնացած ենք խաղաղության եւ միջպետական հարաբերությունների հաստատման մասին համաձայնագրի ստորագրման եւ խաղաղության հետագա ինստիտուցիոնալացման վրա։ Եվ մենք բոլոր հարցերը դիտարկում ենք էս տրամաբանությամբ եւ էս առաջնահերթությամբ»,- կառավարության նիստից հետո լրագրողների հետ ճեպազրույցում ասաց Նիկոլ Փաշինյանը՝ անդրադառնալով հարցին, որ Արցախի տարածքում Արդբեջանը ոչնչացնում է հայկական եկեղեցիները, ինքը հայտարարել է, թե «փրկում» է Հայ Առաքելական եկեղեցին, այդ դեպքում չի պատրաստվո՞ւմ նաեւ Ադրբեջանի գործողություններից փրկել եկեղեցու սեփականությունը։

Անդրադառնալով Հայ Առաքելական եկեղեցու կողմից միջազգային դատարան ներկայացրած հարցին, որը վերաբերում է Շուշիի Կանաչ ժամ եկեղեցու ավերմանը եւ հարցին՝ արդյոք իր վեճը վեհափառի հետ հենց այս հայցերի շուրջ է, եւ ի՞նչ քայլերի կդիմի, եթե Հայ Առաքելական եկեղեցին հայցերը հետ չվերցնի, Նիկոլ Փաշինյանը պատասխանեց, որ ոչ միջպետական հայցադիմումների հետ կապված որեւէ մեկնաբանություն չունի։

«Դուք գիտեք, որ խաղաղության համաձայնագրում կա կարգավորում միջպետական հայցերի վերաբերյալ, այդ կարգավորումներն ուժի մեջ կմտնեն ստորագրումից եւ վավերացումից հետո»։

Հարցին, թե իրականում իր վեճը կաթողիկոսի հետ ա՞յն է, որ ինքը միջազգային դատարաններից ընդդեմ Ադրբեջանի հայցերը ցանկանում է հետ վերցնել, իսկ ՀԱԵ-ն հայցեր է ներկայացնում հայկական եկեղեցիների ավերման փաստով, նա պատասխանեց․ «Իմ վեճը կաթողիկոսի հետ այն է, ինչի մասին ես հրապարակային խոսել եմ։ Ես թաքուն վեճեր չունեմ, վեճի ամբողջ իմաստն այն է, որ այդ վեճը՝ բանավեճը հրապարակային է»։