ԱՄՆ Կոնգրեսի հանձնաժողովն ընդունել է գերիներին և արցախցիներին վերաբերող պահանջ
- 11:29 26.09.2025
Ամերիկայի հայկական համագումարը հայտնում է, որ Ներկայացուցիչների պալատի հանձնաժողովը միաձայն ընդունեց Հայաստանին վերաբերող կոնգրեսական Ամոյի առաջարկած փոփոխությունը
ԱՄՆ Ներկայացուցիչների պալատի արտաքին հարաբերությունների հանձնաժողովի 2026թ․-ի ֆինանսական տարվա Պետդեպարտամենտի վերալիազորման ակտի քննարկման ժամանակ Ներկայացուցիչների պալատի անդամ Գեյբ Ամոյի կողմից առաջարկված H.R.3000-ի փոփոխությունն ընդունվեց միաձայն համաձայնությամբ։
Փոփոխությունը նախատեսում է, որ ԱՄՆ պետքարտուղար Մարկո Ռուբիոն համագործակցի Հայաստանի և Ադրբեջանի կառավարությունների հետ՝ խրախուսելու հայ ռազմագերիների ազատ արձակումը, հայկական կրոնական և պատմական վայրերի պաշտպանությունը, Լեռնային Ղարաբաղի փախստականների անվտանգ վերադարձը և ռազմական հակամարտության խաղաղ ավարտը։