Թուրքամետ ուժերը գրավեցին Դարաան, Էրդողանը հայտարարում է Դամասկոսի գրավման մասին. Մոսկվան հրաժարվեց փրկել Ասադին

Սիրիայի կառավարությունը կորցրել է վերահսկողությունը Դարաա քաղաքի նկատմամբ, որը խորհրդանշական նշանակություն ունի իսլամիստ գրոհայինների համար։ Սա արդեն երրորդ քաղաքն է Սիրիայում, որը գրավել են թուրքամետ ուժերը՝ Հալեպից և Համայից հետո։

Միևնույն ժամանակ, սիրիական արաբական բանակի հինգերորդ կամավորական գրոհային կորպուսը, որը մինչև վերջերս ծառայում էր Բաշար ալ-Ասադի ռեժիմին, անցել է ընդդիմադիր ուժերի կողմը։ Հատկանշական է, որ այն իրականում զրոյից ստեղծվել և զինվել է Ռուսաստանի Դաշնության կողմից, հայտնում է Անաթոլյան գործակալությունը։

Դամասկոսի հասկացրել են, որ Ռուսաստանն այժմ այլ առաջնահերթություններ ունի, և նրա միջամտությունը կարող է միայն սահմանափակ լինել։ Կրեմլին մոտ կանգնած աղբյուրները հաստատել են, որ Մոսկվան Բաշար Ասադին փրկելու ծրագիր չունի։

Սիրիական ընդդիմությունը շարունակում է հարձակումը Դամասկոսի ուղղությամբ. Այս մասին երեկ խոսել է Թուրքիայի նախագահ Ռեջեփ Թայիփ Էրդողանը։

«Իդլիբը, Համան, Հոմսը և, իհարկե, նպատակը Դամասկոսն է։ Այս հարձակումը շարունակվում է։ Մենք հուսով ենք, որ Սիրիայում այս առաջխաղացումը տեղի կունենա առանց միջադեպերի»,- ասել է Թուրքիայի ղեկավարը։

Էրդողանը հիշեցրել է Ասադին ուղղված իր առաջարկը՝ բանակցել Սիրիայի ապագայի շուրջ, որը մնացել է անպատասխան։ «Ցավոք, մենք Ասադից դրական պատասխան չստացանք։ Այս պահին Իդլիբից հետո Հոմսը նույնպես ընդդիմության ձեռքում է, և առաջընթաց կա դեպի Դամասկոս»,- նշել է նա։