Կանգնեցնել աղետալի ընթացքը․ արդյո՞ք այս խնդիրը լուծվում է
- 10:48 10.05.2024
Մայիսի 9-ին Հանրապետության հրապարակում կայացած բազմահազար հանրահավաքին եկած մարդկանց մեծամասնությունը միայն մեկ ակնկալիք ուներ շարժման լիդերներից՝ կասեցնել երկրի ոչնչացումը։ Պահանջը ձեւակերպվել է ՝ դադարեցնել երկրի աղետալի ընթացքը, եւ դրա ամենակարճ ճանապարհը Փաշինյանի հրաժարականն է։
Փաշինյանը հրաժարական չտվեց, ավելին՝ դատելով նրա թիմի անդամների ֆլեշմոբից, նման քայլ չի ակնկալվում, հատկապես՝ Մոսկվա գնալուց հետո։ Հայտնի չէ, թե ինչ է նա խոստացել Մոսկվայում, “թիկունքում” ունենալով համաժողովրդական շարժման սպառնալիքը։
Այդ դեպքում ինչպե՞ս է լուծվելու առաջնային խնդիրը՝ կասեցնել աղետալի ընթացքը եւ երկրի փլուզումը։
«Ընթացքը» արագ շարունակվում է՝ այսօր Ալմաթիյում կկայանա Միրզոյան-Բայրամով հանդիպումը։ Դատելով այն բանից, որ հանդիպումը ողջունել է միայն ռուսական կողմը, այնտեղ ձերք բերվելիք պայմանավորվածությունները կլինեն նախկինի պես ռուս-թուրքական պլանին համահունչ։
Դա է վկայում նաեւ Փաշինյան-Պուտին միակ հրապարակային արդյունքը։ Ինչպես հայտարարվել է, նրանք համաձայնություն է ձեռք բերվել ռուս զինվորականների և սահմանապահների դուրսբերման մասին Հայաստանի մի քանի շրջաններից։ Միևնույն ժամանակ, Պեսկովի խոսքով, «հայկական կողմի խնդրանքով» ռուս սահմանապահները կմնան Թուրքիայի և Իրանի հետ Հայաստանի սահմանի հատվածներում”։
Պեսկովը պարզաբանել է, որ Պուտինի հետ հանդիպմանը Փաշինյանն ասել է, որ պայմանների փոփոխության պատճառով այլևս կարիք չկա Հայաստանում տեղակայել ռուս զինվորականներին և սահմանապահներին, որոնք այնտեղ առանց որեւէ հիմքի տեղակայվել են 2020 թվականի աշնանը՝ Արցախյան պատերազմից հետո։
Դուրս գալու ժամանակը չի հաղորդվում։ Սակայն հայկական ԶԼՄ-ներն արդեն գրում են, որ «այն հատվածներից, որտեղ Ադրբեջանը տարածքային նկրտումներ ունի, ռուս սահմանապահները հեռացվում են, հայկական բանակ չի տեղակայվում, ինչը խոսում է այն մասին, որ Փաշինյանը պատրաստվում է նոր զիջումների` հօգուտ Ադրբեջանի»:
Այն, ինչ իշխող կուսակցությունը ներկայացնում է որպես մեծ ձերքբերում՝ ռուսները դուրս կբերվեն Տացուշից, Սյունիքից, Գեղարքունիկից եւ Երասխից, խոսում է «աղետալի ընթացքի» վստահ շարունակության մասին։ Եթե հրաժարական չկա, ուրեմն Փաշինյանը “յարլիկ” է ստացել Մոսկվայում։ Եվ եթե համաժողովրդական շարժումը աղետալի ընթացքը չի կասեցնում, նշանակում է, որ այդ ընթացքն իրենով ավելի կամրանա։ Եւ ամեն ինչ կմնա ռուս-թուրքական պլանի շրջանակում։
Որպես այդ ընթացքի վերջնական արդյունք չի բացառվում Փաշինյանի մասնակցությունը նոյեմբերին Բաքվում կայանալիք կլիմայական գագաթնաժողովին, “խաղաղության”, այսինքն՝ Հայաստանի լուծարման պայմանագրի ստորագրումը եւ Ալիեւին եւ Փաշինյանին նոբելյան մրցանալի շնորհումը։
Դա անպայման կլինի, եթե աղետալի ընթացքը չկասեցվի։