Կալուգայի մերձակայքում նավթավերամշակման գործարանում անօդաչուի հարձակումից հրդեհ է բռնկվել

Ուրբաթ՝ մայիսի 10-ի գիշերը, անօդաչու սարքերը հարձակվել են Ռուսաստանում մեկ այլ նավթավերամշակման գործարանի վրա, այս անգամ՝ Կալուգայի շրջանում: Այս մասին հայտնում են մի քանի ռուսական Telegram ալիքներ՝ հղում կատարելով տեղի բնակիչների տեղեկություններին։ Հաղորդագրություններում նշվում է, որ պայթյուններ են լսվել Կալուգայի մերձակայքում գտնվող Նավթավերամշակման գործարանի տարածքում։

«Գիշերվա 1-ի սահմաններում մի քանի հզոր պայթյուններ են հնչել Ձերժինսկի թաղամասում։ Բնակիչների խոսքով, մինչ այս լսվել են մի քանի անօդաչու թռչող սարքերի բնորոշ ձայներ, որից հետո տեղի նավթապահեստի տարածքում կրակն ու ծուխը տեսանելի են դարձել»,- գրում է Shot-ը։ «Աշխատակիցները կեսգիշերին մոտ 12-ի սահմաններում տարհանվել են նավթավերամշակման գործարանից»,- պարզաբանում է Astra-ն։

Կալուգայի նահանգապետ Վլադիսլավ Շապշան հաստատել է գործարանի վրա հարձակումը։ «Հրդեհն այժմ մարված է։ Նախնական տվյալներով՝ զոհեր և վիրավորներ չկան»,- ասաց նա։ Դատելով տեղի բնակիչների նկարահանած տեսանյութերից՝ նավթավերամշակման գործարանում բռնկված հրդեհը զգալի է եղել։