Բայց ռուսներին ինքը բերել, դրել է մեր գլխին ու ջանին, ինքն էլ որոշել է ռուսներից ազատագրվել։ Դու ես բերել դրել

«Վախի մեջ է ապրում մեր ոստիկանությունը, ես չգիտեմ՝ ինչ հրահանգ է տրվել իրենց։ Բղավելով հարձակվել են մեզ վրա, արգելում են, որ ժողովրդի հետ գնանք հանդիպման, ժողովուրդն է որոշել գյուղից իջնել գալ հանդիպել։ Քանի որ իրենց գործերը խավարի մեջ են, այս մարդկանց էլ խավարի մասնակից են դարձրել, դրա համար վախով են ապրում»,- Տավուշում լրագրողների հետ զրույցում ասաց Բագրատ Սրբազանը։

Նա հայտարարեց՝ մենք մեր սեփական երկրում ապրում ենք գերության մեջ․ «Առավոտյան տագնապի են ենթարկել մեծ ու փոքրի, տեսանյութերն էլ կա, ստում են, երբ ասում են, որ չեն հարվածել։ Եվ հիմա, երբ փորձում ենք պարզապես այցելել Կիրանց, արգելեցին։ Չեք հավատա, փոխոստիկանապետը մեքենայից իջել ու հարձակվել է մեզ վրա՝ բղավելով, թե մենք սադրում ենք։ Էդքան անադաեկվատ ու անհասկանալի մարդիկ։ Ասում եմ՝ մի պահ գնամ գյուղ, մարդկանց քաջալերեմ, մարդիկ առավոտյան ծեծ են կերել, չեն թողնում»։

Ոստկանությունը մեծ թվով զորք է տեղափոխել Տավուշ։ Բագրատ Սրբազանն ասաց, որ մի քանի մարդկանց դեմ մեծ թվով ոստիկանական զորք են կանգնեցրել, նա հարցադրում արեց՝ արդյոք թշնամու դեմ էլ այդ զորքը կկանգնեցնեն։

«Մարդն ասում է՝ պիտի ազատագրվենք, պիտի էս անենք, բայց ռուսներին ինքը բերել, դրել է մեր գլխին ու ջանին, ինքն էլ որոշել է ռուսներից ազատագրվել։ Դու ես բերել դրել էդ մարդկանց, դու քո ձեռքով։ Եթե մեզ գերության մեջ ես դրել, դու ես դրել։ Սա անհասկանալի է, ու մեզ էլ համարում է գործակալ։ Մեր երկրում հենց հիմա տեղի է ունենում տեռոր ու ահաբեկություն սեփական ժողովրդի նկատմամբ, սա է տեղի ունենում»,- ասաց նա։