Սլովակիայի վարչապետ Ֆիցոյի վրա կրակել են, նա վիրավոր է

BBC

Անհայտ անձը կրակել է Սլովակիայի վարչապետ Ռոբերտ Ֆիցոյի վրա. նա վիրավոր է, ըստ նախնական տեղեկությունների՝ ծանր։

Տեղական մամուլը հաղորդում է, որ մի քանի կրակոցներ են հնչել, երբ Ֆիցոն դուրս է եկել նահանգում կառավարական նիստից, որ նա վիրավորվել է ստամոքսից և ձեռքից, և որ նրան ուղղաթիռով տեղափոխել են Բանսկա Բիստրիցա քաղաքի հիվանդանոց:

Մահափորձից երկու ժամ անց Ռոբերտ Ֆիցոյի ֆեյսբուքյան պաշտոնական էջում հաղորդագրություն հայտնվեց, որ նրա վերքերը կյանքին վտանգ են ներկայացնում։ Մինչ այս, սլովակյան հրապարակումները, հղում անելով անանուն աղբյուրներին, գրել էին, որ Ֆիցոյի վնասվածքները կյանքին վտանգ չեն սպառնում։

«Նրա վրա կրակել են մի քանի անգամ և այժմ նա գտնվում է կյանքին վտանգ սպառնացող վիճակում։ Այս պահին նրան ուղղաթիռով տեղափոխում են Բանսկա Բիստրիցա, քանի որ Բրատիսլավա թռիչքը չափազանց երկար կլինի՝ հաշվի առնելով հրատապ միջամտության անհրաժեշտությունը։ Առաջիկա ժամերը վճռորոշ են լինելու»,- ասված է վարչապետի պաշտոնական էջում։

Ֆիցոյի վրա կրակել են ամբոխից, երբ նա դուրս է եկել Հանդլովա քաղաքում կառավարության նիստից հետո: Ականատեսների վկայությամբ՝ վարչապետն ընկել է ու արագ մեքենայով տարվել։

Սլովակիայի TAZ հեռուստաալիքը հայտնում է, որ Ֆիցոյի վրա կրակել են չորս անգամ, մեկ գնդակը դիպել է նրա ստամոքսին։

Ֆիցոյից ոչ հեռու կանգնած մի կին Denník N թերթին ասել է, որ արյուն է տեսել վարչապետի գլխին և կրծքին։

Կրակողը, ըստ սլովակական մամուլի, բերման է ենթարկվել տեղում։

Ռոբերտ Ֆիցոն համարվում է ռուսամետ քաղաքական գործիչ։ Ուկրաինա ռուսական լայնամասշտաբ ներխուժման երկրորդ տարելիցի կապակցությամբ իր ելույթում նա ասաց, որ պատերազմը Դոնբասում սկսվել է «ուկրաինացի նեոնացիստների» պատճառով, և որ «Ռուսաստանի նախագահն այլ ելք չունի», քանի որ ՆԱՏՕ-ն ընդլայնվում է դեպի արևելք։ . «Եվ այս գործընթացը կասեցնելու համար Պուտինը լայնամասշտաբ պատերազմ սկսեց»,- կարծում է Ֆիցոն։