Արցախյան բիզնեսին աջակցելուն ուղղված Shop in Armenia-ի շնորհանդեսը հուլիսի 27-ին
- 11:13 24.07.2024
Global USA-ը ու Երկիր Մեդիան սիրով հրավիրում են Արցախյան փոքր բիզնեսին աջակցելուն ուղղված Shop in Armenia հարթակի շնորհանդեսին, որը կայանալու է hուլիսի 27-ին, առավոտյան ժամը 9-ից Նանսենի 26/741 հասցեում գտնվող Պարկ Հաուսում։
Նախագծի շնորհանդեսին ներկայացվելու են Արցախից տեղահանված եւ Հայաստանում իրենց գործունեությունը կազմակերպած ավելի քան 100 անհատ արվեստագետների, արհեստավորների, փոքր արտադրություն ստեղծած գործարարների արտադրանքը։
Shop in Armenia-ի կարգախոսն է՝ «Մի՛ օգնիր ինձ, աշխատիր ինձ հետ»։ Նորաստեղծ հարթակը հնարավորություն է տալու աշխարհի ցանկացած կետից պատվիրել և ստանալ արցախցի մեր հայրենակիցների արտադրանքը։ Սա հնարավորություն և միջոց է նպաստելու բնօրրանից կտրված արցախցի մեր հայրենակիցներին՝ իրենց գործունեությունն ու արտադրությունը կազմակերպելու, կայուն եկամուտ ապահովելու, մինչև Արցախ վերադառնալու հնարավորություն ստեղծվելը, Հայաստանում մնալու և արարելու համար։