ՌԴ-ում անօրինական միգրանտներին կարգելվի աշխատել որպես առաքիչ և տաքսու վարորդ
- 10:15 13.07.2024
Ռուսաստանի իշխանությունները կարգելեն տաքսիների և առաքման ագրեգատորներին պատվերներ տալ միգրանտներին՝ առանց Ռուսաստանում աշխատելու թույլտվության։ Հարթակները պետք է ինքնուրույն վերահսկեն իրենց օգտատերերի կողմից միգրացիոն օրենքների պահպանումը: Դա բխում է հարթակային զբաղվածության մասին օրինագծի նոր տարբերակից, որին ծանոթացել է «Վեդոմոստին»:
Փաստաթղթի մշակման աշխատանքային խմբի ղեկավար Անդրեյ Իսաևի խոսքով, օրինագծի հայեցակարգը հավանություն է ստացել «Եդինայա Ռոսիա» կուսակցության նախագահ Դմիտրի Մեդվեդևի հետ հանդիպմանը։ Հանդիպման ընթացքում Մեդվեդևը հանձնարարել է օրինագիծը ներկայացնել Պետդումա՝ նշելով, որ սա ոլորտի կարգավորման միայն սկիզբն է, և փաստաթուղթը կկատարելագործվի հարթակային զբաղվածության զարգացմանը զուգընթաց։ Ակնկալվում է, որ խորհրդարանի կողմից ընդունվելուց հետո օրենքն ուժի մեջ կմտնի 2025 թվականի մարտի 1-ից։