Զախարովան որոշել է, որ Մինսկի խումբը դադարել է գոյություն ունենալ 2022 թվականին
- 14:42 31.01.2025
ԵԱՀԿ Մինսկի խումբը «ավարտվեց» 2022 թվականի փետրվարից հետո, երբ Ֆրանսիայի և ԱՄՆ-ի համանախագահները հրաժարվեցին կապ հաստատել Ռուսաստանի հետ։ Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Հիշում եք, թե ինչպես միակողմանի, առանց որևէ խորհրդակցության, առանց հաղորդակցության նրանք (ֆրանսիացի և ամերիկացի համանախագահները – խմբ.) պարզապես հրաժարվեցին կապ հաստատել ռուս համանախագահի հետ և չեղարկեցին նախկինում ծրագրված բոլոր միջոցառումները։ Դե, հիմնականում, դրանով (Մինսկի խումբը – խմբ.) ավարտվեց»,- նշում է ԱԳՆ պաշտոնական ներկայացուցիչը։
Հիշեցնենք, որ շփումներն իսկապես ավարտվեցին Ուկրաինա Ռուսաստանի ներխուժումից և Արևմուտք-Ռուսաստան հարաբերությունների խզումից հետո։ Սակայն Մարիա Զախարովան նախընտրում է չհիշել այն փաստը, որ ի հակառակ Մինսկի խմբի մյուս համանախագահների, Ռուսաստանը միակողմանիորեն զորքեր մտցրեց Արցախ 2020 թվականի նոյեմբերի 10-ից հետո։ Ռուս “խաղաղապահները” այդպես էլ թույլ չտվեցին ԱՄՆ եւ Ֆրանսիայի համանախագահների Արցախ այցելել։
Բացի այդ, այն, որ Մինսկի խումբը, ըստ Զախարովայի, ենթակա է լուծարման, հաստատվում է նաև Ադրբեջանի նախագահի և Հայաստանի վարչապետի, Ֆրանսիայի նախագահի և Եվրոպական խորհրդի ներկայացուցչի համատեղ հայտարարությունը, որը ընդունվել է 2022 թվականի հոկտեմբերի 6-ին Պրահայում (Նիկոլ Փաշինյանն ընդունել է Լեռնային Ղարաբաղը Ադրբեջանի կազմում – խմբ.):
«Այս ամենը հանգեցրեց նրան, որ Մինսկի խումբը պարզապես կորցրեց իր գործունեության օբյեկտը։ Հետեւաբար, Մինսկի խումբը, ակնհայտորեն եւ տրամաբանորեն, պետք է վերացվի։ Դա կնպաստի Ադրբեջանի և Հայաստանի միջև երկար սպասված հարաբերությունների կարգավորմանը»,- եզրափակել է Զախարովան։
Հիշեցնենք, որ Մինսկի խումբը չի դադարել գոյություն ունենալ, և հենց երեկ Կանադայի արտգործնախարարը կոչ արեց շարունակել Արցախի խնդրի քննարկումը Մինսկի խմբի ձևաչափով։