Արմեն Գրիգորյանը թվարկել է ՀՀ “կայունության” քայլերը եւ Բաքվի զորավարժությունները

«Լեռնային Ղարաբաղի հայաթափումը տեղի է ունեցել բազմաթիվ գործոնների պատճառով։ Եվ դրա պատճառը ՀՀ իշխանությունը չէ, դա միանշանակ է»,- այսօր լրագրողների հետ ճեպազրույցում ասաց ԱԽ քարտուղար Արմեն Գրիգորյանը։

Դիտարկմանը, որ Նիկոլ Փաշինյանն Արցախը ճանաչել է Ադրբեջանի մաս, նա պատասխանեց․ «Ռուսաստանի Դաշնությունից սկսած բոլորը ճանաչել են Ադրբեջանի տարածքային ամբողջականությունը, բայց ես չեմ ուզում մտնել այդ քննարկումների մեջ»։

Արմեն Գրիգորյանը նաեւ նշեց, որ մտահոգիչ են Ադրբեջանի կողմից հնչող հայտարարությունները։ Հարցին, թե լայնածավալ հարձակման հավանականություն տեսնո՞ւմ են, նա պատասխանեց․ «Մենք տեսնում ենք, որ ինտենսիվ զորավարժություններ են անցկացնում, ինտենսիվ թռիչքներ, որոնք ամենայն հավանականությամբ ռազմական տեխնիկա են տեղափոխում Բաքու։ Բայց ես ուզում եմ նաեւ նշել, որ մենք վերջին տարիներին տարբեր ուղղություններով աշխատել ենք, որպեսզի հնարավորինս կայունություն ստեղծենք տարածաշրջանում։ ԵՄ դիտորդական առաքելությունը Հայաստանում, որը հուսով ենք, որ շուտով Բրյուսելը կերկարաձգի, Հայաստանի միանալը Հռոմի ստատուտին, որը կարեւոր գործոն է կայունության տեսանկյունից, Հայաստանում տեղի ունեցող ռազմական բարեփոխումները որոշակի կայունության գործոններ են։ Դուք նաեւ տեսել եք արտաքին հետախուզության զեկույցը, մեր գնահատականները դրա շրջանակներում են»։