«Մինսկի խումբը միակ միջազգային հարթակն է եւ այն պետք է գոյություն ունենա»

Արցախցիների իրավունքների պաշտպանության խորհրդի անդամները Ազատության հրապարակում տեղադրված վրան-շտաբում շարունակում են համախմբմանն ուղղված հանդիպուները։ Այսօրվանից խորհրդի անդամները հանդիպումներ են ունենում հայաստանյան քաղաքական ուժերի հետ։ «Միասին» շարժման համակարգող Արամ Սարգսյանը այսօրվա հանդիպման ժամանակ ասաց՝ որպեսզի Արցախի հարցը դուրս չկա միջազգային օրակարգից, ԵԱՀԿ Մինսկի խումբը պետք է շարունակի իր գործունեությունը։

«Մինսկի խումբը միակ միջազգային հարթակն է եւ այն պետք է գոյություն ունենա, որպեսզի մենք կարողանանք խոսել միջազգային հարթակում, այսպես ասած՝ դուռը չփակվի, դա շատ կարեւոր է։ Երկրորդ հարցն այն է, որ արցախահայությունը պետք է ունենա վերադառնալու եւ իր ինքնորոշման իրավունքն իրականացնելու իրավունք։ Սա նույնպես մեզ համար սկզբունքային հարց է»,- ասաց Արամ Սարգսյանը։

Երրորդ խումբ խնդիրները, նրա խոսքով, արցախցիների սոցիալական հարցերն են։ Որպեսզի արցախցիները չարտագաղթեն Հայաստանից, պետք է լուծում տրվի նրանք սոցիալական խնդիրներին։ «Բայց մեր դիրքորոշումն այն է, որ այս իշխանությունները պետք է հեռացվեն, որպեսզի մենք կարողանանք այս բոլոր հարցերը լուծել»,- ասաց Արամ Սարգսյանը։