Անօդաչուներ Վարշավայի օդում. ինչ-որ մեկը կազուս բելլի է փնտրում
- 23:47 15.09.2025
Լեհաստանում գրանցվել է անօդաչուների նոր միջադեպ։ Այս անգամ՝ Վարշավայի կառավարական շենքերի մոտակայքում։ Այս մասին հայտնել է երկրի վարչապետ Դոնալդ Տուսկը։
Նրա խոսքով՝ անօդաչուն նկատվել է Վարշավայի Պարկովա փողոցի և Բելվեդերե պալատի վերևում։ Պետական անվտանգության ծառայությունը արագորեն չեզոքացրել է անօդաչու թռչող սարքը՝ կանխելով հնարավոր հետևանքները։ Տուսկն ընդգծել է, որ միջադեպի կապակցությամբ ձերբակալվել են Բելառուսի երկու քաղաքացիներ։ Նրանց գործողությունները ներկայումս ստուգվում են լրտեսության փորձի կամ սադրանքի մասնակցության համար։
Դեպքը տեղի է ունեցել Մոսկվայի կողմից Լեհաստանի տարածքում վերջերս իրականացված “թռոլինգի” ֆոնին, երբ տասնյակ անօդաչուներ խախտել են ՆԱՏՕ-ի անդամ երկրի օդային տարածքը։ Նաև հարկ է հաշվի առնել, որ Բելառուսում, լեհական սահմանների մոտակայքում, տեղի են ունենում Ռուսաստանի և Բելառուսի բանակների համատեղ զորավարժություններ։
Մինչդեռ, Ֆրանսիան Լեհաստան է ուղարկել երեք Rafale կործանիչներ: Ինչպես պարզաբանում է Defense Express-ը, սրանք այն ինքնաթիռներն են, որոնք մաս են կազմում ASMP-A հրթիռների մարտավարական միջուկային զենք կրելու համար հավաստագրված ստորաբաժանումների: Նման ինքնաթիռների տեղակայումը Բելառուսի հետ սահմանից 115 կմ հեռավորության վրա հստակ քաղաքական և ռազմական ակնարկ է Փարիզի և ՆԱՏՕ-ի՝ որպես ամբողջության, պատրաստակամության մասին՝ ուժեղացնելու Ռուսաստանի կողմից հետագա ագրեսիայի դեմ զսպումը:
Լոնդոնը կանչել է Ռուսաստանի դեսպանին և զգուշացրել, որ ռուսական անօդաչու թռչող սարքերի կողմից Դաշինքի օդային տարածքի հետագա խախտումները կարժանանան ուժային պատասխանի: Մեծ Բրիտանիայի արտաքին գործերի նախարարության հայտարարության մեջ ընդգծվել է, որ Մոսկվան պետք է գիտակցի, որ Ուկրաինայի դեմ իր ագրեսիան չի թուլացնում, այլ ընդհակառակը, ամրապնդում է ՆԱՏՕ-ի միասնությունը:
Ռուսական և բելառուսական անօդաչուների թռիչքները Լեհաստանի երկնքում նման են պատերազմի պատճառի՝ կազուս բելլի որոնմանը՝ որպես ՆԱՏՕ-ին խոշոր պատերազմի մեջ ներգրավելու պատրվակ: Ուկրաինայի բաժանումը չի կարող «վերադարձնել» Ռուսաստանին այն ակումբ, որը պետք է բաժանի աշխարհը: Անհրաժեշտ է ավելի մեծ մասշտաբի խառնաշփոթ: