ԱՄՆ-ում «Հելեն» փոթորիկը խլել է ավելի քան 200 մարդու կյանք
- 10:09 04.10.2024
BBC
«Հելեն» փոթորկի զոհերի թիվը գերազանցել է 200-ը։ Փրկարարները շարունակում են ողջ մնացածների որոնումները սեպտեմբերի վերջին ԱՄՆ-ի հարավ-արևելքում պատուհասած բնական աղետից հետո:
Մահացածների կեսից ավելին ապրում էր Հյուսիսային Կարոլինայում, որտեղ ամբողջ համայնքներ ավերվեցին 2005 թվականի «Կատրինա» փոթորկից ի վեր ամենամահաբեր փոթորկից, որն ավելի քան 1800 մարդու կյանք խլեց:
Հարյուրավոր մարդիկ դեռ անհայտ կորած են համարվում։ Ավելի քան 750,000 տներ դեռևս հոսանքազրկված են, և շատ ճանապարհներ մնում են փակ, ինչը թույլ չի տալիս օգնություն ուղարկել տուժած շրջաններ:
ԱՄՆ նախագահ Ջո Բայդենը, ով վերջին երկու օրերին շրջել է տուժած տարածքներով, հինգշաբթի այցելել է Ֆլորիդա և Ջորջիա նահանգներ։
«Ես տեսնում եմ ձեզ, լսում եմ, սգում եմ ձեզ հետ և խոստանում եմ, որ մենք կաջակցենք ձեզ», – ասաց նա Ջորջիա նահանգի Ռեյ Սիթի քաղաքի բնակիչներին:
Ավելի վաղ նախագահը հավանություն էր տվել Ֆլորիդայում, Ջորջիայում, Հյուսիսային և Հարավային Կարոլինայում և Վիրջինիայում աղետից տուժածներին ֆինանսական օգնության տրամադրմանը։
Ատլանտյան օվկիանոսում փոթորիկների սեզոնը շարունակվում է մինչև նոյեմբերի վերջը, և ներկայումս սպասվում են ևս երկու փոթորիկներ:
Գիտնականները վերջին ժամանակներում հաճախակի և ինտենսիվ բնական աղետները կապում են մոլորակի կլիմայի փոփոխության հետ: