Ինչո՞ւ են այսօր հետաձգվել Երեւանից եւ դեպի Երեւան չվերթները
- 11:28 22.04.2024
Դեպի Երևան և Երևանից մեկնող 12 չվերթ է հետաձգվել, «Ազատության»-ը փոխանցեց «Զվարթնոց» օդանավակայանի մամուլի քարտուղար Լուսինե Մողրովյանը։
Խոսքը, մասնավորապես, Երևանից դեպի Կապան, Վենետիկ, Աբու Դաբի, Շարժա, Դուբայ չվերթների, ինչպես նաև Մոսկվայից, Վենետիկից, Աբու Դաբիից, Շարժայից, Դուբայից, Կապանից դեպի Երևան չվերթների մասին է։
Որպես հետաձգումների պատճառ Մողրովյանը նշեց թռիչքուղիների վերանորոգումը։
«Ազատության» հարցին, թե ուղևորներին ժամանակին իրազեկե՞լ են այդ մասին, եթե դրանք տրանզիտ թռիչքներ էին, ուղևորները փոխհատուցում կստանա՞ն, մամուլի քարտուղարը պատասխանեց՝ ուղևորները պետք է ճշտեն իրենց ավիաընկերություններից։
Հետաձգվել է նաև Երևանից Քիշնև չվերթը, օդանավակայանից հորդորում են այս հարցով ևս դիմել ավիաընկերությանը։
Մողրովյանի խոսքով՝ չվերթները կվերականգնվեն 13։30-ից։
Հիշեցնենք, որ այսօր տեղեկություններ կային Հայաստանի օդային տարածքի փակ լինելու մասին։