ԱՄՆ-ը և դաշնակիցները Ուկրաինային կտրամադրեն հակաօդային պաշտպանության նոր համակարգեր

Կիևը կստանա հակաօդային պաշտպանության ևս հինգ համակարգ, ասվում է ԱՄՆ-ի, Իտալիայի, Նիդեռլանդների, Ռումինիայի և Ուկրաինայի համատեղ հայտարարության մեջ։

«Մենք մտադիր ենք Ուկրաինային տրամադրել հակաօդային պաշտպանության հավելյալ հնարավորություններ՝ պաշտպանվելու համար շարունակվող ռուսական ագրեսիայից, ներառյալ ռուսական կանխամտածված հարձակումները ուկրաինական քաղաքների, քաղաքացիական բնակչության և կարևոր ենթակառուցվածքների վրա», – ասվում է հայտարարությունում, որը տարածվել է ԱՄՆ նախագահ Ջո Բայդենի ելույթից հետո ՆԱՏՕ-ի գագաթնաժողովի բացման ժամանակ Վաշինգտոնում։

Պլանների համաձայն՝ Կիևը կստանա չորս Patriot համակարգեր ԱՄՆ-ից, Գերմանիայից և Ռումինիայից, այդ համակարգերի բաղադրիչները Նիդեռլանդներից և այլ գործընկերներից, ինչպես նաև մեկ SAMP/T համակարգ, որը կփոխանցի Իտալիան։

«Այս հինգ ռազմավարական հակաօդային պաշտպանության համակարգերը կօգնեն պաշտպանել ուկրաինական քաղաքները, խաղաղ բնակիչներին և զինվորներին»:

Գերմանիան և Ռումինիան արդեն հայտարարել են, որ ուղարկելու են երկու Patriot, իսկ Նիդեռլանդների իշխանությունները հայտարարել են, որ աշխատում են Կիևի համար մեկ համակարգ հավաքելու ուղղությամբ, հիշեցնում է AFP-ն։

Ավելի վաղ Ջո Բայդենը Վաշինգտոնում ունեցած ելույթի ժամանակ ասել էր, որ առաջիկա մի քանի ամիսների ընթացքում արևմտյան դաշնակիցները Ուկրաինային կտրամադրեն «տասնյակ լրացուցիչ մարտավարական հակաօդային պաշտպանության համակարգեր»։

«Պատմության այս պահը պահանջում է մեր հավաքական ուժը։ Պուտինը ուզում է Ուկրաինային ամբողջությամբ ենթարկել, վերջ տալ ուկրաինական ժողովրդավարությանը, ոչնչացնել ուկրաինական մշակույթը և ջնջել Ուկրաինան երկրի երեսից։ Իսկ դուք գիտեք, որ Պուտինը կանգ չի առնի Ուկրաինայի վրա։ Ուկրաինան կարող է և կկանգնեցնի Պուտինին»,- ասել է նա ՆԱՏՕ-ի գագաթնաժողովում։

Համատեղ հայտարարության մեջ պարզաբանվում է, որ առաջիկա ամիսներին ԱՄՆ-ը և գործընկերները մտադիր են Ուկրաինային տրամադրել հակաօդային պաշտպանության տասնյակ մարտավարական համակարգեր, այդ թվում՝ NASAMS, HAWK, IRIS T-SLM, IRIS T-SLS և Gepard համակարգեր, որոնք պետք է ընդլայնվեն և ուժեղացվեն Ուկրաինայի հակաօդային պաշտպանությունը։