Ռուբեն Վարդանյանի ընտանիքը կոչ է անում Վատիկանին օգնել ազատ արձակել հայ գերիներին
- 13:46 29.04.2025
Լեռնային Ղարաբաղի նախկին պետնախարար, գործարար և բարերար Ռուբեն Վարդանյանի ընտանիքը ցավակցություն է հայտնել Հռոմի պապ Ֆրանցիսկոսի մահվան կապակցությամբ և կոչ է արել Վատիկանին շարունակել հանգուցյալ պապի ջանքերը՝ հայ գերիներին ազատ արձակելու համար։
«Սուրբ Աթոռը կարող է կարևոր դեր խաղալ գերիներին ազատ արձակելու դիվանագիտական ջանքերում՝ այդպիսով հավատարիմ մնալով Հռոմի պապ Ֆրանցիսկոսի արդարադատության և մարդկային արժանապատվության նկատմամբ հանձնառությանը։ Գերիներին պահելը հակասում է խաղաղության և հաշտեցման սկզբունքներին, որոնք Հռոմի պապ Ֆրանցիսկոսը հետևողականորեն հետևել է իր պաշտոնավարման ընթացքում», – ասվում է ընտանիքի կողմից սոցիալական ցանցերում հրապարակված հայտարարության մեջ։
Բարերարի ընտանիքը հիշեցրեց Հռոմի պապ Ֆրանցիսկոսի խոսքերը, որ կրոնը չի կարող օգտագործվել պատերազմի համար, միայն խաղաղությունն է սրբազան։ Վարդանյանի հարազատները կոչ արեցին Վատիկանին գործնականում կիրառել պապի խոսքերը՝ աջակցելով հայ բանտարկյալների անհապաղ ազատ արձակման պահանջին։
«Այս քրիստոնյաները արժանի են պաշտպանության հալածանքներից։ Այսօր նրանք դժվարությունների են բախվում իրենց հավատքի պատճառով։ Հիմա գործելու ժամանակն է։ Մենք կոչ ենք անում բոլոր նրանց, ովքեր ունեն խիղճ, միանալ մեր կոչին՝ ի պաշտպանություն 23 հայ գերիների, այդ թվում՝ Ռուբեն Վարդանյանի։ Նրանք գերության մեջ են մնում միայն իրենց համոզմունքների և ժառանգության պատճառով», – ընդգծվում է հայտարարության մեջ։