Ստեփանակերտի վերականգնողական կենտրոնը Նիսում էր

Քերոլայն Քոքսի անվան վերականգնողական կենտրոնի թիմը՝ տնօրեն Վարդան Թադևոսյանի գլխավորությամբ, սեպտեմբերի 21-ից 27-ը մասնակցել է միջազգային փառատոնի՝ ֆրանսիական Նիսի քաղաքապետարանի և այլ գործընկերների հրավերով: Փառատոնի նպատակն էր երեխաների և երիտասարդների, այդ թվում՝ հաշմանդամություն ունեցողների համար ներառական կրթության և զարգացման փորձի փոխանակումը։

Այցը կազմակերպվել էր կենտրոնի մտերիմ բարեկամ և վաղեմի գործընկեր Աննելին Սաբադելի նախաձեռնությամբ, ով երկար ժամանակ ապրել է Արցախում և աշխատել որպես կամավոր։

Պատվիրակության կազմում էին կենտրոնի աշխատակիցներ և շահառուներ։

Նիսի փառատոնին մասնակցել է տարբեր երկրներից ժամանած ավելի քան 1000 մասնակից։ Փառատոնի ընթացքում անցկացվել են մոտ 150 վարպետության դասեր և այլ կրթական միջոցառումներ, որոնց մասնակցել են հաշմանդամություն ունեցող երեխաներ և երիտասարդներ։

Կ. Քոքսի անվան վերականգնողական կենտրոնի մասնագետներն ու շահառուները ակտիվորեն մասնակցել են վարպետության դասերին և փառատոնի այլ միջոցառումներին։

Այցի ընթացքում պատվիրակությունը այցելեց մի քանի ժամանակակից բժշկական կենտրոններ՝ փորձի փոխանակման համար:

Նիսում կազմակերպվեց նաև հանդիպում հայ համայնքի հետ, որտեղ պատվիրակության ղեկավար պարոն Թադևոսյանը ներկայացրեց կենտրոնի պատմությունը և նկարագրեց Եղվարդում վերականգնողական կենտրոնի նոր շենքի վերակառուցումը:

Շահառուներին կազմակերպվեցին հետաքրքիր էքսկուրսիաներ Նիսի տեսարժան և գեղատեսիլ վայրերով:

Ճանապարհորդությունն ավարտվեց Մոնակոյի մայրաքաղաք Մոնտե Կառլո անմոռանալի այցելությամբ:

«Այս մակարդակի միջազգային փառատոնին մասնակցությունը հնարավորություն է անմիջականորեն ներկայացնելու կենտրոնի գործունեությունը, մեր փորձը և տեսլականը, ինչպես նաև ծանոթանալու մեր եվրոպացի գործընկերների ծրագրերին և լավագույն փորձին: Այս այցը կարևոր քայլ էր միջազգային կապերի ամրապնդման և ներառական ծրագրերի ոլորտում նոր գաղափարների ու փորձի փոխանակման գործում», – նշում է Կ. Քոքսի անվան վերականգնողական կենտրոնի թիմը:

Արսեն Աղաջանյան