«Արցախյան մշակույթի օրեր»՝ Թեքեյան կենտրոնում

Այս շաբաթ մեկնարկել է «Արցախյան մշակույթի օրեր» երկօրյա ձեռնարկը, որը կազմակերպում են «Թեքեյան Կենտրոն» հիմնադրամը և «Արցախյան մշակույթի պահպանման կենտրոն» ՀԿ-ն: Միջոցառումը նպատակ ունի ներկայացնելու արցախյան մշակույթի յուրօրինակությունն ու հարստությունը, ինչպես նաև պահպանելու այն դժվարին ժամանակներում։ Մուտքն ազատ է բոլորի համար:

Արցախյան մշակույթի պահպանման առաքելությունը

2023 թվականի նոյեմբերին հիմնադրված «Արցախյան մշակույթի պահպանման կենտրոն» հասարակական կազմակերպությունը նպատակ ունի պահպանել և խթանել արցախյան մշակույթը՝ համախմբելով տեղահանված արցախցիներին մշակութային ծրագրերի շուրջ: Կազմակերպությունը իր առջև դրված խնդիրներն է համարում արցախյան մշակութային արտադրանքի պահպանությունը, օկուպացված տարածքների բնակչության միջև ներհամայնքային կապերի ամրապնդումը, ինչպես նաև արցախյան մշակույթի հանրահռչակումը թե՛ տեղական, թե՛ միջազգային մակարդակով:

Պետական և ինքնագործ համույթների համախմբում

«Արցախյան մշակույթի պահպանման կենտրոնը» հանդիսանում է մի հարթակ, որը միավորում է Արցախի պետական և ինքնագործ մշակութային խմբերը: Դրանց թվում են «Արցախի ազգային նվագարանների պետական նվագախումբը», «Արցախի պետական երգչախումբը», «Մռակած պետական կամերային երգչախումբը», «Մենք ենք մեր սարերը» երգի-պարի պետական համույթը, «Արցախի պետական ջազ նվագախումբը», «Շուշիի Մ. Խանդամիրյանի անվան պետական տիկնիկային թատրոնը» և Արցախի պարի պետական համույթը: Բացի այդ, կենտրոնը ներառում է նաև Ստեփանակերտի մանկապատանեկան ստեղծագործական կենտրոնի մանկական երգչախումբը և «Վէլլանս» վոկալ խումբը, «Արցախի այաներ» համույթը և այլ ինքնագործ խմբեր:

Արցախյան մշակույթի հանրահռչակումը

Կենտրոնի նպատակներից է նաև համախմբել Արցախի մշակութային գործունեությունը, հայթայթել միջոցներ պետական կարգավիճակ ունեցող մշակութային կազմակերպությունների գործունեությունը շարունակելու համար և խթանել արցախյան մշակույթի ճանաչելիությունը աշխարհում։ Հիմնադրամի ու կենտրոնի համատեղ ջանքերով այս ձեռնարկը դառնում է հարթակ՝ արտահայտելու արցախցիների ստեղծագործական ոգին ու ժառանգությունը:

Միջոցառումը տեղի կունենա «Թեքեյան Կենտրոնում», և կազմակերպիչները սիրով սպասում են բոլոր հետաքրքրվածներին՝ արցախյան մշակույթի յուրօրինակությունը գնահատելու և պահելու գործում իրենց ներդրումը բերելու համար:

Տաթև Ազիզյան