«Տավուշի միջանցքը» հանձնենք, որ «Զանգեզուրի միջանցքից» չխոսեն. Զախարովան և Ալեն Սիմոնյանը ոչինչ չեն թաքցնում
- 09:06 28.03.2024
Մարտի 27-ին կայացած ճեպազրույցի ժամանակ ՌԴ ԱԳՆ խոսնակ Մարիա Զախարովան ասել է, որ Ռուսաստանը չի օգտագործում «Զանգեզուրի միջանցք» տերմինը, այլ խոսում է երթուղու մասին, որը Հայաստանի Սյունիքի մարզի տարածքով Ադրբեջանը կապում է Նախիջևանի արևմտյան շրջանի հետ։
Հայ պաշտոնյաներն ասում են, որ «Զանգեզուրի միջանցքը» 3 տարի է չի բացվում, քանի որ Հայաստանի ղեկավարությունը, իբր, համաձայն չէ «արտտարածքային» պայմաններին։ Ալեն Սիմոնյանը երեկ նույնիսկ ակնարկել է, որ Տավուշի գյուղերի հանձնումն ինչ-որ կերպ կապված է «Զանգեզուրի միջանցքի» հետ։ Մենք թույլ կտանք, որ Տավուշի միջանցքը ստեղծվի, որպեսզի մեզ չստիպեն բացել Զանգեզուրի միջանցքը, փաստորեն ակնարկում է Ալեն Սիմոնյանը։
Հիշվում է՝ անցյալ տարվա գարնանը, երբ Մոսկվան և Բաքուն Բերձորի միջանցքում ապօրինի անցակետ էին տեղադրել՝ փակելով Արցախի միակ ճանապարհն ու հաղորդակցությունները, նույն Ալեն Սիմոնյանն ասում էր, որ իրենք չեն պահանջի վերականգնել Բերձորի միջանցքի արտատարածքային կարգավիճակը, որպեսզի Ալիեւը նույն կարգավիճակ չպահանջի Զանգեզուրի միջանցքի համար։
Հիմա, երբ Բաքուն և Մոսկվան պահանջում են «միջանցք» ստեղծել Տավուշում՝ Հայաստանի կառավարության տված “իրավունքով” փակելով Վրաստան-Հայաստան ճանապարհն ու գազատարը, Զախարովան և Ալեն Սիմոնյանը կրկին հիշեցին «Զանգեզուրի միջանցքը»։
Զախարովան ասում է, որ իրենք դա «միջանցք» չեն անվանում։ Սա իսկապես «միջանցք» չէ, այլ պետական շրջափակման մեխանիզմ։
«Բերձորի միջանցքը» հորինվել է Արցախը ճիշտ ժամանակին արգելափակելու և օկուպացնելու համար։ Հիմա Հայաստանը Վրաստանից անջատելու համար անհրաժեշտ է դեպի Լոռի ելքով «Տավուշի միջանցքը»։ Իսկ «Զանգեզուրի միջանցքը» ի սկզբանե նպատակ ուներ վերացնել հայ-իրանական սահմանը։ Բայց դա կլինի ամենավերջում։
Զախարովան բացահայտ խոսում է ամեն ինչի մասին, Ալեն Սիմոնյանը, փաստորեն, նույնպես։ Ոչ ոք չի թաքցնում Հայաստանը որպես պետություն վերացնելու մտադրությունները։