Քո՞ հողն է, որ պաշտպանել ես․ Քյոխին հրավիրել են Հակակոռուպցիոն դատարան
- 10:36 30.04.2024
«Ժողովուրդ» օրաթերթը գրում է. «Հակակառուպցիոն դատարանը պաշտոնական ծանուցում է ուղարկել Արցախի «Եղնիկներ» զորամասի հրամանատար, Արցախի հերոս Կարեն Ջալավյանին՝ Քյոխին, որ ներկայանա Հակակառուպցիոն դատարան եւ հարցաքննվի՝ ՊԲ նախկին հրամանատար Միքայել Արզումանյանի դեմ հարուցված քրեական գործով: Այդ գործն էլ քննվում է դռնփակ դատական նիստի շրջանակներում։
Հիշեցնենք` 2022 թվականի սեպտեմբերի 1-ին դատախազությունը հայտարարեց, որ Արցախի ՊԲ նախկին հրամանատար, Արցախի նախագահի խորհրդական Միքայել Արզումանյանին մեղադրանք է ներկայացվել՝ 2020 թվականի Արցախյան պատերազմի ընթացքում ռազմավարական կարեւոր նշանակություն ունեցող «Արեգա» բարձունքը եւ հարակից մարտական դիրքերն ազատագրած անձնակազմին «նահանջ» հրաման տալու համար։ Արզումանյանը կալանավորվել է սեպտեմբերի 1-ին եւ մինչ օրս գտնվում է կալանքի տակ»:
Քյոխին հենց հակակոռուպցիոն դատարան հրավիրելը լիովին արտացոլում է Հայաստանի քաղաքական եւ դատական իրողությունների ծուռ հայելին․ մարդուն, որը բոլորի աչքի առաջ պահում էր իր հողը, “հակակոռուպցիոն պայքարի շրջանակներում” կարող են մեղադրել, որ նա “յուրացրել” է ուրիշի հողը եւ ապօրինի պաշտպանել։ Ձեր հո՞ղն էր, որ պաշտպանել եք, հաճախ կարելի է լսել Հայաստանում։ Երեկ Արցախի, հիմա նաեւ Տավուշի, վաղը՝ Սեւանի, Երասխի, Կոնդի մասին։