Արցախցի երիտասարդները՝ առաջին հորիզոնականում
- 12:51 23.09.2025
Օրերս Երևանում կազմակերպված <<Ոսկե գավաթ-2025>> մրցույթում արցախցի բարբերներ Մհեր Աղաջանյանը և Բենիկ Գաբրիելյանը զբաղեցրել են մրցանակային առաջին հորիզոնականը։
Ամենամասշտաբային բյութի առաջնությունը լայն հնարավորություն էր բյութի մասնագետների համար ցույց տալ իրենց հմտությունները, յուրահատուկ գործերը և հաղթել մրցույթում։ Առաջնությանը մասնակցել են վարսահարդարներ, դիմահարդարներ, բարբերներ, մատնահարդարներ և գեղեցկության բնագավառի այլ մասնագետներ, ովքեր ներկայացել էին ինչպես Հայաստանից, այնպես էլ տարբեր երկրներից։
Արցախցի Մհերն ու Բենիկը մասնակցել են փակ աչքերով կտրվածքի մրցույթին, որտեղ Մհերը կտրվածք անողն էր, իսկ Բենիկը՝ հուշողը։ Տղաները կարողացել են ցույց տալ իրենց բարձր պատրաստվածությունը և պատահական չէ, որ զբաղեցրել են առաջին տեղը։
Արցախցի երիտասարդների համար մեծ պատիվ է միշտ առաջնային լինել ու ամեն տեղ բարձր պահել Արցախի անունը։
Նշենք, որ Մհերն Ասկերան քաղաքից է, իսկ Բենիկը՝ Խնապատ գյուղից։ Նրանք աշխատում են Երևանի Փափազյան 12 հասցեում գտնվող <<Բարբեր հաուս>> սրահում։
Կարինե ԲԱԽՇԻՅԱՆ
